25/05/2020
វិធីសាស្ត្រងាយៗ ដើម្បីជៀសផុតពីបំណុល
រាជធានីភ្នំពេញ៖ “សម័យនេះហើយ...អ្នកណាមិនជំពាក់លុយគេ...ទើបជារឿងចម្លែក?” “ជំពាក់លុយគេ គ្មានបញ្ហា... រឿងសំខាន់... គឺមានលុយសងគេវិញអត់?”។ល។ កាលពីមុន ឃ្លាសន្ទនា ទាំងនេះ គ្រាន់តែជាការនិយាយលេងសើចប៉ុណ្ណោះ ខណៈពេលបច្ចុប្បន្ននេះ មនុស្សមួយចំនួន ចាប់ផ្តើមទម្លាប់ជំពាក់លុយគេ ឬបង្កើតបំណុល ដោយពុំបានគិតគ្រប់ជ្រុងជ្រោយនោះទេ។
អ្នកគួរជៀសវាង បំណុលទាំងឡាយណា ដែលមិនអាចជួយបង្កើតប្រាក់ចំណេញ ឬប្រយោជន៍សម្រាប់ទ្រទ្រង់ជីវភាពរស់នៅប្រចាំថ្ងៃរបស់អ្នក ដែលបំណុលនេះ គេហៅថាបំណុលអាក្រក់។ ប្រសិនបើអ្នកអនុវត្ត វិធីសាស្ត្រខាងក្រោមនេះ អ្នកអាចជៀសផុតបំណុលអាក្រក់យ៉ាងមានប្រសិទ្ធភាពបំផុត៖
១.រៀបចំផែនការ ចំណូល និងចំណាយប្រចាំខែឲ្យបានច្បាស់លាស់៖ តាមរយៈផែនការមួយនេះ អ្នកនឹងអាចគ្រប់គ្រងលំហូរសាច់ប្រាក់របស់អ្នកប្រកដោយប្រសិទ្ធភាពខ្ពស់។
២.មានវិន័យចាយវាយ៖ ចំពោះចំណាយដែលមិនបានគ្រោងទុកមួយចំនួន ហើយវាមិនប៉ះពាល់ខ្លាំងដល់អ្នក និងក្រុមគ្រួសារទេនោះ អ្នកមិនគួរប្រថុយចំណាយលើវាឡើយ។ ចំណាយទាំងអស់នោះ ជាទូទៅច្រើនជាសម្ភារប្រើប្រាស់ សម្លៀកបំពាក់ ឬរបស់ញុំាជាដើម។
៣.កាត់បន្ថយការជួបជុំ ឬញាំុអាហារខាងក្រៅ៖ ការនិយមជួបជុំ មិត្តភក្តិ បងប្អូន ឬសាច់ញ្ញាតិ មិនគួរច្រើនដងពេកទេក្នុងមួយខែៗ។ ទម្លាប់មួយនេះ មិនមែនថាអ្នកនឹងត្រូវផ្តាច់ខ្លួនចេញពីពួកគាត់នោះទេ ព្រោះថា អ្នកអាចប្រើប្រាស់វិធីសាស្ត្រល្អៗជាច្រើនទៀតដើម្បីរក្សាទំនាក់ទំនង ដោយមិនចាំបាច់ប៉ះពាល់ធ្ងន់ធ្ងរ ដល់ការចំណាយរបស់អ្នកផងដែរ។
៤.ស្វែងយល់ពីបំណុលឲ្យបានច្បាស់លាស់៖ បំណុលមិនមែនសុទ្ធតែអាក្រក់នោះទេ ប្រសិនបើវាអាចជួយបង្កើតប្រាក់ចំណូល។ អ្នកត្រូវស្វែងយល់ឲ្យបានច្បាស់ពីបំណុល នោះអ្នកនឹងដឹងច្បាស់ថាប្រភេទបំណុលបែបណាដែលគួរតែជៀសវាង។
៥.បង្កើតទម្លាប់សន្សំ៖ ទម្លាប់មួយនេះ ជាគន្លឹះដែលសំខាន់បំផុត ដែលអាចជៀសផុតបំណុលយ៉ាងមានប្រសិទ្ធភាព ព្រោះថា អ្នកដែលមានទម្លាប់សន្សំប្រាក់ ច្រើនតែមានសាច់ប្រាក់ប្រើប្រាស់ជាប្រចាំ ដែលអាចយកទៅដោះស្រាយចំណាយផ្សេងៗ ដែលមិនបានគ្រោងទុកមុន។ ម្យា៉ងវិញទៀត អ្នកដែលមានទម្លាប់សន្សំ គឺជាអ្នកពូកែគ្រប់គ្រងហិរញ្ញវត្ថុ និងតែងតែបង្វែរបំណុលអាក្រក់ទៅជាបំណុលល្អ។ ដូច្នេះ មេគ្រួសារនីមួយៗ គួរតែបង្កើតទម្លាប់សន្សំប្រាក់ដល់សមាជិកគ្រួសារគ្រប់រូប។
តាមរយៈការចែករំលែកពីវិសាស្ត្រទាំងអស់ខាងលើនេះ គ្រឹះស្ថានមីក្រូហិញ្ញវត្ថុ អេ អឹម ខេ សង្ឃឹងថា វានឹងអាចចូលរួមចំណែកធ្វើឲ្យស្ថានភាពហរិញ្ញវត្ថុរបស់គ្រួសារអ្នកកាន់តែប្រសើរឡើងមួយកម្រិតទៀត។
