11/03/2023
អាជ្ញាប័ណ្ណធនធានរ៉ែនៅព្រះរាជាណាចក្រកម្ពុជាត្រូវបានរៀបចំជាប្រាំមួយប្រភេទ ដូចខាងក្រោម:
១ -អាជ្ញាប័ណ្ណសិប្បកម្មធនធានរ៉ែ : អាចផ្ដល់ឱ្យតែចំពោះប្រជាពលរដ្ឋខ្មែរប៉ុណ្ណោះ ក្នុងគោលបំណងអនុវត្ដការងារស្វែងរុករកនឹងធ្វើអាជីវកម្មធនធានរ៉ែដោយប្រើប្រាស់ឧបករណ៍សម្ភារៈសាមញ្ញ ដែលមាននៅក្នុងមូលដ្ឋាន ហើយប្រើប្រាស់កម្លាំងផ្ទាល់ខ្លួន ឬជាលក្ខណៈគ្រួសារដែលមានចំនួនមិនលើសពី ៧ (ប្រាំពីរ) នាក់។
សិប្បកម្មធនធានរ៉ែអាចធ្វើការស្វែងរុករក និងធ្វើអាជីវកម្មធនធានរ៉ែ បានតែចំពោះធនធានរ៉ែដែលរកឃើញក្នុងសភាពជាធនធានរ៉ែរាយប៉ាយនៅក្នុងដីល្បាប់ ខ្សាច់ ក្រួស សិលា ក្នុងផ្ទៃដីកំណត់មួយមានទំហំមិនលើសពី ១ (មួយ) ហិកតា និងជម្រៅមិនហួសពី ៥ (ប្រាំ) ម៉ែត្រ។
២ -អាជ្ញាប័ណ្ណអណ្ដូងរ៉ែបើកនិងការដ្ឋានវាយថ្ម : អាចផ្ដល់ឱ្យរូបវ័ន្ដបុគ្គល ឬនីតិបុគ្គលដែលមានលក្ខណៈសម្បត្ដិនិងសមត្ថភាពគ្រប់គ្រាន់ ក្នុងគោលបំណងអនុវត្ដការងារស្វែងរុករក ធ្វើអាជីវកម្មធនធានរ៉ែសំណង់និងធនធានរ៉ែឧស្សាហកម្មណាមួយបម្រើឱ្យការសាងសង់ ឧស្សាហកម្មគីមី ឧស្សាហកម្មកែច្នៃ ហើយជីកយកពីអណ្ដូងរ៉ែបើក ឬការដ្ឋានវាយថ្ម។
ធនធានរ៉ែសំណង់និងធនធានរ៉ែឧស្សាហកម្មមានជាអាទិ៍ ខ្សាច់ ក្រួស ថ្មសំណង់ ឡាតេរីត ដីឥដ្ឋ ដីឥដ្ឋធ្វើស៊ីម៉ង់ត៍ ផូសីលផ្កាថ្ម ហ្វូស្វរីត ថ្មកំបោរ ដូឡូមីត ថ្មម៉ាប់ កៅឡាំង ប៉ោហ្គោឌីត អំបិល ប៉ូតាស ម្នាងសិលា ធ្យូងភក់ ធ្យូរថ្ម ខ្សាច់ទីតាន ខ្សាច់ស៊ីលីស ឬសមាសធាតុធនធានរ៉ែផ្សេងទៀតដែលប្រើប្រាស់ក្នុងគោលដៅដូចគ្នា។
៣ -អាជ្ញាប័ណ្ណអាជីវកម្មត្បូងថ្មមានតម្លៃ : អាចផ្ដល់ឱ្យដល់រូបវ័ន្ដបុគ្គល ឬនីតិបុគ្គលដែលមានលក្ខណសម្បត្ដិនិងសមត្ថភាពគ្រប់គ្រាន់ក្នុងគោលបំណងស្វែងរុករកនិងធ្វើអាជីវកម្មធនធានរ៉ែ ត្បូងថ្ម
មានតម្លៃ ពាក់កណ្ដាលមានតម្លៃ និងថ្មសំអាង។
ត្បូងថ្មមានតម្លៃជាអាទិ៍ ពេជ្រ ត្បូងទទឹម កណ្ដៀង មរកត និងរ៉ែត្បូងថ្ម ទាំងឡាយដែលមានគុណភាពប្រហាក់ប្រហែល។
ត្បូងថ្មពាក់កណ្ដាលមានតម្លៃមានជាអាទិ៍ សៀកកុន អាមេទីស តូប៉ាស និងរ៉ែត្បូងថ្មទាំងឡាយដែលមានគុណភាពប្រហាក់ប្រហែល។
ថ្មសំអាងគឺជាថ្មដែលមានកម្រិតថ្លាឆ្លុះទាប ឬមិនថ្លាឆ្លុះ ត្រូវបានគេយកទៅប្រើប្រាស់គ្រឿងលំអរផ្សេងៗ មានអាទិ៍ កាល់សេដូន អាសួរីត អូបាល់ធម្មតា អាហ្គាត ហ្សេតម៉ាឡាស៊ីក ឈើថ្ម ថ្មថ្លើមអណ្ដើក និងថ្មទាំងឡាយដែលមានគុណភាពប្រហាក់ប្រហែល។
៤ -អាជ្ញាប័ណ្ណកែច្នៃធនធានរ៉ែ : អាចផ្ដល់ឱ្យចំពោះរូបវ័ន្ដបុគ្គលឬនីតិបុគ្គលដែលមានលក្ខណសម្បត្ដិគ្រប់គ្រាន់ក្នុងគោលបំណងកែច្នៃត្បូងថ្មមានតម្លៃ ពាក់កណ្ដាលមានតម្លៃ ឬថ្មសំអាង។
៥ -អាជ្ញាប័ណ្ណស្វែងរុករក : អាចផ្ដល់ឱ្យរូបវ័ន្ដបុគ្គល ឬនីតិបុគ្គលដែលមានលក្ខណសម្បត្ដិនិងសមត្ថភាពគ្រប់គ្រាន់ដើម្បីធ្វើការស្វែងរុករកនិងសិក្សាអំពីសក្កានុពលធនធានរ៉ែ។
៦ -អាជ្ញាប័ណ្ណឧស្សាហកម្មអាជីវកម្មធនធានរ៉ែ : ត្រូវបានផ្ដល់ឱ្យចំពោះតែសម្បទានិកដែលមានអាជ្ញាប័ណ្ណស្វែងរុករកប៉ុណ្ណោះ ក្នុងគោលបំណងស្វែងរុករកនិងជីកយករ៉ែណាដែលមានជម្រករ៉ែមានប្រសិទ្ធភាពសេដ្ឋកិច្ច ហើយស្ថិតនៅតែក្នុងរង្វង់ព្រំដែនអាជ្ញាប័ណ្ណស្វែងរុករក។
សម្បទានិកស្វែងរុករកត្រូវតែដាក់ឱ្យពិនិត្យនូវការវិភាគបច្ចេកទេសហិរញ្ញវត្ថុបរិស្ថានសេដ្ឋកិច្ច និងសង្គម ក្នុងគោលបំណងកំណត់លទ្ធភាពសេដ្ឋកិច្ចសង្គមនៃទម្រង់ប្រតិបត្ដិការជីកយករ៉ែ ដើម្បីសុំការយល់ព្រមពីរដ្ឋមន្រ្ដីទទួលបន្ទុកវិស័យរ៉ែ។
