11/05/2026
ចាត់ចែង...ការងារ...រញ៉េរញ៉ៃ
_____
(ការចាត់ចែងការងាររញ៉េរញ៉ៃ ធ្វើឲ្យមានការជាន់ជើងគ្នានៅកន្លែងធ្វើការ រហូតខូចប្រព័ន្ធ និងខូចការងារ)
តើអ្នកធ្លាប់មានអារម្មណ៍ហត់នឿយនឹងការងារ មិនមែនដោយសារតែទំហំការងារច្រើន ប៉ុន្តែដោយសារតែ "ការចាត់ចែងការងាររញ៉េរញ៉ៃ" ដែរឬទេ?
បញ្ហានេះតែងតែកើតឡើងជារឿយៗនៅក្នុងកន្លែងធ្វើការជាច្រើន ដែលវាបានទាញទម្លាក់ទាំងប្រសិទ្ធភាព និងស្មារតីរបស់ក្រុមការងារទាំងមូល...
ការធ្វើការងារជាក្រុម ត្រូវមានរឿងសំខាន់មួយគឺ.....
"ភាពច្បាស់លាស់នៃតួនាទី"
បើការដាក់ការងារគ្មានប្រព័ន្ធត្រឹមត្រូវ
អ្នកណាចង់បញ្ជា ក៏បញ្ជា
អ្នកណាចង់ធ្វើ ក៏ធ្វើ
ចុងក្រោយ
តួនាទីនឹងចាប់ផ្តើមត្រួតស៊ីគ្នា រញ៉េរញ៉ៃ។
អ្នកខ្លះធ្វើការងារជាន់គ្នា
ការងារខ្លះគ្មានអ្នកទទួលខុសត្រូវ
អ្នកខ្លះត្រូវគេបញ្ជាពីច្រើនច្រក
ទើបធ្វើឲ្យក្រុមការងារចាប់ផ្តើម “ជ្រៀតជ្រែកភារកិច្ចគ្នា”
ដោយមិនដឹងខ្លួន។
ហើយនៅពេលដែលប្រព័ន្ធតួនាទីមិនច្បាស់លាស់
បញ្ហាដែលកើតបន្ទាប់ពីនោះគឺ....
- ការងារយឺតយ៉ាវ
- ការងារធ្លាក់ចន្លោះប្រហោង (របូតការងារ)
- ការទទួលខុសត្រូវមិនច្បាស់លាស់
ចុងក្រោយ
វាមិនត្រឹមតែខូចប្រព័ន្ធការងារនោះទេ
តែវាធ្វើឲ្យបាត់បង់គុណភាពការងាររបស់ក្រុមទាំងមូល។
ស្ថាប័នដែលដំណើរការបានល្អ
មិនមែនពឹងផ្អែកតែលើការមានមនុស្សពូកែៗនោះទេ
តែត្រូវមាន
ប្រព័ន្ធនៃការចាត់ចែងការងារដែលច្បាស់លាស់
និងចេះគោរពព្រំដែននៃតួនាទីរវាងគ្នាទៅវិញទៅមក។
ព្រោះនៅពេលដែលតួនាទីច្បាស់លាស់
ក្រុមការងារនឹងអាចសហការគ្នាបានកាន់តែងាយស្រួល។
🔸វិធីសាស្ត្រដោះស្រាយបញ្ហា
ដើម្បីកែប្រែប្រព័ន្ធការងារដែលកំពុងតែរញ៉េរញ៉ៃ ឱ្យត្រឡប់មកមានសណ្តាប់ធ្នាប់ និងប្រសិទ្ធភាពវិញ ថ្នាក់ដឹកនាំ និងសមាជិកក្រុមអាចអនុវត្តតាមជំហានសំខាន់ៗដូចខាងក្រោម....
១. កំណត់តួនាទី និងការទទួលខុសត្រូវឱ្យបានច្បាស់លាស់
ធ្វើបច្ចុប្បន្នភាព JD (Job Description): សមាជិកម្នាក់ៗត្រូវតែដឹងឱ្យប្រាកដថា តើការងារស្នូលរបស់ខ្លួនមានអ្វីខ្លះ ហើយការងារណាខ្លះដែលមិនស្ថិតក្នុងបន្ទុករបស់ខ្លួន។
កំណត់អ្នកទទួលខុសត្រូវចម្បង : រាល់គម្រោង ឬការងារនីមួយៗ ត្រូវមានបុគ្គលម្នាក់ជាអ្នកទទួលខុសត្រូវចម្បង ដើម្បីចៀសវាងការសួរគ្នាទៅវិញទៅមកថា "តើនរណាជាអ្នកធ្វើ?"
២. រៀបចំប្រព័ន្ធបញ្ជា និងចាត់ចែងការងារ
កាត់បន្ថយច្រកបញ្ជាការងារ: ចៀសវាងការឱ្យបុគ្គលិកម្នាក់ទទួលការបញ្ជាពីមេកោយ ២ ឬ ៣ នាក់ ក្នុងពេលតែមួយ។ ការដាក់ការងារគួរតែឆ្លងកាត់ប្រធានផ្នែកផ្ទាល់ជាមុនសិន។
កំណត់អាទិភាពការងារ : ពេលដាក់ការងារ ត្រូវប្រាប់ឱ្យច្បាស់ពីថ្ងៃកំណត់ និងកម្រិតនៃភាពបន្ទាន់ ដើម្បីកុំឱ្យបុគ្គលិកមានការភ័ន្តច្រឡំក្នុងការចាត់ចែងពេលវេលា។
៣. ប្រើប្រាស់ប្រព័ន្ធ ឬឧបករណ៍គ្រប់គ្រងការងារ
ការប្រើប្រាស់ឧបករណ៍ដូចជា Trello, Asana, Jira ឬសូម្បីតែ Google Sheets អាចជួយឱ្យក្រុមទាំងមូលមើលឃើញពីដំណើរការការងារ។
គ្រប់គ្នាអាចមើលឃើញថា អ្នកណាកំពុងធ្វើអ្វី ដល់ណាហើយ ដើម្បីកុំឱ្យមានអ្នកទៅធ្វើការងារនោះជាន់គ្នា។
៤. គោរពព្រំដែនការងាររបស់គ្នាទៅវិញទៅមក
កុំជ្រៀតជ្រែក បើការងារនោះបានប្រគល់ទៅឱ្យនរណាម្នាក់ហើយ គួរទុកសិទ្ធិឱ្យពួកគេជាអ្នកសម្រេចចិត្ត និងអនុវត្ត ប្រសិនបើចង់ជួយ គួរតែផ្តល់ជាយោបល់ ជាជាងលូកដៃធ្វើជំនួស។
គោរពឋានានុក្រម និងជំនាញរបស់សហការី កុំព្យាយាមធ្វើជាអ្នកចេះដឹងគ្រប់រឿងជំនួសអ្នកឯកទេសក្នុងផ្នែកនោះ។
៥. បង្កើតទម្លាប់ប្រជុំអាប់ដេតការងារជាប្រចាំ
រៀបចំការប្រជុំខ្លីៗប្រចាំថ្ងៃ ១០ ទៅ ១៥ នាទី ឬប្រចាំសប្តាហ៍ ដើម្បីឱ្យគ្រប់គ្នាបានរាយការណ៍ពីអ្វីដែលខ្លួនកំពុងធ្វើ អ្វីដែលជាឧបសគ្គ និងការងារបន្ទាប់។
ការធ្វើបែបនេះជួយឱ្យក្រុមអាចតម្រង់ទិសគ្នាបានទាន់ពេលវេលា មុនពេលមានការងារជាន់គ្នា។
៦. បើកចំហរក្នុងការផ្តល់មតិ
ត្រូវបង្កើតបរិយាកាសការងារដែលសមាជិកក្រុមហ៊ាននិយាយប្រាប់ដោយត្រង់ៗនៅពេលដែលពួកគេ... "ទទួលការងារច្រើនពេក" "មិនច្បាស់លាស់ពីការងារ" ឬ "មានអារម្មណ៍ថាមានអ្នកកំពុងជាន់ជើងគ្នា"។
ថ្នាក់ដឹកនាំត្រូវចេះស្តាប់ និងកែសម្រួលប្រព័ន្ធការងារភ្លាមៗនៅពេលទទួលបានមតិរិះគន់ស្ថាបនាពីកូនចៅ។
ការកែបញ្ហានេះ មិនអាចធ្វើបានសម្រេចត្រឹមតែរយៈពេលមួយថ្ងៃនោះទេ វាទាមទារឱ្យមានការចូលរួមពីគ្រប់ភាគី ពិសេសគឺ "ថ្នាក់ដឹកនាំ" ដែលត្រូវធ្វើជាគំរូក្នុងការគោរពប្រព័ន្ធការងារដែលបានដាក់ចេញ នៅពេលដែលប្រព័ន្ធល្អ វានឹងជួយការពារមនុស្សល្អៗមិនឱ្យហត់នឿយរហូតបោះបង់ការងារចោល។
តើអ្នកធ្លាប់ជួបស្ថានភាព
“ត្រូវគេបញ្ជាការងារច្រើនច្រក រហូតដល់ខូចប្រព័ន្ធការងារ” ដែរឬទេ?
_____សុវត្ថន៍-Sovathn
#សុវត្ថន៍_Sovathn #ការងាររញ៉េរញ៉ៃ #ការងារ #ចាត់ចែងការងារ #ផ្លាស់ប្តូរការគិត #គ្រប់គ្រងចិត្ត #គោលដៅជីវិត #ការផ្លាស់ប្ដូរ #ជ័យជម្នះ #កម្លាំងចិត្ត #ខ្លួនឯង #បទពិសោធន៍ #ការអត់ធ្មត់ #ការអភិវឌ្ឍខ្លួន #ជំហានដំបូង #តស៊ូបន្ដ #ឱកាសថ្មី #អារម្មណ៍ផ្ដោត #ផ្នត់គំនិត #ពន្យារពេល #អភិវឌ្ឍខ្លួនឯង
