03/06/2026
ក្រសួងរតនាគារសហរដ្ឋអាមេរិកដាក់ទណ្ឌកម្មលើ Nobitex ដែលជាវេទិកាជួញដូរគ្រីបតូធំបំផុតរបស់អ៊ីរ៉ង់
ក្រសួងរតនាគារសហរដ្ឋអាមេរិកបានប្រកាសដាក់ទណ្ឌកម្មលើ Nobitex ដែលជាវេទិកាជួញដូរទ្រព្យសកម្មឌីជីថលធំបំផុតរបស់ប្រទេសអ៊ីរ៉ង់ ព្រមទាំងវេទិកាគ្រីបតូចំនួន ៣ ផ្សេងទៀត កាលពីថ្ងៃអង្គារ ក្នុងក្របខណ្ឌយុទ្ធនាការ Economic Fury របស់រដ្ឋបាលលោក ដូណាល់ ត្រាំ។
ការិយាល័យគ្រប់គ្រងទ្រព្យសម្បត្តិបរទេស (OFAC) បានកំណត់ថា Nobitex បានដំណើរការប្រតិបត្តិការច្រើនជាង 50% នៃលំហូរទ្រព្យសកម្មឌីជីថលចូលប្រទេសអ៊ីរ៉ង់ក្នុងឆ្នាំ 2025 និងបានជួយសម្រួលការទូទាត់ដែលពាក់ព័ន្ធនឹងសកម្មភាពភេរវកម្ម និងការគេចវេសពីទណ្ឌកម្មអន្តរជាតិរបស់អ៊ីរ៉ង់។
បន្ថែមពីនេះ Nobitex ត្រូវបានចោទថាបានជួយ ធនាគារកណ្តាលអ៊ីរ៉ង់ ចូលប្រើប្រាស់ប្រាក់ Stablecoin រាប់រយលានដុល្លារ ដើម្បីគាំទ្រតម្លៃរូបិយបណ្ណអ៊ីរ៉ង់។ វេទិកានេះក៏បានជួយមន្ត្រី និងបុគ្គលជិតស្និទ្ធនឹងរដ្ឋាភិបាលអ៊ីរ៉ង់ ឱ្យអាចចូលប្រើទីផ្សារគ្រីបតូអន្តរជាតិ និងគេចផុតពីទណ្ឌកម្មនៅក្នុងប្រទេសជាច្រើន។
ក្រៅពី Nobitex សហរដ្ឋអាមេរិកក៏បានដាក់ទណ្ឌកម្មលើវេទិកាគ្រីបតូធំៗចំនួន ៣ ទៀតរបស់អ៊ីរ៉ង់ផងដែរ៖
Wallex: ទទួលបានប្រហែល 12% នៃលំហូរទ្រព្យសកម្មឌីជីថលចូលអ៊ីរ៉ង់ក្នុងឆ្នាំ 2025។
Bitpin: ទទួលបានប្រហែល 10% នៃលំហូរទ្រព្យសកម្មឌីជីថល និងបានដំណើរការប្រតិបត្តិការរាប់លានដុល្លារដែលពាក់ព័ន្ធនឹង IRGC។
Ramzinex: ចាប់តាំងពីបង្កើតក្នុងឆ្នាំ 2018 បានដំណើរការប្រតិបត្តិការជាង 2.45 ពាន់លានដុល្លារ។
ផ្តល់ព័ត៌មានដោយ: លោក សេក ធារម្យ, ប្រធានស្ថាប័នស្រាវជ្រាវ និង អភិវឌ្ឍន៍ (R&D) ក្រុមហ៊ុន BFX Capital.
ទំនាក់ទំនងទូរស័ព្ទលេខ: +855 69 721 698
