03/01/2026
របៀបចាយលុយរបស់អ្នកក្រ អ្នកមធ្យម អ្នកបង្គួរ អ្នកមាន
ការរកលុយពិបាកមធ្យម ប៉ុន្តែអ្វីដែលពិបាកជាងលាររកលុយ គឺការចាយលុយ។ ការចាយលុយអាចកំណត់បានថាអ្នកនឹងក្លាយជាអ្នកមាន ឬអ្នកក្រ។ អ្នកខហលះបើកប្រាក់ខែបានមកសល់ ប៉ុន្តែអ្នកខ្លះទៀតបើកលុយបានមកអស់ដោយមិនដឹងថាចំណាយទៅលើអ្វីខ្លះ។ ខាងក្រោមនេះគឺជាប្រភេទនៃការចាយលុយរបស់អ្នកក្រ អ្នកមធ្យម អ្នកបង្គួរ អ្នកមាន៖
១. អ្នកក្របានលុយគឺចាយទៅវិញអស់
ដោយការចាយទៅលើរឿងកំបុិកកំប៉ុក រឿងឥតបហរយោជន៍ រឿងមិនចាំបាច់ រឿងហុឺហា បាយហាង បាយផ្សារ ទិញសម្លៀកបំពាក់ ទិញគ្រឿងអលង្ការ ដែលមិនមែនជារបស់មានប្រយោជន៍។ វាគ្រាន់តែជារបស់ដែលទិញដើម្បីអស់លុយ ហើយយកមកទុកមិនកើនថ្លៃតែប៉ុណ្ណោះ។ របស់របរទាំងនេះបានថ្មីតែដំបូងទេពេលប្រើកាន់តែចាស់ក៏បោះចោលទៅធុងសំរាម ហើយធ្វើការរកសុីបានលុយប៉ុនណាក៏មិនសល់ដែរ។ បើបានតុចចាយតិច បានច្រើនចាយ មិនមានទម្លាប់ទុកដាក់ ឬសន្សំដើម្បីវិនិយោគអ្វីឡើយ។
២. អ្នកមធ្យមបានលុុយមករក្សាទុក
ដោយសារតែគិតថាខ្លួនធ្លាប់ក្រយូរមកហើយ នៅពេលដែលមានគឺទុកលុយឲ្យនៅគង់វង្ស មិនឲ្យរបេះរបូតពីដៃទេ។ ហើយក្លាយជាមនុស្សកំណាញ់ ម៉ៅស្វិតទៀតផង។ គាត់មិនហូបចុកដើម្បីឆ្ងាញ់មាត់ទេ គាត់ក្តាប់លុយយ៉ាងតឹងណែន ហើយនៅពេលដែលទិញអ្វីមួយគឺគិតណាស់ ហើយមិនទិញវិញក៏មាន។ ប៉ុន្តែ តើគាត់ទុកលុយធ្វើអ្វី? បើគាត់យកលុយទៅវិនិយោគគឺមិនថ្វីទេ តែគាត់សន្សំលុុយទុកនៅក្រោមខ្នើយដែលជាការសន្សំខាតជួនកាលចាស់ ជួនកាលមានហានិភ័យ សត្វកកេរ ចោរលួច ឬឆេះផ្ទះជាដើម។ ការស្រលាញ់លុយបែបនេះធ្វើឲ្យគាត់ក្លាយទៅជាខ្ញុំកញ្ជះលុយ។
៣. អ្នកបង្គួរ គឺរកលុយមកចាយដោយមិនគិតគូរ
រកលុយបានច្រើនគួរសម តែបើសិនជាគាត់ចេះពីរបៀបចាយលុយទៀត គឺអាចក្លាយជាទៅជាអ្នកមាននៅថ្ងៃខាងមុខ។ ប៉ុន្តែបើគាត់មិនចេះចាយលុយឲ្យបានត្រឹមត្រូវទេ គាត់មានការព្រហើនទៅទិញបំណុលដូចជា ទិញឡានបង់រលស់ ផ្ទះបង់រំលស់ ទិញគ្រឿងអេឡិចត្រនិចទំនើប ឬទិញរបស់ដែលហុឺហា។ គាត់មិនបានដឹងអំពី របស់ទាំងអស់នោះជាបំណុលដែលពួនសម្ងំកកេរសុីទ្រព្យ។ ឬកកាយទ្រព្យចេញពីឃ្លាំងលុយរបស់ខ្លួនទេ។ យូរៗទៅចាប់ផ្តើមលង់ខ្លួន។ នៅពេលដែលគាត់ចាប់ផ្តើមភ្ញាក់ខ្លួន គឺបានជ្រុលខុសហួសបាត់អស់ទៅហើយ។
៤. អ្នកមាន គឺមានការយល់ដឹងចំណេះដឹងអំពីហិរញ្ញវត្ថុ
ពួកគេចេះចាត់ចែងចាយលុយបានយ៉ាងត្រឹមត្រូវ។ នៅពេលដែលគេបានលុយមក គេដកសន្សំមុនឲ្យបានច្រើនជាអតិបរមា ហើយបើគេចាយគឺគេចាយទៅលើរឿងដែលចាំបាច់ និងសំខាន់បំផុត ឬទៅលើរឿងអាសន្ន។ បើសិនជាគ្មានអាសន្នទេ គេសន្សំលុយបានគ្រប់ចំនួនទិញទ្រព្យ និងធ្វើការវិនិយោគការទិញទ្រព្យគឺវាជាកម្លាំងរកលុយបម្ថែម និងជាប្រភពនៃការបង្កើតលុយឲ្យបានកាន់តែច្រើនឡើង។ គាត់មិនមានចិត្តហុឺហា ឬអួតទ្រព្យសម្បត្តិនោះទេ។ គាត់គិតតែអំពីការកសាងប្រភពប្រាក់ចំណូល បានលុយមកទិញដីទុក ទិញអចលនវត្ថុដែលអាចឡើងថ្លៃ ធ្វើជំនួញ ធ្វើអាជីវកម្មទិញភាគហ៊ុន បង្កើតប្រព័ន្ធការងារឲ្យមានស្តង់ដារទៅលើអាជីវកម្មរបស់ខ្លួន ដែលអាចបង្កើតកូនចៅលុយបានកាន់តែច្រើន។ នៅពេលដែលប្រាក់ចំណូលរបស់គាត់រីកធំធាត់ទាំងអស់ គាត់ក្លាយជាអ្នកមានប្រកបដោយស្ថេរភាព ហើយអាចចូលនិវត្តទាំងនៅវ័យក្មេងបាន៕
