11/09/2018
និយមន័យរបស់ពន្ធប៉ាតង់
ពន្ធប៉ាតង់ ជាពន្ធកំណត់លើផលរបរសរុបប្រចាំឆ្នាំដែលត្រូវបង់ក្នុងអំឡុងពេលចាប់ផ្តើមពីថ្ងៃទី ១ មករាដល់ថ្ងៃទី ៣១ ខែមិនាជារៀងរាល់ឆ្នាំ។ សម្រាប់សហគ្រាស ឬ ក្រុមហ៊ុនដែលទើបចាប់ផ្តើមប្រកបអាជីវកម្ម ត្រូវបងពន្ធប៉ាតង់ពេញមួយឆ្នាំ ប្រសិនបើចាប់ផ្តើមប្រកបអាជីវកម្មក្នុងរយៈពេល៦ខែដើមឆ្នាំ ឬបង់ពន្ធប៉ាតង់ពាក់កណ្តាលឆ្នាំ ប្រសិនបើចាប់ផ្តើមប្រកបអាជីវកម្មក្នុងរយៈពេល៦ខែចុងឆ្នាំ។ សហគ្រាស ឬ ក្រុមហ៊ុនដែលមានសាខា ឃ្លាំង រោងចក្រ រោងជាង សម្រាប់មុខរបរអាជីវកម្មតែមួយ នៅក្នុងខេត្ត/ក្រុងតែមួយ មិនចាំបាច់បង់ពន្ធប៉ាតង់ផ្សេងគ្នាទេ។ ប៉ុន្តែបើមានមុខរបរអាជីវកម្មខុសៗគ្នា ឬ ស្ថិតនៅក្នុងខេត្ត/ក្រុងផ្សេងគ្នា ត្រូវបង់ពន្ធប៉ាតង់នៅតាមមុខរបរនីមួយៗ និងទៅតាមខេត្ត/ក្រុងដោយឡែកៗពីគ្នា។
ការកំណត់កម្រិតប្រាក់ពន្ធប៉ាតង់
ការកម្រិតប្រាក់ពន្ធប៉ាតង់ត្រូវបានកំណត់ដូចខាងក្រោម៖
១. អ្នកជាប់ពន្ធតូច ត្រូវបង់ពន្ធប៉ាតង់ប្រចាំឆ្នាំចំនួន ៤០០ ០០០រៀល។
២. អ្នកជាប់ពន្ធមធ្យម ត្រូវបង់ពន្ធប៉ាតង់ប្រចាំឆ្នាំចំនួន ១ ២០០ ០០០រៀល។
៣. អ្នកជាប់ពន្ធធំដែលមានផលរបរ៖
– លើសពី ២ ០០០លានរៀលដល់១០ ០០០លានរៀល ត្រូវបង់ពន្ធប៉ាតង់ប្រចាំឆ្នាំចំនួន ៣ ០០០ ០០០រៀល។
– លើសពី ១០ ០០០លានរៀល ត្រូវបង់ប៉ាតង់ប្រចាំឆ្នាំចំនួន ៥ ០០០ ០០០រៀល។
អ្នកជាប់ពន្ធធំដែលមានសាខា ឃ្លាំង រោងចក្រ រោងជាង សម្រាប់សកម្មភាពអាជីវកម្មតែ មួយដែលស្ថិតនៅតាមរាជធានី-ខេត្តផ្សេងគ្នា ត្រូវបង់ពន្ធប៉ាតង់ចំនួន ៣ ០០០ ០០០ រៀល នៅតាមរាជធានី ខេត្តដែលអាជីវកម្មនោះស្ថិតនៅ។
បង់ពន្ធនៅទីណា?
សហគ្រាស ឬអ្នកជាប់ពន្ធធំ (គម្រោងវិនិយោគដែលមានលក្ខណៈសម្បត្តិគ្រប់គ្រាន់ សាខាក្រុមហ៊ុនបរទេស ឬក្រុមហ៊ុនបរទេស ឬក្រុមហ៊ុនពហុជាតិ សហគ្រាសដទៃទៀត ដែលមានផលរបរប្រចាំឆ្នាំចាប់ពី ១,០០០ លានរៀលឡើងទៅ) ពន្ធប៉ាតង់ត្រូវបង់នៅ នាយកដ្ឋានគ្រប់គ្រងអ្នកជាប់ពន្ធធំ។
សហគ្រាសធុនតូច និងសហគ្រាសធុនមធ្យម ពន្ធប៉ាតង់ត្រូវបង់នៅសាខាពន្ធដារខេត្ត ខណ្ឌ ដែលមានសហគ្រាសនោះស្ថិតនៅ។ ចំពោះ អាជីវកម្មចល័តត្រូវបង់ពន្ធប៉ាតង់នៅ ការិយាល័យ រដ្ឋបាលសារពើពន្ធកន្លែងដែលចុះបញ្ជីអាជីវកម្ម។ អ្នកដែលមានការផ្លាស់ប្ដូរអាជីរកម្ម អ្នកក៏ត្រូវបង់ពន្ធទៅតាមអាជីវកម្មថ្មីរបស់អ្នកដែរ។ ហើយបើចំពោះអ្នកដែលបន្ថែមសកម្មភាពអាជីវម្ម នោះអ្នកក៏ត្រូវបង់ទៅតាមអាជីវកម្មថ្មីដែរ ។
អត្ថបទ៖ ស៊ីចាន់ វណ្ណី
ប្រភព៖ ក្រសួងសេដ្ឋកិច្ច និងហិរញ្ញវត្ថុ
