27/08/2024
ໃນຄັ້ງວັນທີ 23 ສິງຫາ 2024 ຮາກຖານຊາວໜຸ່ມ ພະແນກອຸດສາຫະກໍາ ແລະ ການຄ້າແຂວງສະຫວັນນະເຂດ ໄດ້ເປີດກອງປະຊຸມສະຫຼຸບລາຍງານ ການຈັດຕັ້ງເຄື່ອນໄຫວວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024 ຂຶ້ນ ພາຍໃຕ້ການເປັນປະທານກອງປະຊຸມຂອງ ສະຫາຍ ໄຊຍະເດດ ຜຸຍຍະວົງ ຄະນະພັກຮາກຖານພະແນກ ໂດຍມີສະມາຊິກຊາວຫນຸ່ມເຂົ້າຮ່ວມທັງໝົດ 35 ສະຫາຍ, ຍິງ 15 ສະຫາຍ;
ເຊິ່ງໃນວາລະກອງປະຊຸມ ສະຫາຍ ນາງ ແພງສີ ທອງເພັງ ເລຂາຮາກຖານຊາວໜຸ່ມພະແນກ ໄດ້ຂຶ້ນຜ່ານ ມະຕິຕົກລົງຂອງຄະນະບໍລິຫານງານຊາວໜຸ່ມ ປປລ ແຂວງ ວ່າດ້ວຍການຮັບຮອງເອົາຄະນະຮາກຖານຊາວໜຸ່ມພະແນກ ຊຸດທີ III, ມະຕິຕົກລົງຂອງຄະນະພັກຮາກຖານພະແນກ, ມະຕິຕົກລົງຂອງຄະນະຮາກຖານຊາວໜຸ່ມ ວ່າດ້ວຍການແຕ່ງຕັ້ງ ແລະ ແບ່ງໜ້າທີ່ຄວາມຮັບຜິດຊອບ ຂອງຄະນະຮາກຖານຊາວໜຸ່ມ ແລະ ຄະນະໜ່ວຍທີ່ຂຶ້ນກັບຮາກຖານຊາວໜຸ່ມພະແນກ ອຄ ແຂວງ.
ຈາກນັ້ນ ສະຫາຍ ແສງສັນໄຊ ຂັດຕິຍະວົງ ຮອງເລຂາຄະນະຮາກຖານຊາວໜຸ່ມ ກໍໄດ້ຂຶ້ນຜ່ານບົດສະຫຼຸບວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024, ກອງປະຊຸມຍັງໄດ້ຜ່ານລະບຽບກອງທຶນຊ່ວຍເຫຼືອສະມາຊິກຊາວໜຸ່ມ ເພື່ອໃຫ້ສະມາຊິກໄດ້ປະກອບຄໍາຄິດເຫັນໃສ່ຮ່າງລະບຽບກອງທຶນ ເພື່ອນໍາໄປປັບປຸງທາງດ້ານເນື້ອໃນ ແລະ ລາຍລະອຽດ ໃຫ້ມີຄວາມຖືກຕ້ອງສອດຄ່ອງກັບລະບຽບຫຼັກການ. ຈາກນັ້ນ ຜູ້ເຂົ້າຮ່ວມກອງປະຊຸມກໍໄດ້ຮັບຟັງການໂອ້ລົມຈາກທ່ານປະທານກອງປະຊຸມ ເຊິ່ງທ່ານໄດ້ໃຫ້ຄວາມຄິດເຫັນ ແລະ ທິດຊີ້ນໍາຕໍ່ຄະນະຮາກຖານຊາວໜຸ່ມ ຕະຫຼອດຮອດສະມາຊິກທັງໝົດ ຈົ່ງຕັ້ງໜ້າຝຶກຝົນຫຼໍ່ຫຼອມຕົນເອງໃຫ້ມີຄວາມກ້າວໜ້າ, ເປັນແບບຢ່າງທີ່ດີໃຫ້ແກ່ຊາວໜຸ່ມເຍົາວະຊົນ ແລະ ພ້ອມພຽງກັນຈັດຕັ້ງປະຕິບັດວຽກງານຕາມໜ້າທີ່ ຄວາມຮັບຜິດຊອບຂອງຕົນ ຕາມທິດທາງແຜນການທີ່ໄດ້ວາງໄວ້ ເພື່ອໃຫ້ວຽກງານດັ່ງກ່າວປະສົບຜົນສໍາເລັດ ແລະ ເກີດປະສິດທິຜົນສູງສຸດ.
