30/05/2026
ລາວ-ຫວຽດນາມ ຕົກລົງຮ່ວມມືລົງທຶນກໍ່ສ້າງທາງລົດໄຟ ເຊື່ອມຕໍ່ແຕ່ທ່າເຮືອ ຫວຸ້ງອ່າງ ສສ ຫວຽດນາມ ຫາ ເມືອງທ່າແຂກ ແຂວງຄໍາມ່ວນ
ວັນທີ 29 ພຶດສະພາ 2026 ທີ່ກະຊວງກໍ່ສ້າງ, ນະຄອນຫລວງຮ່າໂນ້ຍ ສສ ຫວຽດນາມ ກອງປະຊຸມພົບປະສອງຝ່າຍ ລະຫວ່າງ ກະຊວງໂຍທາທິການ ແລະ ຂົນສົ່ງ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ກະຊວງກໍ່ສ້າງ ແຫ່ງ ສາທາລະນະລັດ ສັງຄົມນິຍົມ ຫວຽດນາມ. ໂດຍການເຂົ້າຮ່ວມເປັນປະທານ ຂອງທ່ານ ເຫຼັກໄຫຼ ສີວິໄລ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ແລະ ທ່ານ ເຈີນ ຫົງ ມິງ ລັດຖະມົນຕີ ກະຊວງກໍ່ສ້າງ ສສ ຫວຽດນາມ ແລະ ພາກສ່ວນທີ່ກຽວຂ້ອງທັງສອງຝ່າຍເຂົ້າຮ່ວມ.
ກອງປະຊຸມພົບປະສອງຝ່າຍໃນຄັ້ງນີ້, ສອງຝ່າຍໄດ້ປຶກສາຫາລື ຮ່ວມກັນສະຫຼຸບຕີລາຄາ ບັນດາໜ້າວຽກທີ່ໄດ້ມີການຕົກລົງຮ່ວມມືກັນໃນໄລຍະທີ່ຜ່ານມາ ແລະ ໄດ້ມີຄວາມເຫັນເປັນເອກະພາບກັນ ທີ່ຈະຕ້ອງໄດ້ຮ່ວມມືກັນຢ່າງແໜ້ນແຟ້ນ ເພື່ອຊຸກຍູ້ຈັດຕັ້ງປະຕິບັດບັນດາເນື້ອໃນຍຸດທະສາດ ໃຫ້ເປັນຮູບປະທຳ ແລະ ມີປະສິດທິຜົນເປັນຈິງໂດຍໄວ ເປັນຕົ້ນ:
- ໂຄງການກໍ່ສ້າງເສັ້ນທາງດ່ວນ ວຽງຈັນ-ຮ່າໂນ້ຍ,
- ໂຄງການເສັ້ນທາງລົດໄຟລາວ-ຫວຽດນາມ (ທ່າແຂກ-ຫວຸ້ງອ່າງ),
- ການຮ່ວມມືຮອບດ້ານ ຕາມຍຸດທະສາດ 2026-2035,
- ການຍົກລະດັບພື້ນຖານໂຄງລ່າງເສັ້ນທາງເຊື່ອມຕໍ່ລະຫວ່າງແຂວງຊາຍແດນລາວ-ຫວຽດນາມ,
- ຮ່າງຍຸດທະສາດ ວ່າດ້ວຍການຮ່ວມມືດ້ານຄົມມະນາຄົມ-ຂົນສົ່ງ ແລະ ຍົກລະດັບບຸກຄະລາກອນຂະແໜງໂຍທາທິການ ແລະ ຂົນສົ່ງ ສປປ ລາວ.
ສອງຝ່າຍເປັນເອກະພາບກັນມອບໃຫ້ ກົມແຜນການ ແລະ ການເງິນ ຂອງກະຊວງໂຍທາທິການ ແລະ ຂົນສົ່ງ ສປປ ລາວ ແລະ ກົມຮ່ວມມືສາກົນ ຂອງກະຊວງກໍ່ສ້າງ ສສຫວຽດນາມ ເປັນຈຸດປະສານງານ ຢ່າງເປັນປົກກະຕິ ເພື່ອສ້າງແຜນການແລກປ່ຽນ ແລະ ຊຸກຍູ້ການຈັດຕັ້ງຜັນຂະຫຍາຍ ບັນດາເນື້ອໃນກອງປະຊຸມ ທີ່ໄດ້ຕົກລົງເປັນເອກະພາບກັນໃນກອງປະຊຸມ.
ຕອນທ້າຍ, ໄດ້ມີພິທີລົງນາມ ບົດບັນທຶກການພົບປະລະຫວ່າງ ກະຊວງໂຍທາທິການ ແລະ ຂົນສົ່ງ ແຫ່ງ ສປປ ລາວ ແລະ ກະຊວງກໍ່ສ້າງ ແຫ່ງ ສສ ຫວຽດນາມ, ພິທີມອບ-ຮັບ ຂໍ້ຕົກລົງ ລະຫວ່າງ ກຸ່ມບໍລິສັດ ເດວກ້າ ແລະ ບໍລິສັດ ປີໂຕຣລ້ຽມເທຣດດິ້ງ ລາວ ມະຫາຊົນ ກ່ຽວກັບການຮ່ວມມືລົງທຶນກໍ່ສ້າງທາງລົດໄຟເຊື່ອມຕໍ່ແຕ່ທ່າເຮືອ ຫວຸ້ງອ່າງ, ສສ ຫວຽດນາມ ຫາ ຕົວເມືອງທ່າແຂກ, ສປປ ລາວ ຢ່າງຄົບຊຸດ ແລະ ພິທີມອບ-ຮັບ ບົດບັນທຶກຄວາມເຂົ້າໃຈ ວ່າດ້ວຍກນຮ່ວມມື ລະຫວ່າງ ບໍລິສັດ ທີ່ປຶກສາດ້ານເຕັກໂນໂລຊີ, ອຸປະກອນ ແລະ ກວດກາການກໍ່ສ້າງ CONINCO ແລະ ລັດວິສາຫະກິດ ວິສະວະກຳ ຄົມມະນາຄົມ LTEC.
https://laophattananews.com/253814/
#ໜັງສືພິມລາວພັດທະນາ #ຂ່າວພາຍໃນ #ທາງລົດໄຟ
_______________@_______________
ສະໜັບສະໜູນໂດຍ: Maxim
_______________@_______________
ຂ່າວອື່ນໆ >> www.laophattananews.com
Youtube: www.youtube.com/channel/UCfSwYXQ8r6NOMO_vlp7bZYw
Twitter: https://X.com/laophattana
Whatsapp: https://whatsapp.com/channel/0029Va9dcYjHFxPArwc63g17
Tiktok: https://www.tiktok.com/
ສົນໃຈລົງໂຄສະນາໂທ: 020 9999 7139
ຕິດຕໍ່ຫານັກຂ່າວໂທ: 020 2345 0088
