01/01/2024
لما تعرفت عليه فيروز ، قالت : يا أمي ومابعرف ليش نقّاني أنا .
و لمّا حبُّوا بعض ، غنّتلوا : كِبر البحر و بعد السما بحبّك ..
ومن كتر ما حبّته قالت : حبيتك ت نسيت النوم
بعد فترة بلّش يتغير معها ، قالت : شو قالولك يا محبوب؟ مغيّر من شهرين ..
ولمّا بعد عنها أكتر ، رجعت غنّتلوا : بشتقلك ما بقدر شُوفك ولا بقدر إحكيك
*وبعد ما غنّتلوا هالغنيّة ، طلبت من الناس و قالت : سلملي عليه ، وقلّو إني بسلم عليه
لمّا شافت مافي نتيجة ، رجعت غنّت : يا طير يا طاير على طراف الدني ، لو فيك تحكي للحبايب شو بني .
*وهون ضاع منها.
ولمّا ضاع منها ، غنّتلوا : لو بقدر لفتش عليك و لاقيك ، الكذبة، الغيم المارق و المنفى سمّيك .
ومع إنو هوّ ضايع منها ، بس تفاصيله بعدا ببالها و ما نسيت ، غنّتلوا : قلّو عيونو مش فجأة بينتسوا ، ضحكات عيونو ثابتين ما بينقصُوا . !!
وعلى كتر ما هوّ ساكن جواتها، صارت تحلم فيه وغنّتله : من عِزّ النوم بتسرقني؟
*و بالرغم من كل اللي حواليها ، ما كان بدها غيرو ، غنتّ : من بين الكل بتسرقني ، بهرب لبعيد بتسبقني
و لما لسا كان عندها أمل ، غنّتلوا : نطرتك أنا ندهتك أنا رسمتك على المشاوير، يا هم العمر
*قديش كانت مقهورة و موجوعة لمّا قالتله : يا همّ العمر؟.
من كتر ما حنتّله وحنّت لكلشي منه، غنّتلوا : بتودي الحنين ليليّة الحنين , يشلحني بالمنفى بعيونك الحلوين .
و لما عرفت إنّه غاب . و من كتر ما تعذّبت بغيابه ، غنتّ : عُودوا قبل م الجفا يغمر ليالي العمُر
* هون فقدت الأمل .
لمّا فقدت الأمل غنّت : يا خسارة الحُب ، يا خجلِة الأمل .
و بعدها غنّت الوداع وقالت : الله معك يا هوانا يا مفارقنا .. حكم الهوا يا هوانا و افترقنا ، ضلوا تذكّرونا
* بعد فترة رجع ، رجع بدو يشوفها و يحكي معها
شافوا بعض صدفة ..
قالتله : كيفك أنت ملا أنت؟
ردّلها : بعدك على بالي .
قالتله رغم كلشي : و بعدك بقلبي وردة الوردات 🖤
