31/05/2025
قصّتنا مع الوقت،
رح يمرق عليك وقت يكون النّور يلي بحدّد تعاطفك وخيرك وطيبتك بضوّي على عتمة بعض الأشخاص وبحسّسوك إنت الغلط.
رح يمرق وقت مع ناس بيفهموا عَتَبَك عالغلط هوي إنتقاد. بيفهموا كأن الغلط وهنّي واحد. هيك عاشوا وهيك اتّربّوا. رح يجلدوك لأنن جُلدوا.
رح يمرق عليك وقت مع ناس كل ما تقرّب منن في خوف، أشخاص بيهربوا كل ما قرّبت، أشخاص عندن رعب من الإلتزام. العلاقات هجر بالنسبة إلن.
رح يمرق عليك وقت ما بيختاروك رغم اختيارن ليلي ما بيشبهن أو يمكن بيشبهن، ويلي ما بيعطيهن قيمة. بتعرف لي؟ لأن بيختاروا يلي أسهل، يلي ما بضوّي عحقيقتن، يلي ما بوجّع راسن بالحقيقة، يلي بذكرن بالإهمال يلي عاشوا بماضيهن. هيدا المألوف بالنّسبة إلن. بيختاروا أشخاص ما بتحبّن...
رح يمرق وقت تعيش عم تحارب لأشخاص رح يعيدوا معك نمط سام ما بينتهي. رح تصير بمرحلة تسكت عن حقك، تغمّض عيونك، تشوف فُتات الإحترام والمحبّة شغلة كبيرة، لحدّ ما تكسر الوهم والنّمط. لحدّ ما تعرف إنّو الحبّ والتّقدير حقّك، مش جايزة أو فَضِل منن.
رح يمرق وقت عليك مع ناس بتختار رفيق وتقول الحمدالله ما قبلت إلعب هالدّور، هودي ناس بتحوّّل كل مارئ طريق لرفيق بمصلحة القرب والودّ بس أبعاد النيّة مختلفة. وتحت هالنّية الطيبة هالنّاس بزيفوا الحب تحت مُسمّى الرّفقة . هيك أهون. هودي النّاس بيستفيدوا من دون إلتزام. هالنّاس واقفين صوب ميّة جهّة من الطّريق ورح يجربوا يضيعوك معن.
رح يمرق عليك وقت تشوف ناس كانوا يصرخوا من وجعن من وقت نعومة أظافرن وما حدا يردّ علين بس وقت إنت ردّيت عاملوك بنفس وجعن.
رح يمرق عليك وقت مع ناس أسهل تقلّك ما بقدر وما بعرف لأن فعلا ما بدن. قد ما تآمن بصورتن وتحلّيها، رح يضلّوا ضايعين وهربانين من كل العواطف يلي دافنينا جوّاتن.
رح يمرق عليك وقت تكون عم تعطي من كل حالك لناس اخترتن بس عينن بخيارات تاني مفتوحة دايما تحت حجّة ما حدا بيعرف شو بيصير.
رح يمرق عليك وقت تعطي قيمة لناس على قدر ما هُمِلوا وما انعطوا قيمة رح يْدَفعوك الضّريبة إلك.
رح يمرق وقت تسأل كيف بالبداية قِدروا، كيف بأول الطّريق عرفوا يوصلوا صوبك...أول الطّريق ما كان إلّا لعبة، هيدا وهم مش حقيقة.
رح يمرق وقت تصدّق الكذبة عقدر ما كانت الحقيقة واضحة. لحد ما تعرف إنو ما انضحك عليك لأنك إنت كنت الحقيقي!
رح يمرق عليك وقت تزعل عحالك وما تصدّق كيف في عالم ما بتحسّ فيك وبتحس بالضّرر يلي عملوا لحد ما تعرف إنوا مش الكل متلك.
وفي وقت بيمرق رغم العِشرة، في ناس رح تفلّ مش بهدوء بس بدم بارد رغم ضررن وكأن ما عرفوك وكأن هيدا حقن وبيتركوك مع ميّة سؤال براسك بس تأكد إنو الجواب بتعرفوا وهوي جوّاتك.
رح يمرق وقت تفكّر إنو واجبك تغيّر الدّني والأشخاص بس بيجي وقت بتعرف إنو خيار الرّحمة والشّفاء والخير بإيدنا وكل ما ترتقي بوعيك قلبك بضلّ أبيض، هيك إنت بتضلّ تشعّ والإساءة كرمالا بتبيّن عندن أبشع.
رح يمرق عليك وقت تشوف أبشع الأرواح بس كل يلي حولك شايفينن بأجمل صورة.
رح يمرق وقت تشوف النّور بقلب عتمة الأشخاص بس تذكّر المفتاح مش عندك. رح تُدرك إنّوا كلنا عنّا عتمة بس الفرق باختيارك أو تحب أو تكره، أو تؤذي أو تتعاطف.
رح يمرق عليك وقت تتعلّم الخذلان بأكتر من شكل: محادثات مكتوبةومتروكة رغم وجودك، تَخلّي، غَضب، خيانة، قسوة، نقص وعدم تقدير ...
مَرَق الوقت! شِفْت، الوقت بيمرق بس حياتك هيي رحلة بدايتها داخليّة بس وجهتها تصاعديّة!
الوعي رحلة # إنت الوقت #إنت بتختار ما تكون ضحيّة # الصوّت الدّاخلي # حَدسَك مش صدفة # حدسك هوي قوتك
JF.k
