26/07/2026
السلام عليكم
حابه نحكي عالقصة أختي ومرضتها ♥️
أختي في فترة الحمل كانت تابع عند الدكتورة المعروفه مروة الغناي طول فترة حملها في الفتره الاخيره طلبت منها الدكتورة تحاليل كامله للعمليه وكان موعدها معاها عشان تقرر وتختار العيادة اللي دير فيها عمليتها
اختي راجلها طبيعة عمله صعبه اضطر انه يسافر ويمشي للجنوب ويشيلها لهلي في المرج
ومشت عالاساس لدكتورة معروفه باسمها واستشاريه وشالت تحاليلها وأوراقها معاها وللأسف تقرر لأختي عالعملية وكان كل همها الماديات وحياة اختي مش مهمه نهائيا ويوم السبت كان موعدها وتوقع زوجها قبل مايسافر عالاوراق
اختي استئذنت من دكتورتها اللي في بنغازي اللي هيا مروة الغناي ونتفاچئو إنه نسبة الخطورة كبيره جدا كانت في العمليه
وإنه أختي وضعها خطير كانن صفائح الدم نازلات واجد بكل عندها كانن 30
وتقولي الدكتورة بكرا أختك تكون داخل بنغازي وتطلب منها تحاليل كامله وأختي جت ودارت تحاليها في مختبر السليم ونمشو للدكتورة مروة الغناي في مستشفى الطارق
والدكتورة شافت أختي والمختبر يبعتو التحاليل عالوتس لأن نحنا طلبناهن مستعحلات
ونتفاچئو إنه تحاليل أختي نازلات بزياده وكانن 8 كانت صدمة كبيرة لنا وللدكتورة مروة الغناي
وديرلنا الدكتورة التحويل ل1200
ونمشو بأختي يوم السبت الساعه 9 كان الدخول وضع أختي مافيش أي عيادة خاصه تستقبله
مشينا وخشت أختي بورقة من الدكتورة وكانن دكتورات حريصات عالوضعها واختي خشت عالمجموعة B1 والحمد لله من أفضل الدكتورات دكتورة مروة الغناي وإيناس اهليس ووفاء العبار
واختي خشت للعنايه عالطول وكانو دكاترة امراض الدم مشرفين عالوضعها وعالراسهم الدكتورة وفاء الشعاب
كانن أصعب أيام حياتنا وأختي دارت تحاليل من جديد وطلبو صفائح ضروري لوضعها ومن الصعوبة خويا تعب وماحصل الصفائح وطلبنا حتى متبرعين والحمد لله وفرنا مايقارب 20شكارة وبدو لأختي في العلاج
وكانت أختي من الحالات النادرة وكانت عمليتها خطيرة جدا جدا وضروري من تجهيز كامل وبنج كامل وكان استشاري أحمد العقوري هو اللي قام بتحذير الكامل وأختي تحتاج بنج كامل ويكونو دكاترة أمراض الدم معاها ودكاترة القلب
يوم الأربعاء كانت عملية أختي الساعه 9 الصبح
وزوجها روح قبل بعمليتها بيومين تقريبا ووقع عالاوراق العملية وكان حظوره مهم جدا بالنسبة لأختي
وجت الدكتورة مروة الغناي قبل موعد العملية بساعه وهيا اللي كانت عايشه معايا لحظة بلحظه وكانت إنسانه قبل ماتكون دكتورة
خشت أختي للعمليات وكانت خطورة عاليه جدا جدا الصفائح 35ـ40 كانن بعد تركيب الصفائح
وكان احتمال كبير جدا النزيف عندها تحت العمليه
وبفضل من الله ولدعوات الناس اللي دعت لأختي من قلبها وللدكتورة القديره مروة الغناي
تطلع الدكتورة من غرفة عمليات وعيونها فيهن دموع الفرحه وتقولي الحمد لله العمليه نجحت وأختك كويسه والبيبي كويس والحمد لله
كان شعور غريب جداً والحمد لله رب العالمين أكرمنا بفضله
اختي قعدت ساعتين في العنايه وبعدها في الملاحظه وبعدين حطوها في عناية الضغط بس للأسف مافيش اهتمام نهائي من ناحية التمريض والمعاملة سيئة جدا جدا
في ممرضه بس كانت الرحمه فيها اسمها سالمه ربي يجزيها كل خير كانت من 8الليل وللأسف 8الصبح روحت يوم الخميس
أختي وضعها يبي اهتمام وكان في جسمها توبو الدم
جوزها طلعها في مستشفى الطارق وقعدت يومين فيه وبفضل الله والحمد لله اختي طلعت أمس
والبيبي شلناه للدكتورة نجاة غزالي ونخش عليها ونقوولها من طرف دكتورة مروة الغناي ونحكيلها حالة اختي نتفاجئ بمعاملتها الطيبه والجميله ورجعتلنا حتى قيمة الحجز
ودارت لنا تحويل للاطفال وقامو بتحاليل كامله للبنوته
والله الدكاترة اللي فيهم رحمه من النادر في وقتنا هذا والحمد لله اللي ربي طيحنا في الناس اللي فيها رحمه وتخاف من ربي ومهنة الدكتورة مش ماده عندهم وطمنا ربي عالبنوته والحمد لله والشكر لله
أختي وضعها حاليا ضروري من تكون اسبوعين كاملات تحت المراقبه وان شاء الله ربي يحفظها ويشفيها يارب العالمين
ألف شكر والشكر الكبير للدكتورة اللي مهما تقول شويه في حقها مروة الغناي انسانه المتواضعة القديره الطيوبه ربي يحفظك ويسعدك يارب العالمين وربي يجبر بخاطرك يارب العالمين وربي يسعد قلبك يارب العالمين
شكرا لكل دعواتكم لأختي وشكرا للناس اللي وقفت معانا وساندتنا وشكرا وألف شكر للدكتورة Marwa Elghanay
