شركة ونس لنظافة المنازل والمدارس

Home
Libya
Tripoli
شركة ونس لنظافة المنازل والمدارس

في الخدمه من الساعه9صباحاً 0918613583 طرابلس الهضبه طول شارع المطبات عند وصول المندوب متأخر بسبب الإزدحام يتم تعويض الساعات

28/07/2026

كريمه يعطيها الصحه جزء من شغل اليوم

20/07/2026

مساء الخيرات
الأسبوع هادا رابع حريق نسمعو فيه بحكم الناس تطلب في عماله للتنظيف
افصلو السخانات والشواحن وأي شي تقدرو تستغنو عنه والله الوضع يخوف وشهاده لله البوست هادا للتحذير ولاهوا دعايه ولالجذب الانتباه
اللي ناسيه شمعه واللي لحق على الماس الكهربائي وطفاه في أخر لحظه وإللي السخانه وإللي الشحن راشقه وناسيه خليكم حريصيين راهي سرعة انتشار الحريق في هذه الاجواء سريعه جداً
افصلو كل شي زايد وقبل ماتطلعي من حوشك طفي كل شي المكيفات وافصلي الشواحن والكوشه الكهربائيه اللي تشفط في الضي مافيش داعي ليها حالياً وطناجر الضغط الكهربائيه والشوايه الكهربائيه نمشو للناس أثاثهم وحياشهم ضايعه وتبي وقت طويل باش يديرو زي اللي انحرق
أربعه حرائق في ظرف ستة أيام العدد مخيف
ومازال موجة الحر تعتبر في بدايتها
ربي يحفظكم جميعاً

19/07/2026

مساء الخيرات للجميع
موقف طريف اليوم الصراحه وضحكنا أني والزبونه عليه والله لطرافته
اتصلت بيا الساعه اربعه تبي معاونه ضروري وطبعاً في هذا التوقيت كل المندوبين مروحين
قالتلي حطيها في تاكسيي وتوه نخلصه
المهم عطيت للمعاونه الرقم في ورقه وقلتلها وقفي تاكسي وعطيه الرقم المهم التاكسي اتصل بالمدام وخدى الوصف منها
ووصل بالمعاونه بارك الله فيه وحطها المهم قبل مايسكر قال للمدام اللي طالبه المعاونه
اسمعي هادا رقمي أني مانخدمش معاهم راه باش كانها دارتلك عمله ولا خارقه ماتكلمونيش أيوه
بارك الله فيك صاحب التاكسي ههههه
مش للدرجه هادي يامعلم راهو

11/07/2026

أدفأ فكرة اخترعهّا الإنسان حتى الآن هي فكرة البيت ، البيت سَكَن امان و دفء 🧡🪴
صباح الورد للجميع نحن كشركه نساعدوك في نظافة بيتك مدرستك شركتك جنانك ولكن نظافة قلبك 🐍هادي مانقدروش للأسف
كل مانلقى تعليق سلبي أو يسب أو يشتم نخش لصفحته نلقاه إيميل وهمي 🤔وأسماء مُستعاره علاش الغل والحقد والحسد علاش هادي الحرب وحنى نعانو مع العماله ومع الزباين تخش أنت بكل قلب خبيث وأسود تكذب أو تلوح تعليق وتطلع أي إنسان يخدم ويكافح المفروض في تشجيع والخدم من أيام سيدنا سليمان وفي كل بلدان العالم بالك إحنى إللي اخترعناه موضوع المساعدات والفكره مش لأنهم أفارقه ولاموضوع ورق والله العظيم موضوع إنت راقد وغيرك يخدم
أي إنسان ناقصه شي أطلع إخدم وإسترزق وحسن وضعك راهو قذف الناس مش هيزيدك إلا غضب من رب العالمين وياجبل مايهزك ريح
حنى ماشيين بتوفيق من الرزاق وببركة رب العالمين وكلامك وإيميلاتك الوهميه دليل على نجاحنا ولله الحمد ❤️
وسبحان الله في ناس لاتعرفك ولاتعرفها تخش تشكر وتدعي في دعوات خير هذا دليل على قلبها اللي يتمني في الخير للجميع وهذه الناس أسأل الله أن يكون في ميزان حسناتها 🌷

05/07/2026

مساء الورد
البنيه طالعه خدودها حمر ولبستها محدده ونظيفه رجعت كلها سواد في سواد ربي يعاونهم قداش مايتعبو 🌷
اني نحب نحييهم على مجهوداتهم
ملاحظه حنى يسلمو في تلفوناتهم في الشركه بعد ماتروح للمبيت متاعهم تستلمه والصوره حقيقيه وهكي يروحو بناتنا كل يوم لأن في اماكن صايرلها حريق وفي أماكن مسكره بالسنه والسنتين وفي أماكن يبخو في أدويه والزواق هادا ياما ضربلنا لبساتهم
الناس إللي تكذب فينا راهو ماعندنا علاش نكذبو شهاده لله الصوره حقيقيه واني شديتها وصورتهاودرناها بالضحكه ويروحو أحرف من هكي ضفت صورة المحادثه بيني وبين الزبونه مش قلة ثقه ولاكن في اللي يتعمد يخش ويضايقنا بأسلوبه القليل الذوق والتكذيب
شكراً لكل من قال كلمه طيبه والناس الفاضيه تذكر الله وتلغي المتابعه

30/06/2026

شغلنا في فيرست مول قبل الإفتتاح وضروري منها بصمتنا 😂❤️❤️

27/06/2026

آسفه على المنظر
ولكن رجاءاً طلباً وليس أمراً إللي بتعطي للمعاونه ماده قويه للتنظيف تعطيها جوانتي غليظ راهم بشر ويحسو
هذه المعاونه اعطيناها إجازه ثلاثه أيام قابله للتمديد بسبب إن الماده كلت صبعها لين ظفرها تقلع وهذه المشاكل تصادف فينا يومياً احنى نعطو فيهم ولكن يتقطعو وفي اللي ماتقولش للمعاونه إن الماده قويه
ردو بالكم عليهم راهم أمانه عندكم
الحبيبه رقيه ألف لاباس عليك ❤️

26/06/2026

جمعه طيبه ومباركه للجميع
والجمعه يوم يحب فيه كل إنسان يجتمع مع صغاره ويطيبو غدى قنين أهو شوية راحه مع إننا حنى نخدمو يوم الجمعه
بس بسبب بعض الناس إللي عندها اللا مبالاه بأرزاق الناس تظطري تقعدي وتتشحطي في الخدمه ويضيع عليك يومك بدون فائده
الناس إللي تحجز وتأكد على الحجز مره وإثنين وثلاثه والصبح نوصلو لعندك وماترديش وتقولي بنخلص التوصيل وماصار شي
راهو كل حد ويصيرلا ظرف ولاكن في هلبا نماذج زي هكي يحجزو بالإسم وخلاص تمام ويجوك في آخر لحظه يغيرو رأيهم ويكذبو على المندوبين ويقولو إنهم ما أكدوش للساعه طناش في الليل أمس نأكد عليها وفي بدل مانسقدو المعاونات ونروحو نستريحو قعدنا على خاطرهم قريب خمسه عاملات لين اتصلت ناس ثانيه ونسقنا مع المندوبين تاني وبعتناهم وضاع اليوم وتغدينا كيكه وعصير راهو حنى بشر واللامبالاه اللي عندكم مصيبه وكارثه على البشريه إلغي من الليل باش ننظمو امورنا من الليل خمسه عائلات صارتلها ظروف مفاجئه الساعه تسعه وعشره الصبح وفي الليل مأكدين عليهم معقوله يومياً النماذج هذه تصادف فينا وفي اللي تحجز مسائي وتقعد العامله للساعه 2 وبعدها ماتردش وماعادش نقدرو نطلعوها لحد ثاني لان الوقت ضاع 🤔🤔

25/06/2026

لماتنظفو الزجاج اولاً الليفه والصابون قبل كل شي لإزالة الأوساخ اللي انت مش شايفتها والبقع الصغيره والترسبات والخطاط والطلاء وتمسحي بالفوطه
بعد مايجف الزجاج استعملي الملع وفوطه قطنيه أو مناديل جافه وشوفي النظافه ❤️❤️

23/06/2026

مرحبا 🌷
من العشيه وأني نقاوم في نفسي مانبيش نكتب هالبوست بس والله القصه هادي ممكن موجوده في أغلب البيوت ومن الضروري إننا ننصحو بعض
كلمتني مدام كذا مره تبي معاونه للتنظيف وبإصرار كبير وفجأه تلغي ومره وصلت فيها المعاونه ودفعت حقها ورجعتها مع المندوب وأني والله مستغربه بس توقعت إنها خايفه منهم لين كلمتني وشرحتلي وضعها وقالتلي إن زوجها مايحبهمش ولا يحب أي شغاله من أي جنسيه وهيا تستنهز في فرصة يبدا طالع وتجيبها ولما يغير رايه مايطلعش تلغي لانه ديما يهزب فيها ومسميها حاشاكم خامره ومكركبه وماتعرفش تتصرف ومن غير طبعاً مهمله في نفسها طبعاً هذه الزبونه حوشها دورين وعندها أربعه أطفال
المدام فقدت الثقه بنفسها ومش قادره تدير أي كنترول

اني نبي ننصح أي وحده محتاجه مساعده تقولها وهيا واثقه من نفسها انتم بشر ومش ماكينات وطاقه معينه ومش دعايه ولانقوي في اي مدام على زوجها بس هوا لو خليتيه بروحه يوم بس مع الصغار مش هيقدرهم وبيستعين بمساعده وممكن حتى يومياً
واعذرونا لو طلعنا على موضوع النظافه بس في حاجات مستفزه وتبي النصيحه من الجميع بحكم في اللي ماره بالمواقف هاذي قبل

Address

Tripoli

Website

http://facebook.com/wanas noha company

Alerts

Be the first to know and let us send you an email when شركة ونس لنظافة المنازل والمدارس posts news and promotions. Your email address will not be used for any other purpose, and you can unsubscribe at any time.