24/07/2026
На 23 јули 2026 година, во организација на Министерството за здравство и Фондот за здравствено осигурување, со поддршка на Светската здравствена организација (СЗО), се одржа работилницата „Зајакнување на управувањето со боледувањата“, на која беа презентирани анализи, меѓународни искуства и можни насоки за реформирање на системот за управување со боледувањата.
На работилницата учествуваше Светлана Ристовска Антиќ, извршен директор на Организацијата на работодавачи на Македонија (ОРМ), која ги презентираше клучните наоди од анализата на ОРМ за предизвиците со користењето на боледувањата и процесот на прераспоредување на работниците.
Во своето обраќање истакна дека најголем дел од боледувањата се краткотрајни (до 15 дена) и се издаваат од матичните лекари. Анализата на ОРМ, исто така, покажа дека последователното користење на повеќе краткотрајни боледувања претставува честа појава, што создава сериозни организациски и финансиски предизвици за работодавачите.
Како клучни предизвици со кои се соочуваат компаниите беа посочени:
🔹 недостиг на кадар за замена на отсутните работници;
🔹 финансиски товар за компаниите поради исплата на плати и придонеси за време на отсуството;
🔹 прекини во работењето и производството;
🔹 намалена продуктивност и потреба од прераспоредување на останатите вработени.
Како препораки, ОРМ предложи:
✔️ засилена контрола на издавањето на боледувањата од страна на матичните лекари, преку соодветни механизми за верификација и одговорност;
✔️ подобрување на законската регулатива за боледувањата, со цел воспоставување поефикасен, потранспарентен и одржлив систем.
ОРМ ја нагласи потребата од заеднички пристап на институциите, работодавачите и сите засегнати страни, бидејќи само преку соработка може да се изградат решенија што ќе обезбедат фер и функционален систем за боледувања, ќе ги заштитат правата на работниците и истовремено ќе овозможат непречено функционирање и поголема продуктивност на компаниите.
