29/01/2020
🇲🇲 မြန်မာကို ကိုအော့ကယ်မယ် 🇲🇲
=======================
ဘယ်လောက်ပညာတတ်တတ်၊ ဘယ်လောက်နှလုံးရည်ကောင်းကောင်း... ကျနော်တို့ရဲ့ Inner Mind ကို အရှိကိုအရှိအတိုင်း ရိုးရိုးလေးမြင်အောင်ကြည့်လိုက်ရင် ပူးပေါင်းဆောင်ရွက်လိုစိတ် (ဝါ) ကိုအော့မိုင်းဆက် (Cooperative Mindset) နည်းတာကို စိတ်မကောင်းစွာ တွေ့ရမှာဖြစ်ပါတယ်။ သိတယ် နားလည်တယ် သတိထားတယ်... သို့သော် တစ်ခုခုဆိုတာနဲ့ မိမိအရေးပါအရာရောက်စွမ်းဆောင်နိုင်ကြောင်းပြလိုစိတ်က ခေါင်းထောင်လာမယ်၊ မာရာဒိုနာတို့ ပီလီတို့ခေတ်ကလို တစ်ကွင်းလုံးတစ်ယောက်ထဲပတ်ကစားမယ်၊ ပြိုင်ဘက်တစ်သင်းလုံးကို လိမ်မယ်ခေါက်မယ်၊ ဂိုးလည်း ကိုယ်ပဲသွင်းမယ်၊ ကိုယ့်သွင်းဂိုးကြောင့်ပဲ နိုင်ချင်တယ်၊ အောင်မြင်မှုတစ်ခုရဲ့ အဓိကစွမ်းဆောင်နိုင်သူဟာ ကိုယ်ပဲဖြစ်ချင်တယ်။ နိုင်ငံရဲ့ဘယ်ကဏ္ဍပဲကြည့်ကြည့် တကိုယ်တော်ဟီးရိုးတွေပဲများနေပြီး Without team work, Without cooperation...။ ဆိုတော့ကာ... ကျနော်တို့တတွေ ဖြတ်သန်းခဲ့တဲ့ လူ့အဖွဲ့အစည်းနဲ့ ပညာရေးမှာ ဘယ်လိုညီညွတ်မှ ဘယ်လိုပူးပေါင်းဆောင်ရွက်မှ ဘယ်လိုအောင်မြင်မှုတွေရတာ စသဖြင့် တဆင့်စကားတဆင့်ကြားဆုံးမပြောဆိုမှုတွေ၊ ဥပမာဥပမေယျသင်ခန်းစာတွေပြဌာန်း စာတွေကျက်ပြန်ဖြေ ဂုဏ်ထူးတွေထွက်ကြ မဖြေနိုင်တဲ့သူကျနဲ့ စာပဲလှိမ့်သင်နေပြီး လက်တွေ့ပူးပေါင်းဆောင်ရွက်တာဆိုလို့ ဝါစိမ်းနီပြာခရမ်း အလှည့်ကျစာသင်ခန်းသန့်ရှင်းရေးလုပ်တာလောက် သောက်ရေခပ်တာလောက်ပဲ ရှိပါတယ်။ ဒါတောင် လာတဲ့သူလာ မလာတဲ့သူမလာ။ အခု ပညာရေးကဏ္ဍရဲ့ မဟာဗျူဟာမြောက်ပြောင်းလဲမှုစီမံကိန်း သင်ရိုးသစ်စနစ်သစ်တွေမှာဆိုရင် ငြိမ်းချမ်းစွာအတူယှဥ်တွဲနေထိုင်ရေး၊ စည်းလုံးညီညွတ်ရေး၊ ပူးပေါင်းဆောင်ရွက်တတ်မှုအလေ့အထတွေကို ရည်ရွယ်တဲ့ Lessons, Activities, Group Works တွေကို ကျောင်းသားလည်းစိတ်ဝင်စားစေ၊ ခေတ်လည်းမီစေ၊ မြန်မာ့ဓလေ့စရိုက်နဲ့လည်းအံဝင်စေ (UN+JICA)အကူအညီအကြံပေးမှုတွေနဲ့ နိုင်ငံတော်၏အတိုင်ပင်ခံပုဂ္ဂိုလ်ဦးဆောင်ကာ ရေးဆွဲဲပြဌာန်းထားတာကို တွေ့ရပါတယ်။ ဒီအကျိုးဆက်ကို ခံစားရဖို့ အနည်းဆုံးအနှစ်(၂၀)လောက် စောင့်ရမှာပါ။ ဒီကြားထဲမှာ ပညာရေးစနစ်မတူ Mindset ကွဲပြားစွာကြီးပြင်းလာတဲ့မျိုးဆက်နဲ့ ကျနော်တို့ခွေးမြီးကောက်မျိုးဆက်နဲ့ ပွတ်တိုက်မှုတွေရှိလာမယ်။ New Gen ရဲ့ Mindset ကောင်းလေလေ၊ Gen Gap ကြီးလေလေ ပွတ်တိုက်မှုပိုကြီးလေလေ ဖြစ်လာဖို့တွေရှိမယ်လို့ ယူဆပါတယ်။ ပဋိပက္ခလေးတွေရှိလာရင်... အရင်လိုပဲ နားလည်မှုနိမ့်ပါးစွာနဲ့ နောက်မျိုးဆက်ကို အထင်အမြင်သေးနှိပ်ကွပ်နေဦးမယ်ဆိုရင်... ပျော်ပျော်ကြီးဆက်တိုးကြတာပေါ့ ပြာပုံကို...။ ဒါကတစ်ပိုင်း... နောက်တစ်ပိုင်းက ကျနော်တို့မိဘဆရာတွေက စာမေးပွဲဖြေရတဲ့ဘာသာရပ်ပဲအလေးထားပြီး ကျန်တာတွေကို အပိုတွေပါကွာဆိုရင်တော့ ကိုယ့်ကြမ္မာကိုယ်ငင်တာပါပဲ။ (UN+JICA)ပဲ ကူညီပြုပြင်ပေးထားတဲ့ ပညာရေးစနစ်ရဲ့အသီးအပွင့်ခံစားနေရပြီဖြစ်တဲ့ ထိုင်းနိုင်ငံနဲ့ လက်ရှိကိုယ်တွေအနေအထားနဲ့ စိတ်ထဲမှာ နှိုင်းယှဉ်ကြည့်ကြပေါ့။ ကျောင်းသား၊ မိဘ၊ ဆရာ... ပညာရေးစနစ်သစ်ကို ယုံကြည်ဖို့လိုပါတယ်၊ ပူးပေါင်းပါဝင်ဖို့လိုပါတယ်။ ကျနော်တို့အားလုံး အမျှော်အမြင်ကြီးကြီးနဲ့ ယုံယုံကြည်ကြည်ဝိုင်းကြိုးစားကြမှ လူ့အဖွဲ့အစည်းမှာတကိုယ်တော်ခြေစွမ်းပြနေတဲ့ Hero တွေကိုအားကိုးနေတာထက် ပိုထိရောက်တဲ့ တာဝန်သိစိတ်နဲ့ ပူးပေါင်းဆောင်ရွက်တတ်တဲ့လူ့အဖွဲ့အစည်း (Cooperative Society) ဖြစ်ထွန်းလာမှာပါ။ လူသန်းချီက ပစ်လိုက်တဲ့လမ်းဘေးအမှိုက်ကို Hero တစ်ယောက်နှစ်ယောက်လိုက်ကောက်နေလို့ အလုပ်မဖြစ်ပါဘူး၊ လူတိုင်း လမ်းဘေးအမှိုက်မပစ်မှ အလုပ်ဖြစ်မှာပါ။ Power of Cooperation ကြောင့် မျှော်မှန်းတာထက် အဆပေါင်းများစွာ ခရီးပေါက်သွားနိုင်ပါတယ်။ "WOW" ဆိုပြီး ကိုယ့်ရှေ့ကနိုင်ငံတွေကို နေ့ချင်းညချင်းကျော်မသွားဘူးလို့ မပြောနိုင်ပါဘူး။ ဟုတ်ကဲ့ မြန်မာပြည်ကြီး အဓွန့်ရှည်ပါစေခင်ဗျာ...။
ဒီပါအောင် ပညာရေးဘော်ဒါ (ပြင်ဦးလွင်)
09443935511, 09443935522 ။
