22/08/2026
အိမ်ခြံမြေရောင်းမယ့်သူတွေ အမြတ်ငွေအပေါ် ၁၀ ရာခိုင်နှုန်း ဝင်ငွေခွန်ပေးဆောင်ရမယ့်အပြင် အခွန်ကင်းရှင်းကြောင်း ထောက်ခံချက် လိုမည်
စက်တင်ဘာ ၁ ရက်ကစပြီး အိမ်၊ ခြံ၊ မြေ၊ တိုက်ခန်းတွေကို ရောင်းချပြီး အမြတ်ရရှိပါက အဲဒီအမြတ်ငွေအပေါ် ၁၀ ရာခိုင်နှုန်း ဝင်ငွေခွန်ပေးဆောင်ရမယ်လို့ ပြည်တွင်းအခွန်များဦးစီးဌာနက အသိပေးလာပါတယ်။
တစ်နှစ်အတွင်း အိမ်၊ ခြံ၊ မြေ၊ တိုက်ခန်း စတဲ့ အခြေပစ္စည်းတွေကို ရောင်းချ၊ လဲလှယ် ဒါမှမဟုတ် လွှဲပြောင်းမှုကနေ ရရှိတဲ့ တန်ဖိုးစုစုပေါင်းဟာ ကျပ်သိန်း ၁၀၀ ကျော်ပြီး အမြတ်လည်းရှိတယ်ဆိုရင် ရောင်းချတဲ့နေ့ကနေ ရက် ၃၀ အတွင်း သက်ဆိုင်ရာအခွန်ရုံးမှာ ဝင်ငွေကြေညာလွှာတင်ပြီး အခွန်ပေးဆောင်ရမှာဖြစ်ပါတယ်။
အခွန်တွက်ရာမှာ ရောင်းဈေးကို တိုက်ရိုက်အခွန်ကောက်တာမဟုတ်ဘဲ သက်ဆိုင်ရာအဖွဲ့က သတ်မှတ်ပေးတဲ့ ကာလတန်ဖိုးထဲက မူလဝယ်ယူခဲ့တဲ့တန်ဖိုးနဲ့ ရောင်းချနိုင်ဖို့ ကုန်ကျခဲ့တဲ့ သာမန်စရိတ်တွေကို နုတ်ပြီး ကျန်ရှိတဲ့ အမြတ်ငွေအပေါ် ၁၀ ရာခိုင်နှုန်း အခွန်ကောက်ခံမှာဖြစ်ပါတယ်။
ဥပမာ အိမ်တစ်လုံးကို မူလက သိန်း ၁,၀၀၀ နဲ့ ဝယ်ထားပြီး ပြန်ရောင်းတဲ့အခါ သတ်မှတ်တန်ဖိုးအရ သိန်း ၁,၅၀၀ ဖြစ်တယ်ဆိုရင် ဝယ်ယူတန်ဖိုးနဲ့ သက်ဆိုင်ရာကုန်ကျစရိတ်တွေကို နုတ်ပြီး ကျန်တဲ့အမြတ်ပမာဏအပေါ် အခွန်တွက်မှာဖြစ်ပါတယ်။
ဒါ့အပြင် ၂၀၂၆ ခုနှစ် စက်တင်ဘာ ၁ ရက်ကစပြီး အိမ်၊ ခြံ၊ မြေ၊ အဆောက်အအုံနဲ့ တိုက်ခန်းတွေကို ဝယ်ယူ/ရောင်းချပြီး အမည်ပြောင်းမှတ်ပုံတင်တဲ့အခါ ရောင်းချသူဘက်က အခြေပစ္စည်းရောင်းချမှုနဲ့ ပတ်သက်ပြီး အခွန်ကင်းရှင်းကြောင်း ထောက်ခံချက် တင်ပြနိုင်မှသာ အမည်ပြောင်းလုပ်ငန်းစဉ် ဆောင်ရွက်ပေးသွားမယ်လို့ သိရပါတယ်။
ဒါကြောင့် အိမ်၊ ခြံ၊ မြေ၊ တိုက်ခန်း ရောင်းချမယ့်သူတွေအနေနဲ့ ရောင်းချမှုအပေါ် မြတ်စွန်းငွေရှိ/မရှိ သက်ဆိုင်ရာအခွန်ရုံးမှာ စိစစ်ခံယူပြီး အခွန်ကင်းရှင်းကြောင်း ထောက်ခံချက်ကို ကြိုတင်ရယူထားဖို့ ပြည်တွင်းအခွန်များဦးစီးဌာနက အသိပေးထားပါတယ်။
