04/10/2022
အခုနေသာ ငါသေသွားခဲ့ရင်
~~~~~~~~~~~~~~~~
တစ်လမှာ ရက်ပေါင်း(၃၀)လုံး....
သားရေး သမီးရေး
စီးပွားရေး လူမှုရေးတွေနဲ့ပဲ
နေတဲ့ ပုဂ္ဂိုလ်တွေကို
မေ့နေတဲ့ ပုဂ္ဂိုလ်တွေလို့ ခေါ်တယ်
ကိုယ့်ကိုယ်ကို
နစ်မှန်းမသိ နစ်နေတဲ့ ပုဂ္ဂိုလ်တွေပေါ့
ကိုယ့်အတွက် ကိုယ် နေ့စဉ်နေ့တိုင်း
ဒါန ပြုရဦးမယ်...
သီလ စောင့်ရဦးမယ်...
သမထ ဝိပဿနာတွေ
ပွားများ အားထုတ်ရဦးမယ်
ဒီအလုပ်တွေကို
နေ့စဉ် လုပ်နေတဲ့ ပုဂ္ဂိုလ်တွေဟာ
သတိရှိတဲ့သူတွေ
ကိုယ့်ကိုယ်ကို ဆယ်တဲ့ ပုဂ္ဂိုလ်တွေဖြစ်တယ်
အဲဒီလို မဟုတ်ပဲနဲ့
အလုပ် ရှုပ်တဲ့အကြောင်း ...
အလုပ် မဟုတ်တဲ့ အကြောင်းတွေနဲ့ ရှုပ်ပွနေကြပြီး
တစ်နေ့ တစ်နေ့ ဘုံဆိုင် အလုပ်တွေနဲ့ပဲ
အသက် ကြီးနေကြတာ....
အိုရမယ် အမှန်....
- နာရမယ် အမှန်....
- သေရမယ် အမှန်....
သေရေးကို....
ဘယ်လို ရင်ဆိုင်ကြမှာလဲ...
မဖြစ်မနေတော့ ရင်ဆိုင်ကြရတော့မယ်
ကောင်းမှုကုသိုလ် သုစရိုက်တွေပြုပြီး....
ရင်ဆိုင်ကြမှာလား?....
မကောင်းမှုအကုသိုလ် ဒုစရိုက်တွေလုပ်ပြီး....
ရင်ဆိုင်ကြမှာလား?
ဒီနေရာမှာ ကောင်းမှုကုသိုလ်ဆိုတာ ...
အခံတရား လှေနဲ့ တူတယ်...
မကောင်းမှု အကုသိုလ်ဆိုတာ...
ဝန်ထုပ်ဝန်ပိုးနဲ့ တူတယ်...
ကောင်းမှုကုသိုလ် နည်းနည်းလုပ်ရင် ....
လှေငယ်ငယ်နဲ့ တူတယ်....
မကောင်းမှု အကုသိုလ် နည်းနည်းပဲ လုပ်ရင်
ဝန်ပေါ့တယ်
ဒီတော့ လှေကိုပဲ ကြီးအောင် လုပ်မလား?...
ဝန်ကိုပဲ များအောင် တင်မလား?....
ဝန်လေးတာနဲ့အမျှ ဝန်မနိုင်ရင် နစ်သွားမယ်
လှေကြီးကြီးနဲ့ ဝန်ပေါ့ကလေးသာ တင်မိတယ်
ဆိုရင်တော့ -...
မသိမသာ ဝန်ကလေးမို့
လှေဟာ ပေါလော ပေါ်နေမယ်
သေခါနီးကာလမှာ
ကံရယ် ကမ္မနိမိတ်ရယ် ဂတိနိမိတ်ရယ်ဆိုပြီး
နိမိတ် သုံးမျိုး လာပါတယ်
ဒီမှာ ကံဆိုတာက
မိမိတို့ ဘဝတစ်လျှောက် ပြုခဲ့တဲ့...
ကောင်းမှု မကောင်းမှု ကံတွေပါ...
အဲဒီကံတွေထဲက တစ်မျိုးမျိုးသော ကံက.
အနာဂတ်ဘဝ နောက်ဘဝ
ပဋိသန္ဓေ ဇာတိကို ဖြစ်စေမယ့်ကံ...
အဲဒီကံကလည်း သေခါနီးကာလမှာ
ထင်ဟပ် လာတတ်ပါတယ်...
မိမိ ဘဝတစ်လျှောက်....
ကောင်းတဲ့ သုစရိုက်တွေ ပြုခဲ့ရင်
ကောင်းကျိုး ပေးပြီး...
မကောင်းတဲ့ ဒုစရိုက်တွေ လုပ်ခဲ့ရင်....
မကောင်းကျိုး ပေးမှာပါ...
ဒါဖြင့် ကောင်းကျိုးအတွက်....
- ဒါနကုသိုလ်....
- သီလကုသိုလ်....
- ဘာဝနာကုသိုလ်တွေကို လုပ်ထားဖို့ မလိုဘူးလား...
ဒါန သီလ သမထလောက်နဲ့ပဲလည်း ...
မတင်းတိမ်ကြပါနဲ့နော်...
ဝိပဿနာဘက်ကို ဦးစားပေးလုပ်ကြပါ...
မအားဘူးဆိုပြီး....
ဟိုနေ့ရွှေ့ဒီနေ့ရွှေ့လုပ်မနေကြပါနဲ့
သေခြင်းတရားဆိုတာ
မအားသေးတာကို မစောင့်ဘူး.
ကနေ့ သေတဲ့ မသာတွေ အားလို့ သေတယ်ဆိုတာ...
တစ်ယောက်မှ မရှိဘူးနော်...
ဇာတိရရင် သေရမှာ အမှန်သိရက်နဲ့...
ဇာတိ တစ်ဖန်ရဖို့ ကြိုးစားခြင်းဟာ ....
သေဆေး ဖော်စားနေကြခြင်း ဖြစ်တယ်...
အားမှ လုပ်မယ် အားမှ လုပ်မယ် ဆိုပြီး...
အားရက် စောင့်မယ်ဆိုလို့ရှိရင်....
အခေါင်းထဲ ဝင်တဲ့နေ့ပဲ...
ဒါကြောင့် အားရက်ကို မစောင့်နဲ့တော့...
ဒီကနေ့သည် ကိုယ့်အတွက်
မနက်ဖြန်သည် ကိုယ့်အတွက် မဟုတ်ဘူးလေ...
အနာဂတ်ဆိုတာ မသေချာဘူးတဲ့....
ကွေးသောလက် မဆန့်ခင် ....
ဆန့်သောလက် မကွေးခင် ဆိုသလို....
ဒီည သေသွားရင် ဘယ့်နှယ်လုပ်မလဲ...
ကိုယ်ကျိုး မနည်းဘူးလား...
ဒါကြောင့် အသင့်ပြင်ထားကြပါ...
❁ အပ်ပမာဒနေ သမ်မာဒထေ ❁ ဖြူသဲ မေတ္တာဖြင့်ပြန်လည်မျှဝေပါသည်။
