08/08/2025
တာစတီဂန်ကို အသင်းခေါင်းဆောင်အဖြစ်မှ ဖယ်ရှားကာ အရူဂျိုကို ယာယီအသင်းခေါင်းဆောင်အဖြစ် ဘာစီလိုနာ ခန့်အပ်လာ
====================
ဘာစီလိုနာဟာ ဂျာမနီလက်ရွေးစင်ဂိုးသမားမာ့ခ်အင်ဒရေတာစတီဂန်ကို စည်းကမ်းချိုးဖောက်မှုအတွက် စုံစမ်းစစ်ဆေးမှု ပြုလုပ်ပြီးနောက် အသင်းခေါင်းဆောင်အဖြစ်မှ ဖယ်ရှားလာပါတယ်။
အသက် ၃၃ နှစ်ရှိ ဂိုးသမားဟာ ဇူလိုင်လနှောင်းပိုင်းတုန်းက ကျောဒဏ်ရာခွဲစိတ်ကုသမှု ပြုလုပ်ခဲ့သူ ဖြစ်ပါတယ်။
ဒါပေမဲ့ သူဟာ ကျောဒဏ်ရာအား ခွဲစိတ်ကုသမှုနှင့်ပတ်သက်ပြီး ဆေးဘက်ဆိုင်ရာအချက်အလက်များအား ဘာစီလိုနာအား မျှဝေရန် ပျက်ကွက်ခဲ့ပါတယ်။
ဘာစီလိုနာဟာ ဘဏ္ဍာရေးပြဿနာကြောင့် အသုံးစရိတ်ကန့်သတ်ခံထားရပြီး တာစတီဂန် အနားယူမှုအပေါ် မူတည်ကာ ကစားသမားသစ်မှတ်ပုံတင်ရေး လုပ်ဆောင်ရပါမယ်။
တာစတီဂန်က ၎င်းမှာ ကျောဒဏ်ရာခွဲစိတ်ကုသမှုကြောင့် သုံးလကြာ အနားယူရမည်ဖြစ်ကြောင်း ဆိုထားပါတယ်။ လာလီဂါဥပဒေအရ ကစားသမားတစ်ဦးအား အနည်းဆုံး ၄ လအထိ အနားယူမှသာလျှင် ကလပ်အနေဖြင့် ကစားသမားသစ်မှတ်ပုံတင်ရေး လုပ်ဆောင်နိုင်ပါမယ်။
ဘာစီလိုနာဟာ ယခုနွေရာသီတွင် အက်စ်ပန်ညိုမှ ဂိုးသမားဂျိုအန်ဂါစီယာနှင့် ယူနိုက်တက်တိုက်စစ်မှူးမားကပ်စ်ရက်ဖို့ဒ်တို့အား ခေါ်ယူထားပါတယ်။
ယခုအခါ ဘာစီလိုနာဟာ တာစတီဂန်ကို အသင်းခေါင်းဆောင်အဖြစ်မှ ဖယ်ရှားကာ ဒုတိယအသင်းခေါင်းဆောင်အရူဂျိုအား ယာယီအသင်းခေါင်းဆောင်အဖြစ် ခန့်အပ်လာပါတယ်။
တာစတီဂန်ဟာ ၂၀၁၄ ခုနှစ်တွင် မိုချင်ဂလက်ဘတ်မှ ပြောင်းလာပြီးနောက် ဘာစီလိုနာအတွက် ပွဲပေါင်းလေးရာကျော်ကစားထားပြီး ချန်ပီယံလိဂ်ဖလား ၁ ကြိမ်၊ လာလီဂါဖလား ၆ ကြိမ် ဆွတ်ခူးထားပါတယ်။
