10/02/2021
ဆိုက်ဘာဥပဒေကို စက္ကူစုတ်ဖြစ်အောင်လုပ်ကြ
ဒီရက်ပိုင်းမှာ စစ်အာဏာရှင်အစိုးရက တိတ်တဆိတ်လုပ်ဆောင်နေတဲ့ ဆိုင်ဘာလုံခြုံရေးဆိုင်ရာ ဥပဒေမူကြမ်းဆိုသော စာစုတစ်ခုဟာ Social Media မှာ ကျယ်ကျယ်ပြန့်ပြန့် ထွက်ပေါ်လာခဲ့ပါတယ်။ ဒီဥပဒေမူကြမ်းဆိုသော စာထဲက ပုဒ်မတွေဟာ ဆိုက်ဘာလုံခြုံရေးအတွက်လို့ ဆိုစေကာမူ တကယ့်လက်တွေ့မှာတော့ လူ့အခွင့်အရေးကို ပြင်းထန်စွာ ဖောက်ဖျက်ပြီး ရေးဆွဲထားတဲ့ အရာတစ်ခုဆိုတာ သေချာနေပါတယ်။ အဲ့ဒါကြောင့် ဒီဥပဒေမူကြမ်းဆိုသော စာထဲမှာ ဘယ်လို ပုဒ်မတွေက လူ့အခွင့်အရေးကို ဆန့်ကျင်ဖီဆန်နေလဲဆိုတာကို အသေးစိတ်ဖော်ပြပေးသွားပါမယ်။
ဥပဒေမူကြမ်းဆိုသော စာရဲ့ အခန်း၁၊ ပုဒ်မ ၂(က၊ခ) တွေမှာ ပြည်တွင်းပြည်ပဆက်သွယ်မှု၊သဘောတူညီမှု၊ သတင်းအချက်အလက်ဖလှယ်မှုနဲ့ စီးပွားရေး၊ အီလက်ထရောနစ်၊ ဆိုက်ဘာအရင်းအမြစ် ဆိုင်ရာ ပူးပေါင်းဆောင်ရွက်မှုတွေကို တားမြစ်ထားတဲ့အချက်တွေပါဝင်နေပါတယ်။ ဒီလို ပုဒ်မတွေဟာ မြန်မာနိုင်ံငံအတွင်းမှာ လုပ်ကိုင်နေတဲ့ INGO, NGO, Game Streamers, Investment , IT စတဲ့ နယ်ပယ်တွေတော်တော်များများကို ထိခိုက်စေနိုင်တဲ့ အပြင် လူမှုကွန်ယက်ပေါ်မှာ သတင်းဖြန့်ဝေမှုတွေကိုပါ တရားမဝင်တဲ့ သဘောမျိုးကို ဆောင်နေပါတယ်။ ဥပဒေမူကြမ်းဆိုသော စာရဲ့ အခန်း၉၊ ပုဒ်မ ၂၈(က) မှာဆိုရင် မြန်မာနိုင်ငံတွင်း အွန်လိုင်း ဝန်ဆောင်မှုပေးတဲ့ သူတွေအနေနဲ့ အသုံးပြုသူတွေရဲ့ အချက်အလက်တွေကို သိမ်းဆည်းမယ်ဆိုရင် အဲ့ဒီ သိမ်းဆည်းမယ့် စက်ပစ္စည်းတွေကို အာဏာရှင် ဝန်ကြီးဌာနက သတ်မှတ်တဲ့နေရာမှာပဲ ထားရပါမယ်ဆိုတဲ့ အချက်ကို အတိအလင်းရေးဆွဲထားပါတယ်။ ဒါဟာ အင်တာနက်သုံးစွဲသူတွေရဲ့ အချက်အလက်တွေမတရား သိမ်းဆည်းတာဖြစ်ပြီး လူတစ်ယောက်ရဲ့ အခွင့်အရေးကို ဖောက်ဖျက်တယ်ဆိုတာ ငြင်းစရာမရှိပါ။
ထိုနည်းတူစွာ အခန်း၉၊ ပုဒ်မ ၃၀ မှာ မြန်မာနိုင်ငံတွင်း ဝန်ဆောင်မှုပေးတဲ့သူတွေအနေနဲ့ ဝန်ဆောင်မှုအသုံးပြုသူတွေရဲ့ အမည်၊ Internet Protocol (IP) Address၊ ဖုန်းနံပါတ်၊ စိစစ်ရေးကတ်ပြားအမှတ်၊ နေရပ်လိပ်စာတွေ အပါအဝင် အသုံးပြုမှုမှတ်တမ်းတွေကိုပါ ဝန်ဆောင်မှုစသုံးတဲ့နေကစလို့ သုံးနှစ်အထိ ထိန်သိမ်းထားရမယ်ဆိုတဲ့ ပုဒ်မကို ရေးဆွဲထားတာတွေ့ရပါတယ်။ ဒါကြောင့် ဒီပုဒ်မ ၃၀ ဟာ အင်တာနက်သုံးစွဲသူရဲ့ လွတ်လပ်မှုကို ပြင်းပြင်းထန်ထန် ထိခိုက်စေရုံသာမက လူတစ်ယောက်ရဲ့ အချက်အလက်တွေကို ဥပဒေဆိုတဲ့စကားနဲ့ မတရားခြိမ်းခြောက်ရယူနေတဲ့ သဘောပဲ ဖြစ်ပါတယ်။
ဆိုက်ဘာလုံခြုံရေးဆိုင်ရာ ဥပဒေမူကြမ်းဆိုသောစာမှာ အခန်းပေါင်း ၁၇ ခန်း ပါဝင်နေပြီး အင်တာနက်သုံးစွဲသူတွေရဲ့ လွတ်လပ်ခွင့်နဲ့ အချက်အလက်တွေကို မတရားရယူနိုင်ဖို့ အစီအစဉ်တွေကို ချမှတ်ရေးဆွဲထားပါတယ်။ နိုင်ငံတော်တည်ဆောက်ရေးမှာ အရေးကြီးတဲ့ သတင်းအချက်အလက်တွေ၊ ဆိုက်ဘာအရင်းအမြစ်တွေကို လုံခြုံစွာ သိမ်းဆည်းဖို့၊ အများပြည်သူရဲ့ ကိုယ်ရေးအချက်အလက်တွေကို ဥပဒေနဲ့ အညီကာကွယ်ပေးဖို့ စတဲ့ ရည်ရွယ်ချက်တွေကြောင့် ဒီလို သူတို့ဥပဒေလို့ခေါ်သောအရာကို ကောင်အထည်ဖော်ဖို့လုပ်နေပေမယ့် တကယ့် လက်တွေ့မှာတော့ ဥပဒေဆိုတဲ့စကားကို ခုတုံးလုပ်ပြီး ပြည်သူရဲ့ အချက်အလက်တွေ၊ အခွင့်အရေးတွေကို ဝါးမြိုဖို့ လုပ်ဆောင်ချက်တစ်ရပ်သာဖြစ်ပါတယ်။
ဒီဥပဒေကို လက်တွေ့အကောင်အထည်ဖော်လိုက်မယ်ဆိုရင် မြန်မာနိုင်ငံကလူထုဟာလည်း မြောက်ကိုးရီးယား၊ တရုတ်တို့လို Youtube မကြည့်ရ၊ Google သုံးမရတဲ့ ဘဝကို နေ့ချင်းညချင်းရောက်သွားမှာဖြစ်ပါတယ်။
ဘယ်လိုတုံ့ပြန်ကြမလဲ?
ပထမဆုံးမေးခွန်းထုတ်ရမှာက မင်းအောင်လှိုင်ဦးဆောင်တဲ့ အာဏာသိမ်းစစ်တပ်မှာ ဒီလို ဥပဒေထုတ်နိုင်တဲ့ တရားဝင်မှု (legitimacy) ရှိလား ဆိုတာကိုပဲဖြစ်ပါတယ်။ ရှင်းရှင်းပြောရရင် ပြည်သူတွေအနေနဲ့ မင်းအောင်လှိုင်ဦးဆောင်တဲ့ အာဏာရူးတစ်စုကို တရားဝင်အစိုးရအဖြစ် အသိအမှတ်မပြုပါဘူး။ အဲတာကြောင့်လည်း Civil Disobedience Movement (CDM) တွေ လုပ်နေကြတာပါ။ ဆိုတော့ ဒီလို ပြည်သူ့ဆီက တရားဝင်မှုမရတဲ့ အစိုးရကထုတ်တဲ့ ဥပဒေဟာလည်း တရားမဝင်ပါဘူး။ တရားမဝင်တဲ့အစိုးရရဲ့ တရားမဝင်တဲ့ဥပဒေကို ဘယ်လိုတုံ့ပြန်ရမလဲဆိုတာကတော့ ရှင်းပါတယ်။ ဒီနေရာမှာလည်း Civil disobedience ဖြစ်တဲ့ CDM ကိုပဲ သုံးရပါမယ်။ CDM မှာ အလုပ်မသွားရုံတင်မကဘဲ ဒီလို မတရားအစိုးရရဲ့ မတရားဥပဒေတွေ၊ မတရားအမိန့်တွေကို မလိုက်နာတာတွေလည်း အကျုံးဝင်ပါတယ်။ ဆိုတော့ ဒီဆိုက်ဘာဥပဒေကိုလည်း အသိအမှတ်မပြုဘဲ မလိုက်နာဖို့အရေးကြီးပါတယ်။ အင်တာနက်အသုံးပြုပြီး စစ်အာဏာရှင်တွေကို ဆန့်ကျင့်တဲ့အရေးအသားတွေ၊ ပုံရိပ်တွေ ထပ်လုပ်နေဖို့လိုပါတယ်။ မြန်မာနိုင်ငံက facebook သုံးတဲ့သူအများစုကသာ ဒီလို သူတို့ဥပဒေကို မလိုက်နာကြတဲ့အခါ အဲ့မလိုက်နာသူအများစုကြီးကို အကုန်လိုက်ဖမ်းနိုင်မှာမဟုတ်ပါဘူး။ အဲ့ထဲက တစ်ချို့ကိုဖမ်းတယ်ဆိုရင်လည်း ကျန်တဲ့ အင်တာနက်အသုံးပြုပြီး ဆန့်ကျင်သူအများစုက မိမိတို့ကိုပါဖမ်းဖို့ ဝိုင်းပြောကြပါ။ သံပုံးတီးသလိုပါပဲ။ လူသာညီရင် ဒီလူတွေအကုန်လုံးကို သူတို့မဖမ်းနိုင်ပါဘူး။ သူတို့လက်လျှော့ရပါလိမ့်မယ်။ ဒီလိုမဟုတ်ဘဲ ဆိုက်ဘာဥပဒေကိုကြောက်ပြီး စစ်အာဏာရှင်ဆန့်ကျင်ရေးတွေ အင်တာနက်ထက်မှာဆက်မလုပ်ကြတော့ဘူးဆိုရင်တော့ စစ်အာဏာရှင်တွေအကြိုက်ဖြစ်သွားပါလိမ့်မယ်။
ဒါဟာ ရေရှည်တိုက်ပွဲဖြစ်တယ်။ End game ဖြစ်တဲ့ ၂၀၀၈ ဖွဲ့စည်းပုံအခြေခံဥပဒေနဲ့အတူ စစ်အာဏာရှင်စနစ်ကို အမြစ်ဖြတ် ချေမှုန်းပြီး စစ်မှန်တဲ့ဒီမိုကရေစီကိုဖော်ဆောင်နိုင်တဲ့အထိ သွားဖို့လိုပါတယ်။ အဲကိုသွားတဲ့လမ်းတစ်လျှောက်မှာ ဒီဆိုက်ဘာဥပဒေလိုဟာမျိုးတွေလည်း ထပ်ပေါ်လာပါလိမ့်ဦးမယ်။ ကျွန်တော်တို့ကိုင်ရမယ့် လက်နက်ကတော့ CDM ပါပဲ။ သူတို့ရဲ့အမိန့်တွေ၊ ဥပဒေတွေတိုင်းကို ဖီဆန်ကြပါ။ Civil disobedience လုပ်ကြပါ။ လူသာညီရင် သူတို့ ဆိုက်ဘာဥပဒေဟာ စက္ကူစုတ်သက်သက်သာဖြစ်သွားပါလိမ့်မယ်။
