14/08/2025
အသက် ၄၀ ကျော်ဒီဇိုင်နာဘဝ
လက်ရှိမှာ အသက် ၄၀ ကျော် ဒီဇိုင်နာဖြစ်နေမယ်ဆိုရင် လွန်ခဲ့တဲ့ ၁၀ နှစ်ကျော် ၁၅ နှစ်လောက်မှာ ဒီဇိုင်နာစလုပ်ခဲ့သူတွေပဲ။ အဲဒီအချိန်ကာလကို ပြန်ကြည့်ရင် ပြည်တွင်းမှာ ဒီဇိုင်နာခေါင်းစဥ် တပ်ကြပေမဲ့ တကယ့်ဒီဇိုင်နာအစစ် မရှိသလောက်ပဲ။ အပ်ချုပ်သမားဘဝကနေ ဒီဇိုင်နာဆိုပြီး ဖန်တီးဆန်းသစ်မှုတွေ ချပြလာကြတယ်။ အရာအားလုံးက ကိုယ်သိလောက် နားလည်သလောက် မှန်းဆပြီး ဒီဇိုင်နာလုပ်ခဲ့ကြတယ်။ ဒီဇိုင်နာဘဝမပီပြင်ရတဲ့ အကြောင်းရင်းက ပညာရပ်ဖွံ့ဖြိုးမှု အားနည်းချက် အဓိကဖြစ်နေခဲ့တယ်။ စံနမူနာယူစရာ ဒီဇိုင်နာ မရှိခဲ့ဘူး။ Inspire ယူစရာ ဖက်ရှင် မရှိခဲ့ဘူး။
ဒီဘက်ခေတ်ရောက်လာတော့ ဖက်ရှင်ပညာရပ်မျိုးစုံ ဖြည်းဖြည်းချင်း မြင့်လာတယ်။ ဒီဇိုင်နာအနည်းစုက အဆက်မပြတ် သင်ယူရင်း ဒီဇိုင်နာအလုပ်ကို ပရော်ဖက်ရှင်နယ်အဆင့် လုပ်တတ်သွားကြတယ်။ ပညာရပ် upgrade ဖြစ်သွားကြတယ်။ အတွေးအမြင်တွေ ပွင့်သွားကြတယ်။ စီးပွားရေးလုပ်ငန်းရှင်တစ်ယောက်လို လုပ်တတ်သွားကြတယ်။ ခေတ်ကာလအလိုက် အလုပ်လုပ်တဲ့ပုံစံတွေ ပြောင်းလဲလိုက်နိုင်ကြတယ်။ ဒီလိုဒီဇိုင်နာတွေအတွက် အသက် ၄၀ ဒီဇိုင်နာဘဝက အကောင်းဆုံး version ဖြစ်နေမှာ သေချာတယ်။
စိတ်မနေကာင်းစရာက ပြည်တွင်းဒီဇိုင်နာ အများစုဟာ အဲဒီအဆင့်ကို ရောက်မသွားကြဘူး။ လွန်ခဲ့တဲ့ ၁၅ နစ်ကအတိုင်း ဘာမှမပြောင်းသွားကြဘူး။ ပြောင်းလဲခဲ့ရင်တောင် တိုးတက်မှု နှေးနေခဲ့တယ်။ ဘယ်လောက်ပဲ ကြိုးစားခဲ့ပါစေ ဒီဇိုင်နာပုံရိပ် တက်မသွားကြဘူး။ အကြောင်းရင်းကတော့ ဒီဇိုင်နာအလုပ်ကို အပ်ချုပ်သမားလို လုပ်နေခဲ့တာကြောင့်ပဲ။ လိုအပ်တဲ့ ဒီဇိုင်နာ ပညာကို မသင်ယူခဲ့ဘူး။ သင်ယူခဲ့ရင်တောင် ချုပ်လုပ်မှု နည်းပညာတစ်ခုထဲကိုပဲ ထပ်ခါထပ်ခါ သင်ယူနေခဲ့တာမျိုးဖြစ်တယ်။
အပ်ချုပ်သမားအလုပ်က အတွေးအခေါ်နဲ့ အမြင်တွေထက် ခန္ဓာကိုယ် အဓိက အားစိုက်ရတဲ့ အလုပ်ပဲ။ ၁၀ နှစ်ကျော်လောက် ခန္ဓာကိုယ်အားစိုက်ခဲ့မယ်ဆိုရင် ဒီအချိန်မှာ မျက်စိမှုန်၊ လည်းပင်းနာ၊ ခါးနာ၊ ဒူးနာ အကုန်လုံး မခံနိုင်တော့ဘူး။ အလုပ်ကနေ ပိုက်ဆံရနေရင်တောင် ပင်ပန်းလွန်းလို့ မလုပ်ချင်တော့တာမျိုး ခဏခဏဖြစ်လာမယ်။ အသက် ၄၀ ကျော်မှာ အပ်ချုပ်သမားလိုပဲ ဆက်လုပ်နေမယ်ဆိုရင် နှစ်တိုအတွင်းမှာပဲ ဒီဇိုင်နာအလုပ်ကို စွန့်လွှတ်ရလိမ့်မယ်။ နိုင်ငံတကာဒီဇိုင်နာတွေထဲမှာ Coco Chanel, Ralph Lauren, Tommy Hilfigure, Karl Lagerfeld, Giorgio Armani တို့က အသက် ၇၀၊ ၈၀၊ ၉၀ အထိ ဒီဇိုင်နာဘဝကို ပျော်ပျော်ကြီးလုပ်ခဲ့ကြတယ်။ အသက် ၄၀ ရောက်ရင် နားပြီဆိုတာမျိုး မရှိဘူး။ သူတို့က အလုပ်နားရမယ့်အရွယ်မှာတောင် မနားနိုင်မယ့် နည်းလမ်းရှာဖွေခဲ့ကြတယ်။
ဒီဇိုင်နာအလုပ်ကလည်း ခန္ဓာကိုယ် မပင်ပန်းတာတော့ မဟုတ်ဘူး။ ဒါပေမဲ့ တချိန်လုံး ခန္ဓာကိုယ်အားစိုက်စရာ မလိုတာတော့ သေချာတယ်။ အဲဒီအတွက် ဖက်ရှင်အသိပညာ၊ ဖန်တီးမှုနဲ့ စီးပွားရေးအမြော်အမြင်ရှိလာအောင် ရင်းနှီးမြုပ်နှံရမယ်။ မသင်ယူဖူးတဲ့ ပညာရပ်တွေ ထပ်သင်ယူရမယ်။ ရေရှည်ထိ ဖက်ရှင်နယ်ပယ်မှာ ဘယ်လိုရှင်သန်ရမလဲဆိုတာကို သင်ယူရမယ်။
နောက်ထပ် အသက် ၅၀၊ ၆၀၊ ၇၀ အထိ ဒီဇိုင်နာဆက်လုပ်မယ်ဆိုရင် အပ်ချုပ်သမားအတွေ့အကြုံကနေ ဒီဇိုင်နာအတွေ့အကြုံဖြစ်လာအောင် ပြောင်းလဲယူတာ အကောင်းဆုံးပဲ။
Credit #
Fashion Director Z Htoi San
Credit #
