18/08/2026
ဧည့်စာရင်းတိုင်ကြားရာတွင် ငွေကြေးကောက်ခံမှုရှိပါက အရေးယူမည်ဟုအာဏာသိမ်းရှမ်းအစိုးရ ဆို...........................
ခမ်းသားငေါဝ်း
ဩဂုတ် ၁၇၊ ၂၀၂၆
ဧည့်စာရင်းတိုင်ကြားရာတွင် လူဦးရေအလိုက် ငွေကြေးကောက်ခံခြင်း၊ သတ်မှတ်ရက်ကျော်လွန်ပါက ဒဏ်ကြေးကောက်ခံခြင်းများကို တိုင်ကြားမှုများရှိပါကစိစစ်၍ ဥပဒေနှင့်အညီ အရေးယူသွားမည်ဟု အာဏာသိမ်း ရှမ်းပြည်နယ်အစိုးရအဖွဲ့က ပြောကြားလိုက်သည်။
ဧည့်စာရင်းတိုင်ကြားရာတွင် အချို့ရပ်ကွက်နှင့် ကျေးရွာအုပ်ချုပ်ရေးရုံးများက လူဦးရေအလိုက် ငွေကြေးသတ်မှတ်ကောက်ခံခြင်း၊ အချို့ရုံးများက စေတနာကြေးအဖြစ် ငွေထည့်ဝင်စေခြင်းများရှိနေ ကြောင်းသြဂုတ်လ ၁၇ ရက်နေ့တွင်ကျင်းပသည့် ရှမ်းပြည်နယ် လွှတ်တော်အစည်းဝေးတွင် နမ်းခမ်းမြို့နယ် လွှတ်တော်ကိုယ်စား လှယ်က ဦးသန်းစိုးကမေးမြန်းခဲ့ခြင်းဖြစ်သည်။
အချို့နေရာများတွင် ဧည့်စာရင်းတိုင်ကြားရာ၌ လူတစ်ဦးလျှင် ကျပ် ၁,၀၀၀ နှုန်းဖြင့် ကောက်ခံပြီး လူ ၁၀ ဦးရှိသည့် မိသားစုတစ်စုအနေဖြင့် တစ်လ ကျပ် ၁၀,၀၀၀ ပေးဆောင်ရကြောင်းနှင့် ဧည့်စာရင်းသတ်မှတ်ရက်ကျော်လွန်ပါကလည်း ဒဏ်ကြေးအဖြစ် ငွေထပ်မံပေးဆောင်ရကြောင်း သိရသည်။
ထို့အပြင် အဆောင်နေကျောင်းသားများအတွက်လည်း ကျောင်းသားတစ်ဦးလျှင် တစ်လ ကျပ် ၁၀,၀၀၀ နှုန်းဖြင့် ကောက်ခံသည့်နေရာများရှိပြီး မောင်နှမနှစ်ဦးအတွက် တစ်နှစ်လျှင် ကျပ် ၂၄၀,၀၀၀ ပေးဆောင်ရသည့် အခြေအနေများကို ကြုံတွေ့ခဲ့ရကြောင်း လွှတ်တော်ကိုယ်စားလှယ်က တင်ပြခဲ့သည်။
ဧည့်စာရင်းဖြင့် အခြားမြို့နယ်များတွင် နှစ်ရှည်နေထိုင်နေရသည့် စစ်ဘေးရှောင်ပြည်သူများလည်း ရှိနေပြီး ထိုသူများအတွက် ဧည့်စာရင်းတိုင်ကြားရာတွင် ငွေကြေးကောက်ခံမှုများရှိနေခြင်းကိုလည်း လွှတ်တော်ကိုယ် စားလှယ်က ထောက်ပြခဲ့သည်။
“တည်ငြိမ်အေးချမ်းမှုမရှိတဲ့ဒေသကနေ ဆွေမျိုးမိတ်ဆွေတွေနဲ့ နီးစပ်ရာမြို့နယ်တွေကို ဧည့်စာရင်းနဲ့ လာရောက်နေထိုင်ရတာ သုံးနှစ်နီးပါးရှိပြီဖြစ်ပါတယ်။ အဲဒီလို ရက်လနှစ်ရှည်နေထိုင်တဲ့ စစ်ဘေးရှောင်တွေအတွက် ဧည့်စာရင်းကို ဘယ်လိုဆောင် ရွက်ပေးမလဲ” ဟု လွှတ်တော်ကိုယ်စားလှယ် ဦးသန်းစိုးက မေးမြန်းခဲ့သည်။
ယင်းမေးမြန်းချက်နှင့်ပတ်သက်၍အာဏာသိမ်း ရှမ်းပြည်နယ်အစိုးရအဖွဲ့ဝင် လုံခြုံရေးနှင့် နယ်စပ်ရေးရာဝန်ကြီး ဗိုလ်မှူးကြီး ဦးစိန်ဝင်းက ဧည့်စာရင်းတိုင်ကြားခြင်းအတွက် အုပ်ချုပ်ရေးမှူးများအနေ ဖြင့် ငွေကြေးတစ်စုံတစ်ရာ တောင်းခံခွင့်မရှိကြောင်း ပြန်လည်ဖြေကြားသည်။
“ဧည့်စာရင်းတိုင်ကြားခြင်းနှင့် စပ်လျဉ်း၍ ငွေကြေးတစ်စုံတစ်ရာ တောင်းခံခြင်း မပြုရ” ဟု ဦးစိန်ဝင်းက ပြောသည်။
လက်ရှိတွင် ရပ်ကွက်နှင့် ကျေးရွာအုပ်ချုပ်ရေးမှူးများကို နိုင်ငံတော်က လစဉ်ချီးမြှင့်ငွေ ကျပ် ၇၀,၀၀၀ နှင့် ရုံးသုံးစရိတ် ကျပ် ၅၀,၀၀၀ ထောက်ပံ့ပေးထားပြီးဖြစ်သဖြင့် ဧည့်စာရင်းတိုင်ကြားမှုအတွက် ပြည်သူများထံမှ ငွေကြေးကောက်ခံခြင်းမပြုရန် ညွှန်ကြားထားကြောင်း ဝန်ကြီးက ဆိုသည်။
ထို့ကြောင့် ဧည့်စာရင်းတိုင်ကြားရာတွင် ငွေကြေးကောက်ခံကြောင်း ပြည်သူများဘက်မှ တိုင်ကြားလာပါက စိစစ်ပြီး မှန်ကန်ကြောင်းတွေ့ရှိပါက သက်ဆိုင်သူများကို ရပ်ကွက် သို့မဟုတ် ကျေးရွာအုပ်ချုပ်ရေးဥပဒေနှင့်အညီ အရေးယူသွားမည်ဟု ၎င်းက ပြောသည်။
တစ်ဖက်တွင် ဧည့်စာရင်းမတိုင်ကြားဘဲ နေထိုင်ခြင်း သို့မဟုတ် သတ်မှတ်ထားသည့် ခွင့်ပြုရက်ကျော်လွန်ပြီး ဧည့်စာရင်းထပ်မံမတိုင်ကြားဘဲ နေထိုင်ခြင်းများကိုလည်း သက်ဆိုင်ရာရဲတပ်ဖွဲ့၊ ရပ်ကွက်၊ ကျေးရွာအုပ်ချုပ်ရေးအဖွဲ့များက စစ်ဆေးအရေးယူနေကြောင်း သိရသည်။
ဧည့်စာရင်းစနစ်ကို လုံခြုံရေး၊ တရားဥပဒေစိုးမိုးရေးနှင့် တရားမဝင်နေထိုင်သူများ မရှိစေရေးအတွက် အသုံးပြုနေပြီး တရားမဝင်လုပ်ငန်းများကို ဖော်ထုတ်ရာတွင်လည်း အသုံးပြုနေကြောင်း ဝန်ကြီးက ရှင်းလင်းခဲ့သည်။
#လွှတ်တော်
#ဧည့်စာရင်း
#ငွေကောက်ခြင်း
