Эрдэнэт үйлдвэр ТӨҮГ

16/09/2026

ШИНЭ АЖИЛТНУУД ҮЙЛДВЭРЛЭЛИЙН ҮНДСЭН ЦЕХҮҮДИЙН ҮЙЛ АЖИЛЛАГААТАЙ ТАНИЛЦЛАА

✅ Эрдэнэт үйлдвэрийн ажилтнуудад чиглэсэн “Хүний нөөцийн хөгжлийн цогц хөтөлбөр” тав дахь жилдээ хэрэгжиж байна. Цогц хөтөлбөрийн нэг “Шинэ ажилтны дасан зохицох” хөтөлбөр 2026 оны төлөвлөгөөний дагуу үйл ажиллагаагаа үргэлжлүүлж байна. Эрдэнэт үйлдвэрт энэ жил сонгон шалгаруулалтаар ажилд орсон 174 ажилтан “Шинэ ажилтны дасан зохицох хөтөлбөр”-т хамрагдаж байгаа. Хөтөлбөрийн хүрээнд шинэ ажилтнууд үйлдвэрийн бүсээр аялах, төрөл бүрийн сургалтууд, тэр дундаа цахим платформ дээр ажиллах, сайжруулалт хийх зэрэг олон талын мэдлэг, чадварт суралцаж байна.

✅ Өнөөдөр зохион байгуулсан хөтөлбөрийн хоёр дахь аялалд 60 шинэ ажилтан оролцож, Эрдэнэт үйлдвэрийн бүтцийн нэгжүүдтэй танилцан, үйлдвэрлэлийн цехийн үйл явцыг үзэж сонирхлоо. Ил уурхай, Авто тээврийн цех, Баяжуулах үйлдвэрээр аялж, дараа нь Эрдэнэт үйлдвэрийн түүхэн музейгээр зочилж, 48 дахь жилдээ ажиллаж буй үйлдвэрийн түүхэн замналтай танилцсан юм. Шинэ ажилтны дасан зохицох хөтөлбөрийн ажлын хэсгээс оролцогчдодоо мэдээллийн портал сайт дээрх ажилтнуудад зориулсан мэдээллүүдийг дэлгэрэнгүй танилцуулахаар төлөвлөсөн байна.

✅ Тус хөтөлбөрийн ажлын хэсгийн ахлагч, Ус хангамжийн цехийн хүний нөөцийн мэргэжилтэн Ж.Энхтайван, “Шинээр ажилд орж буй ажилтанд ажлын анхны өдрийн сэтгэгдэл маш чухал байдаг. Ийм учраас бид ажлын анхны өдрийн стандарт хэрэгжүүлж, бүтцийн цех нэгж бүрд бодит ажил хэрэг болгож байна. Шинэ ажилтнуудын хамгийн их хүсдэг зүйл гэвэл ажлын байрны ойлгомжтой байдал. Хөтөлбөрөө хэрэгжүүлэхдээ бид энэ хүсэлтийг онцлон, тухайн ажилтанд ойлгомжгүй байгаа асуудлыг тодорхой болгож, мэдээлэл өгдөг” гэж хөтөлбөрийнхөө давуу талыг онцлов.

🖋 М.БАЛЖИННЯМ
📸 Б.СЭР-ОДДАМБА

#ЭрдэнэтҮйлдвэр #ХүнийНөөцийнХөгжлийнЦогцХөтөлбөр #ШинэАжилтныДасанЗохицохХөтөлбөр

16/09/2026

“MININGWEEK & MINEPRO 2026” ОЛОН УЛСЫН УУЛ УУРХАЙН ЧУУЛГАН, ҮЗЭСГЭЛЭН ЭХЭЛЛЭЭ

✅ “MiningWeek & MinePro 2026 – International Mining Exhibition & Convention” олон улсын уул уурхайн чуулган, үзэсгэлэн өнөөдөр Улаанбаатар хотын Налайх дүүрэг, Тайж хайрхны бэлд эхэллээ.

✅ Тав дахь жилдээ зохион байгуулагдаж буй тус үйл ажиллагааны нээлтэд Монгол Улсын Ерөнхий сайд Н.Учрал, Аж үйлдвэр, эрдэс баялгийн сайд Г.Дамдинням, Байгаль орчин, уур амьсгалын өөрчлөлтийн сайд Д.Сандаг-Очир болон төр, хувийн хэвшил, олон улсын байгууллагын төлөөлөл оролцлоо. Ерөнхий сайд Н.Учрал мэндчилгээ дэвшүүлж, Аж үйлдвэр, эрдэс баялгийн сайд Г.Дамдинням “Уул уурхайн 7 хоног”-ийн нээлтийн илтгэл танилцуулсан.

✅ Мөн энэ үеэр, Геологи, Уул Уурхай, Эрдэс Баялгийн Мэргэжлийн Нэгдсэн Холбоо нь Аж үйлдвэр, эрдэс баялгийн яам болон Байгаль орчин, уур амьсгалын өөрчлөлтийн яамтай хамтран ажиллах санамж бичиг үзэглэлээ. Тус ёслолд Аж үйлдвэр, эрдэс баялгийн яамны Төрийн нарийн бичгийн дарга Б.Дашпүрэв, Байгаль орчин, уур амьсгалын өөрчлөлтийн сайд Ц.Сандаг-Очир, Геологи, Уул Уурхай, Эрдэс Баялгийн Мэргэжлийн Нэгдсэн Холбооны Удирдах зөвлөлийн дарга Д.Цогбаатар нар оролцож, санамж бичигт гарын үсэг зурлаа.

✅ Энэ жилийн “MiningWeek & MinePro 2026” нь “Тогтвортой хөгжлийн төлөө: Ногоон ирээдүй ба олон улсын түншлэл” үндсэн чиглэлийн хүрээнд зохион байгуулагдаж, уул уурхайн салбарын тогтвортой хөгжил, ногоон шилжилт, хөрөнгө оруулалт, шинэ технологи, олон улсын хамтын ажиллагааны асуудлыг хэлэлцэж байна.

✅ Тус үйл ажиллагаанд 15 орны 350 гаруй аж ахуйн нэгж, байгууллага, 20 мянга гаруй оролцогч хүрэлцэн ирж, уул уурхайн техник, технологи, бүтээгдэхүүн, үйлчилгээ, шинэ шийдлүүдээ танилцуулж байна. Ийнхүү Монгол Улсын эрдэс баялгийн салбарын бодлого, хөрөнгө оруулалт, технологи, олон улсын хамтын ажиллагааг нэг дор төвлөрүүлсэн “MiningWeek & MinePro 2026” олон улсын чуулган, үзэсгэлэн есдүгээр сарын 16–18-ны өдрүүдэд үргэлжилнэ.

🖋 Б.УЧРАЛ
📸 Б.БАТТӨГС

#ЭрдэнэтҮйлдвэр

16/09/2026

📢 Орхон аймгийн Гэмт хэргээс урьдчилан сэргийлэх ажлыг зохицуулах салбар зөвлөл, "Эрдэнэт үйлдвэр" ТӨҮГ-ын гэрээт Дотоодын цэргийн 816-р анги, Гамшгаас хамгаалах штаб хамтран зохион байгуулж буй "УУРААР БУС УХААЛГААР 2" аяны хүрээнд мэдээллийн постеруудыг цувралаар хүргэж байна.

"УХААЛАГ ХАНДЛАГА-АЮУЛГҮЙ НИЙГЭМ"

#ЭрдэнэтҮйлдвэр #УураарБусУхаалгаар2

16/09/2026

ОЛОН УЛСЫН ЭРДЭМТЭД ТӨВ АЗИЙН ГЕОЛОГИЙН АСУУДЛААР ХЭЛЭЛЦЭЖ БАЙНА

✅ Монгол Улсын Шинжлэх ухааны академийн Геологийн хүрээлэн үүсэн байгуулагдсан түүхт 60 жилийн ойн хүрээнд “Төв азийн геологийн асуудлууд-2026” Олон улсын Эрдэм шинжилгээний бага хурал Улаанбаатар хотноо Чингис хаан Үндэсний музейн хурлын танхимд өнөөдөр эхлэлээ.

✅ Тус хурал нь Төв азийн бүс нутгийн тектоник хувьсгал, ашигт малтмалын нөөц, палео орчны судалгааны хамгийн сүүлийн үеийн үр дүнг хэлэлцэх, дэлхийн түвшний платформ болох бөгөөд Монгол Улсыг Төв азийн геологийн суурь судалгаа, инновацын гол төв болгон хөгжүүлэх зорилготойгоор “Эрдэнэт үйлдвэр” ТӨҮГ, Үндэсний шинжлэх ухааны сан, ШУТИС-тай хамтран зохион байгуулж байна.

✅ “Төв азийн геологийн асуудлууд” Олон улсын Эрдэм шинжилгээний бага хуралд Монгол, ОХУ, БНХАУ, БНЧУ, АНУ, Польш, Австрали, Герман улсын нийт 55 оролцогч, дэлхийд тэргүүлэх 15 эрдэмтэн үндсэн илтгэгчээр оролцож байна.

🖋 А.БАТБАЯР
📸 Б.ЯЛАЛТ

16/09/2026

Д.ЗАЯАБААТАР: ЗЭСИЙН БАЯЖМАЛ ХАЙЛУУЛАХ, БОЛОВСРУУЛАХ ҮЙЛДВЭРИЙН ХҮНИЙ НӨӨЦИЙГ СУРГАЖ БЭЛДЭХ НЬ МАНАЙ СУРГУУЛИЙН ХАМГИЙН ТОМ ЗОРИЛТ

✅ ШУТИС-ийн харьяа, “Эрдэнэт үйлдвэр” ТӨҮГ-ын дэргэдэх, Ш.Отгонбилэгийн нэрэмжит Эрдэнэт цогцолбор их сургууль 2026-2027 оны хичээлийн жилийн сургалтын хөтөлбөрөө эхлүүллээ. Тус сургуулийн хичээлийн жилдээ дэвшүүлсэн зорилт, шинэ санаачилга, үйл ажиллагааны талаар захирал, доктор Д.Заяабаатартай ярилцлаа.

✅ 2026-2027 оны хичээлийн шинэ жил эхэлж байна. Энэ жилийн онцлог, зорилт юунд чиглэж байна вэ?
-Юуны өмнө Эрдэнэт цогцолбор их сургуулийнхаа нийт оюутан суралцагчид, багш сурган хүмүүжүүлэгч, ажилтнууд болон эцэг эхчүүд, хамтран ажиллагч байгууллагууддаа хичээлийн шинэ жилийн мэндийг хүргэе. Энэ жил манай сургууль 1400 гаруй оюутан суралцагчидтайгаар сургалтын үйл ажиллагааг өргөжүүлж ажиллана. 2026-2027 оны хичээлийн жилийн гол онцлог нь Японы Коосэн сургалтын хөтөлбөрөөр Политехник коллеждоо дөрөв дэх жилдээ элсэлт авлаа. Японы загвараар сургадаг тус коллежид 10-р ангиа төгсөөд элсэн суралцсан хүүхдүүд 20 настай, инженерийн дэд бакалавр зэрэг эзэмшин төгсдөг. Өөрөөр хэлбэл, “Коосен”-ийн оюутнууд маань Япон улсад богино хугацааны дадлага хийж, тус орны хэл соёлд суралцан мэргэжлийн үнэмлэхтэй төгсдөг. Улмаар тэндээ мэргэжлээрээ ажиллах, эсвэл Япон улсын их, дээд сургуулиудад үргэлжлүүлэн, бакалавр, магистрын зэргээр дэвшин суралцах боломжтой хөтөлбөрийг энэ хичээлийн жилийн нэг онцлог гэж хэлж болно. Мөн Монгол Улсын Боловсролын яамнаас дэвшүүлж буй дээд боловсролын салбарын зорилго, зорилт, оюутан сурагчдад чиглэсэн бодлого чиглэл, сургалтын чанарыг дээшлүүлэх, судалгаа эрдэм шинжилгээний чадавхыг нэмэгдүүлэх, сургалтын орчин, технологийг сайжруулах, орчин үеийн дижитал болон хиймэл оюуныг суралцагчдадаа эзэмшүүлэх, багш ажилтнуудын мэдлэг, ур чадварыг тэлэх зэрэг олон талын зорилтуудыг хэрэгжүүлэн ажиллана.

✅ Эрдэнэт цогцолбор их сургууль болон өргөжих зорилтын хүрээнд сургалтын агуулга, хөтөлбөрт өөрчлөлт орсон уу?
Сургалтын хөтөлбөрт өөрчлөлт ороогүй, инженер технологийн салбарын бакалаврын сургалтын хөтөлбөрүүд үргэлжлэн явагдана. Харин МУИС-аас шилжиж ирсэн нийгмийн ухааны сургалтын хөтөлбөрүүд хаагдаж, шинээр Санхүү, банк 2+2, Үйлдвэрлэлийн менежмент 2+2 хөтөлбөрүүд нээгдэн, элсэлт авч байна. Энэ хичээлийн жилд Ахлах сургууль, Коосэн коллеж, бакалаврын сургалтын хөтөлбөрүүдэд нийт 1400 гаруй оюутан сурагчтай сургалтын үйл ажиллагаагаа явуулахад бэлэн болсон.

✅ Эрдэнэт үйлдвэрийн урт хугацаанд хэрэгжүүлэх стратегийн бодлогын нэг нь Эрдэнэт цогцолбор их сургуулийг өргөжүүлэн, бэхжүүлэх зорилт. Энэ төлөвлөгөөний хүрээнд ямар ажлууд хийгдэх вэ?
Орхон аймагт сургалт, эрдэм шинжилгээ, үйлдвэрлэлийн цогцолбор бүхий 5000 оюутны хотхон байгуулж, хөгжүүлэх, Эрдэнэт цогцолбор их сургуулийг уул уурхай, технологийн чиглэлээр хөгжүүлэх тухай Монгол Улсын Засгийн газрын 321 дүгээр тогтоолыг хэрэгжүүлэхээр ажиллаж байна. Энэ бол Орхон аймаг, Эрдэнэт үйлдвэрийн хамтран хэрэгжүүлж буй том төсөл хөтөлбөрийн нэг юм. Бид Оюутны хотхоны техник, эдийн засгийн үзүүлэлт, ерөнхий төлөвлөгөөг боловсруулах ажлын гүйцэтгэгчийг шалгаруулах тендер зарлах, зохион байгуулах ажлуудыг үргэлжлүүлж байна.

✅ Боловсролын чиглэлээр бүсчилсэн хөгжлийн асуудал дэвшүүлж байгаа. Тухайлбал, Эрдэнэт цогцолбор их сургуулийн үйл ажиллагаа хойд бүсийн хэмжээнд хэрхэн хүрч байна вэ?
Манай сургууль, Хойд бүсийн хөгжлийн төвтэй хамтран, хэд хэдэн төсөл хөтөлбөр хэрэгжүүлж байгаа. Энэ жилийн тухайд, бид хойд бүсийн аймгуудаар тойрч, сургуулийн үйл ажиллагаа, элсэлтийн сурталчилгааг хамтарч зохион байгуулсан. Мөн Хойд бүс болон Япон улсын Кюшү бүсийн долоон аймагтай хамтын ажиллагааны гэрээ байгуулахаар ажиллаж байна. Энэ хүрээнд Японы Күрүмэ Коосентой оюутан, багш солилцоо, хамтарсан сургалт судалгааны ажлуудыг хэрэгжүүлнэ.

✅ Хэчнээн багш, ажилтантайгаар сургалтын үйл ажиллагаагаа явуулах вэ?
Эрдэнэт цогцолбор их сургууль нийт 159 багш, ажилтантай. Манай сургуулийн багш нарын хувьд нэлээд залуужиж байна. Шилдэг төгсөгчийн батламж гардсан залуу багш нар орж ирж байна. Их сургууль болж буйтай холбоотойгоор эрдмийн зэрэг цолтой багш нарынхаа тоо, эзлэх хувийг нэмэгдүүлэхэд анхаарч ажиллана. Өнгөрсөн онд нэг багш докторын зэрэг хамгаалсан бол энэ хичээлийн жилд 1-2 багш докторын зэрэг хамгаалахаар бэлтгэж байгаа. Мөн сонгон шалгаруулалтаар докторын зэрэг цолтой багш нарыг шалгаруулж авна.

✅Хичээлийн шинэ жилийн нээлтийн үеэр олон оюутанд тэтгэлгээр суралцах батламж гардууллаа. Оюутнуудын сургалтын чанар, дүн илүү сайжирч байна гэж ойлгож болох уу?
Манай сургуультай хамтран ажилладаг байгууллага болон амжилттай суралцаж буй оюутнууддаа сургуулийнхаа 30, 60, 100 хувийн тэтгэлгээр суралцах батламжийг гардуулдаг, өнөөдөр нийт 56.8 сая төгрөгийн тэтгэлэг гардуулж байна. Сайн суралцаж, жил бүр тэтгэлэгт хамрагдсаар байгаад төгсөөд, Эрдэнэт үйлдвэрт ажиллах батламжаар шагнуулах өргөн боломж манайд бий. Жил ирэх бүр сургалтын тэтгэлгүүд нэмэгдэж байна. Энэ жил Боловсролын зээлийн сангаас орон нутагт сурч буй оюутнуудын тэтгэлгийн хэмжээг нэмэгдүүлэх, өнгөрсөн жилд олгогдоогүй зарим тэтгэлгийг Боловсролын яамнаас нэмж олгохоор шийдвэрүүд гарсан. Тэгэхээр орон нутагт эрэлттэй болон тэргүүлэх мэргэжлээр суралцаж байгаа оюутнуудад Боловсролын зээлийн сан, сургуулийн захирлын нэрэмжит тэтгэлэг болон бусад түнш байгууллагуудын тэтгэлэгт хөтөлбөрүүд жил ирэх бүр нэмэгдэж байгааг онцлохыг хүсэж байна.

✅ Уул уурхайн салбарын мэргэжилтэй ажилтан, ажилчдыг 51 дэх жилдээ бэлтгэж байгаа өнөөгийн Эрдэнэт цогцолбор их сургуулийн цаашдын том зорилтоо хэрхэн дэвшүүлж байна вэ?
Эрдэнэт үйлдвэр, Монгол Улсад анхны Зэсийн баяжмал хайлуулах, боловсруулах үйлдвэрийг байгуулах гэж байна. Энд ажиллах уул уурхайн мэргэжилтнүүд, инженерүүдийг бид сүүлийн дөрвөн жил зорьж, бэлдэж байна. Металлургийн 2+2 хөтөлбөрийг ОХУ-ын Уралын холбооны их сургуультай хамтран сургаж байгаа. Цаашид бид Эрдэнэт үйлдвэр төдийгүй Монгол Улсын уул уурхайн салбарт шаардлагатай инженер техникийн ажилтнууд, мэргэжилтнүүдийг бэлтгэх, уул уурхайн компаниудтай хамтраад оюутан сурагчдаа дадлагажуулах, хосмог хөтөлбөр хэрэгжүүлэх гэх зэрэг олон шинэ санаачилгыг Боловсролын яамны өгсөн чиглэлийн дагуу эхлүүлэн хэрэгжүүлж байна.

🖋 М.БАЛЖИННЯМ
📸 Б.БАТТӨГС

#ЭрдэнэтҮйлдвэр #ЭрдэнэтЦогцолборИхСургууль

16/09/2026

✅ “Komatsu HD1500-8” загварын хүнд даацын өөрөө буулгагч 10 автомашиныг өнгөрсөн 1.5 жилийн хугацаанд үйлдвэрлэлийн үндсэн үйл ажиллагаанд ашигласнаар:

📌 20.2 сая м3 уулын цул тээвэрлэж
📌 213.5 сая тн/км ачаа эргэлт гүйцэтгэсэн

✅ Ижил төрлийн хүнд даацын өөрөө буулгагч автомашины ажлын гүйцэтгэлтэй харьцуулахад:

📌 Уулын цул тээвэрлэлтийн хэмжээ 7.9% НЭМЭГДСЭН
📌Ачаа эргэлт 8% ӨССӨН

📌 1 тн/км ачаа эргэлтийн өөрийн өртөг 5.6% БУУРСАН
📌 1 м3 уул цул тээвэрлэх өөрийн өртөг 5.8% БУУРСАН

#ЭрдэнэтҮйлдвэр #АвтоТээврийнЦех

15/09/2026

ЭМГЭНЭЛ

Дашнямын ДОРЖПҮРЭВ /1942-2026/

Монгол Улсын баатар “Эрдэнэт үйлдвэр” ТӨҮГ-ын Соёл, урлагийн цогцолборын ахмад ажилтан, “Уурхайчин” Соёлын ордны анхны бүжгийн багш, Монгол Улсын Соёлын тэргүүний ажилтан Дашнямын Доржпүрэв 2026 оны 09 дүгээр сарын 14-ний өдөр өвчний улмаас таалал төгсөж, үр хүүхэд, гэр бүл найз нөхөд, хамт олон, Эрдэнэт хотын бүжгийн урлагт нөхөж баршгүй хүнд гарз, уй гашуу тохиосонд гэр бүл үр хүүхдүүдэд нь гүн эмгэнэл илэрхийлье.
Тэрээр бүжгийн урлагт бүжигчин, бүжгийн багш, бүжиг дэглэгчээр 60 гаруй жил ажиллаж, монголын соёлын биет бус өвийг хүүхэд, залуучуудад тээн өвлүүлж ирсний зэрэгцээ олон зуун шавь, ардын авьяастныг төрүүлж, мэргэжлийн уран бүтээлч болгож, хойч үеэ төлөвшүүлэх үйлсэд бүхий л ухамсарт амьдрал, хөдөлмөр зүтгэлээ зориулж ирсэн гавьяатай багш, сурган хүмүүжүүлэгч, манай алтан үеийн ахмад уран бүтээлчдийн нэг байлаа.
Таны хөдөлмөрч хичээнгүй чигч шударга зан, сурган хүмүүжүүлэх арга ухаан, сэтгэлд дотно сайхан зан чанар бидний сэтгэлд үүрд мөнхрөн үлдэх болно.

УМ МА НИ БАД МИ ХУМ

СОЁЛ, УРЛАГИЙН ЦОГЦОЛБОРЫН ЗАХИРГАА, ХАМТ ОЛОН,
АХМАДЫН ЗӨВЛӨЛ

2026.09.15

15/09/2026

ЖИЛД 7 САЯ М³ ХӨРС ТЭЭВЭРЛЭХ МӨЧЛӨГТ УРСГАЛТ ТЭЭВРИЙН СИСТЕМ АШИГЛАЛТАД ОРУУЛАХАД БЭЛТГЭЖ БАЙНА

✅ “Ил уурхайн хөрсний тээвэрт Мөчлөгт урсгалт тээврийн технологи нэвтрүүлэх” төслийг ашиглалтад оруулснаар жилд 7 сая.м3 хөрс болон балансын бус хүдрийг овоолгууд руу тээвэрлэнэ. Уг тээврийн технологи нь бутлуурын байгууламж, конвейер, овоолго үүсгэгч, машинд ачих байгууламж гэсэн үндсэн хэсгүүдээс бүрдэх 2.8 км урт тээвэрлэлтийн систем юм.

✅ Одоогоор бутлуурын байгууламж, шигшүүр, бункер, конвейерын систем болон овоолго үүсгэгчийн үндсэн угсралт хийгдэж, бутлуурын тоног төхөөрөмжийн угсралт 98, барилга угсралтын ажлын нийт гүйцэтгэл 97.7, конвейерын лент болон цахилгааны кабель угсралтын ажил 100 хувийн гүйцэтгэлтэй. Мөн цахилгаан хангамжийн ажлын хүрээнд нийт 17 бетонон шон суурилуулж, агаарын шугам татсан бөгөөд төслийн гурван дэд станцад хүчдэл өгч, тоног төхөөрөмжүүдийг эрчим хүчээр найдвартай хангах нөхцөлийг бүрдүүлээд байна.

✅ Конвейер №1, №2, №3, №4-ийн трассын дагуух газар шорооны ажлыг бүрэн дуусгаж, конвейеруудын шилжих станцуудын угсралтын ажлыг гүйцээжээ. Ингэснээр хөрс, балансын бус хүдэр, бутлагдсан материалыг технологийн дараагийн дамжлагад тасралтгүй нийлүүлэх үндсэн шугамын механик угсралт дууслаа. Мөн гэрэлтүүлэг, камержуулалтын ажлыг бүрэн дуусгаж, технологийн тоног төхөөрөмжийн ажиллагаанд хяналт тавих, талбайн аюулгүй байдал, хэвийн ашиглалтыг хангах нөхцөлийг бүрдүүлэн, системийн туршилт тохируулга үргэлжилж байна.

✅ Энэхүү төслийг хэрэгжүүлснээр хүнд даацын өөрөө буулгагч автомашины тоо, ашиглалтын зардал, түлшний зарцуулалт буурах юм. Түүнээс гадна шороон замын тээвэрлэлт буурснаар тоосжилт багасаж, ажилтнуудын хөдөлмөрийн аюулгүй байдал, эрүүл ахуйн нөхцөл сайжирна гэж Ил уурхайгаас мэдээллээ.

🖋 М.ОДГЭРЭЛ
📸 Б.БАТТӨГС

#ЭрдэнэтҮйлдвэр #ИлУурхай

15/09/2026

ГУЧИН ГУРАВ ДАХЬ НАМАР (Хөрөг нийтлэл)

🏭 Гучин гурав дахь намар. Хорь гаруй насны хийморь золбоо, хийж бүтээхийн оргилуун эрч, хүсэл мөрөөдлийн даль жигүүрээрээ гоёсон залуухан инженер Эрдэнэт үйлдвэрийн босгоор алхаж, амьдралд гэрэл, дулаан түгээх гэгээн үйлсийн аянд мордож байсан цагаас хойш хагас жаран улирчээ. Энэ намар Дулааны цахилгаан станцын Үйлдвэр техникийн товчооны Ээлжийн дарга Доржпаламын Батжаргалын Эрдэнэтэд ажилласны гучин гурав дахь намар. Төрөлх станцынх нь хагас зуун жилийн ой тохиож буй онцгой намар.
Замын хүн саатмаар, Завхан сайхан нутгийн уугуул хүү төрж өссөн нутгаасаа гарч, найрамдлын Дархан хотноо Политехникумын дулааны инженерийн ангид элсэн суралцахаар эрдмийн жолоо залав. Оюутны дөрвөн жил он цагийн дурсамж нэмсээр, нэг л мэдэхэд урсан өнгөрч, 1993 оны намар Эрдэнэтийг зорих түүний ажил, амьдралын замын эхийг тавьсан юм. Ингэж тэрээр, эзэмшсэн мэргэжлээрээ үйлдвэрийн Дулааны цахилгаан станцад ажилд орж байв.

🏭 Хамт олны халуун дулаан итгэл сэтгэлээр угтсан тэрхүү өдрүүд ээлжийн дарга Д.Батжаргалын сэтгэлд одоо ч тодхон. Онцгой мэдрэмж өгсөн дурдатгал бүхэн хүний сэтгэл, зүрхэнд үргэлж шинээрээ үлддэг билээ. Түүн лугаа, гуч гаруй жилийн тэртээх ажлын анхны өдөр нь одоо ч түүний дурсах дуртай агшны нэг нь. Тухайн үеийн станцын дарга Д.Батчулуун, хүний нөөц Х.Долгоржав нар, “Мэргэжлийн хүүхэд ирж байхад, авалгүй яах вэ” гэсээр уриалгахан хүлээж авсан нь залуу хүнд маш их урам хүч болсныг талархан дурсаж, мөр зэрэгцэн ажилласан ахмад ажилтнууд, орос мэргэжилтнүүдийн нөмөр нөөлөг юу юунаас илүү эрхэм байсныг тэрээр эдүгээ дурсан дурсан өгүүллээ.

🏭 Тоног төхөөрөмжийн засварчин, үнсчин, зуухны туслахаас ахлах машинч хүртэлх Дулааны цахилгаан станцын үйлдвэрлэлийн бүхий л шат дамжлага дээр дадлагажин ажиллаж, сүүлийн хорин жилд ээлжийн даргын хариуцлагатай албыг тасралтгүй хашиж явна. Ажилдаа чинхүү сэтгэл зүтгэлээ зориулдаг, хариуцлага зарчим гэсэн хөтөчтэй түүний унаган хүмүүжил, суурь боловсрол нь тэрхүү зан чанарынх нь гол үндэс болдог. Энэ үндсийг түүний аав, Монгол Улсын Гавьяат багш Доржпалам нь ой тойнд нь гүн бат суулгаж өгчээ. Ажилсаг, даруу төлөв аав ээжийн хүү ажил хөдөлмөрийн талбарт энэ чанараа өнгөлөн зүлгэж, арвин туршлага, өндөр ур чадвартай тулхтай, тууштай мэргэжилтнүүдийн эгнээнд түүчээлж явна.

🏭 Ажлын гараагаа эхэлсэн станц нь түүнийг амьдралын ханьтай нь учруулж, Д.Батжаргалынх хэмээх айлын гал голомтыг асаасан түүхтэй. Түүний гэргий Дулааны цахилгаан станцад хөдөлмөрийн эдийн засагчаар 34 дэх жилдээ ажиллаж буй жавхаалаг цоглог С.Лхагвасүрэн гэж бүсгүй бий. Лаборант бүсгүй, үнсчин залуу хоёр нэг ээлжнээс нэгэн насны амьдралаа холбож, гурван сайхан хүүгийн аав ээж болон тэгш дүүрэн яваа нандин түүхийг хамтдаа бүтээжээ.

🏭 Ээлжийн дарга Д.Батжаргал, гуч гаруй жилийн хөдөлмөрөө Дулааны цахилгаан станцдаа зориулахдаа бүх цаг үед нь ээлжинд ажилласан юм. Ээлжинд гардаг ажилчнаас ээлжийнхнийг хариуцдаг дарга болтлоо тэр туршлагажиж, хөдөлмөрлөжээ. Хариуцлагаас л бүх зүйл нь эхэлдэг ээлжийн даргын алба бол тэр чигээрээ сонор сэрэмж, нарийн төлөвлөлт, зохицуулалт. Станцын есөн хэсгийн наймыг нь хариуцан, ээлжийн хуваарь, үйлдвэрлэлийн горим зохицуулалтыг мэргэжлийн ур ухаан, өндөр мэдрэмж, эрдэм мэдлэгээрээ хөтөлж, ажилладаг. Түүн дээр шөнөөр ажилладаг ажилтнуудынхаа эрүүл ахуй, аюулгүй байдал, тайван ажиллах бүхий л нөхцөл боломжийг бүрдүүлж өгөх гээд Ээлжийн даргаас шаардах, дайчлах олон шалгуурт тэр тэнцэж, шалгарсан хашир инженер.

🏭 Эрдэнэт үйлдвэрийн ДЦС эдүгээ зургаан зуух, зургаан турбинтай. Ямар ч үед бэлэн байх нөөцтэй, аюулгүй байдлын өндөр түвшинд ажиллах үүргийг ээлжийн дарга нар хүлээнэ. Өвлийн их ачааллын үед ээлжиндээ 40-45, зуны улиралд 35-40 ажилчныг удирдан, чиглүүлнэ. Энэ үүрэг нь ажлын өдрийн 17:00 цагаас хойш цехийн даргын эрх, үүргийн энтэй хэрэгжиж эхэлнэ. Ингээд бодохоор ээлжийн дарга хүн хэр хэмжээний хариуцлага, ачаалал үүрдэг нь тодорхой.

🏭 Түүнийг анх ажилд орох үед цех нь БКЗ-75 маркийн зургаан зуухаар ажилладаг, Дулааны станц нэртэй байв. Эрдэнэт үйлдвэр эрчим хүчний хэрэглэгч байсан гэсэн үг. Үе шаттай өргөтгөл шинэчлэлийн эхнийх нь 2012 онд эхний өргөтгөл хийгдэж, дотоод хэрэгцээгээ бүрэн хангахын тулд 5 мВт-аар хүчин чадлаа нэмэгдүүллээ. Үүнээс арваад жилийн дараа 2018 онд тус бүр 12 мВт-ын 4 турбингенератораар өргөтгөн, жилд 53 мВт цахилгаан, эрчим хүч үйлдвэрлэх хүчин чадалтай, Монгол улсдаа эхний гуравт эрэмбэлэгдэх Дулааны цахилгаан станц болон ажиллаж эхэллээ. Зууны манлай үйлдвэр хэрэглэгчээс эрчим хүч, дулааны томоохон үйлдвэрлэгчийн эгнээнд шилжиж, энэхүү үе шаттай бүтээн байгуулалтын шав тавихаас нь эхлээд гар бие оролцсондоо бүхнээс илүү бахархдагаа Д.Батжаргал дарга хуучлав. Түүний ажил, амьдралын хамгийн том баяр бахдал бол энэ түүхэн үйл явдал байлаа.

🏭 Энэ цаг үеэс Дулааны цахилгаан станц төвийн эрчим хүчний нэгдсэн сүлжээнд холбогдож, станцын зуух турбинууд Диспетчерийн үндэсний төвийн харьяанд очиж, үйл ажиллагааны хувьд шууд харилцаж ажилладаг болов. Ингэснээр үүрэг хариуцлага урьдынхаас нэмэгдэж, тэр чинээгээр ур чадвар, мэдлэг туршлага тэлж, хувь ажилтны хувьд хөгжиж байна. Энэ утгаараа би өөрийгөө азтай хүн гэж боддог гэж Ээлжийн дарга Д.Батжаргал олзуурхангуй өгүүлсэн. Ажилдаа бүгдийг өгсөн хүмүүсийн голчлон хэлдэг үг түүний хандлагад ингэж шингэсэн гэлтэй.

🏭 Ээлжийн горимд ажилладаг хүмүүст хувийн зохион байгуулалт өндрөөс өндөрт тавигдана. Шөнийн ээлжнээс буугаад дараагийн ажилд гарах хүртэл амрах, алжаал тайлах, дуртай зүйлээ хийх, гэр бүлдээ цаг гаргах, гээд олон зүйлд бэлдэх хэрэгтэй болдог. Түүний хажуугаар хүнд нөхцөл дэх ажлын алжаалыг эрүүл, зөв, өгөөжтэй хэлбэрээр тайлах. Үүнийг тэрээр хувийн зохион байгуулалт гэж нэрлэсэн. Эрүүл байж ихийг бүтээнэ. Энэ бүгдийг хөдөлгөөн спорт нөхнө гэдгийг уурхайчин хүн сайн ойлгох ёстой гэсэн. Тиймээс ч Д.Батжаргал дарга өөрөө волейбол, сагс тоглох, ууланд алхах дуртай. Цехийн хэмжээнд болох олон нийтийн ажилд идэвхтэй оролцоно. Түүний энэ манлайлал бусдад сайнаар нөлөөлнө.

🏭 Цаг үе шинэчлэгдэж байна. Хагас зуун жилээ угтаж буй Дулааны цахилгаан станцын нийт ажилтны 80 орчим хувь нь залуучууд болжээ. Энэ бол яах аргагүй л хөгжил дэвшлээ дагасан эрэлт, хэрэгцээ. “Нөгөө талаас, дулаан, цахилгааны нарийн мэргэжилтнүүдийг урьж ажиллуулах, ажилтнуудынхаа мэдлэг чадварыг дээшлүүлэхэд станцын одоогийн дарга Г.Мөнх-Эрдэнэ, Ерөнхий инженер Д.Дарханбаяр болон Үйлдвэр техникийн товчооны удирдлага, хамт олны зүгээс санал санаачилга дэвшүүлэн, шинэлэг шийдэл, шуурхай арга барилыг уялдуулан ажиллаж байна. Энэ бүхэн дараагийн хагас зуунд Дулааны цахилгаан станцаа хөгжлийн шинэ шатанд авч явах хүний нөөцийн бүхэл бүтэн үед оруулж буй алсыг харсан хөрөнгө оруулалт. Станц маань ирээдүйд зуухны хүчин чадлыг нэмэгдүүлж, үйлдвэрлэлийн бүтээмжээ тасралтгүй дээшлүүлэх нь бид бүгдийн томоос том мөрөөдөл, зорилт” гэж Ээлжийн дарга Д.Батжаргал хойч үе, хөгжлийн түүчээ, тэдгээрийг зангидах бодлого, төлөвлөгөөний талаар бодлоо хуваалцлаа.

🏭 Хамт олон дотроо дахиад нэг бүл бүтээдэг ээлжийн ажилчдын онцлог, сайхан бөгөөд хэцүү зүйлүүд нь ч одоо түүний ажил, амьдралын хамгийн дотно хэсэг болжээ. “Бүхий л зүйлд хамт байж, жаргал зовлонгийн орчил бүхэнд сэтгэл зүтгэлээрээ хөдөлмөрлөж ирсэн хамт олондоо хамгийн их талархан, баярлаж, улс орон, хүн арддаа түгээх гэрэл гэгээ, илч дулааны цацраг бүхэнд шингээсэн хүч хөдөлмөрт нь мэхийх учиртай” хэмээсэн түүний сэтгэлийн үгийг тэмдэглэлийнхээ төгсгөлд шигтгэе.

🏭 Зуун дамжсан үйлдвэрийн “гал голомт”-д нэр төртэй хөдөлмөр зүтгэлээ зориулсаар яваа Ээлжийн дарга Д.Батжаргалын гучин гурав дахь намар айсуй.

🖋 М.БАЛЖИННЯМ
📸 Б.БАТТӨГС

#ЭрдэнэтҮйлдвэр #ДулааныЦахилгаанСтанц

14/09/2026

УДИРДАХ АЖИЛТНЫ ШУУРХАЙ ЗӨВЛӨГӨӨНИЙ ТОЙМ

✅Эрдэнэт үйлдвэрийн удирдах ажилтнуудын ээлжит шуурхай зөвлөгөөнөөр үйлдвэрлэлийн үйл ажиллагааны явц, хөдөлмөрийн аюулгүй байдал, намар, өвлийн бэлтгэл ажил болон цаг үеийн бусад асуудлыг хэлэлцлээ.

✅Есдүгээр сарын эхний 13 хоногийн байдлаар Эрдэнэт үйлдвэр үндсэн үзүүлэлтүүдээ бүгдийг нь 100-аас дээш хувиар биелүүлсэн байна. Тухайлбал, төлөвлөгөөнөөс 143.2 мянган м³ уулын цул илүү гаргаж, хөрс хуулалтыг 84.9 мянган м³-ээр давуулан гүйцэтгэн, 54.6 мянган тонн хүдэр илүү боловсруулжээ.

ХӨДӨЛМӨРИЙН АЮУЛГҮЙ БАЙДЛЫГ ХАНГАН АЖИЛЛАЖ БАЙНА

✅Өнгөрсөн долоо хоногт үйлдвэрийн хэмжээнд өндөр эрсдэлтэй 12, галын аюултай таван ажил гүйцэтгэсэн байна. Аюулыг мэдээлэх утсанд 12 дуудлага хүлээн авч, дуудлага бүрийн дагуу холбогдох арга хэмжээг авчээ.

✅Мөн урьдчилан сэргийлэх 39, цацрагийн аюулгүй байдлыг хангах чиглэлээр 12 ажил зохион байгуулсан бөгөөд хөдөлмөрийн аюулгүй байдал, эрүүл ахуйн зөрчил, дутагдалгүй ажилласан байна.

✅Үйлдвэрлэлийн хэвийн үйл ажиллагаанд шаардлагатай дизель түлшний өвөл, зуны нийт нөөц 34 хоногийн хэмжээнд байгаа бөгөөд цаашид нийлүүлэлтийг тасралтгүй, хэвийн байлгахад анхаарч ажиллаж байна.

НАМАР, ӨВЛИЙН БЭЛТГЭЛ АЖИЛ 67.6 ХУВИЙН ГҮЙЦЭТГЭЛТЭЙ БАЙНА

✅Бүтцийн нэгжүүд намар, өвлийн бэлтгэл ажлаа батлагдсан хуваарийн дагуу үргэлжлүүлж байна. Нийт 295 ажил төлөвлөснөөс 102 ажил бүрэн хэрэгжиж, бэлтгэл ажлын дундаж гүйцэтгэл 67.6 хувьтай байна.

ЭДИЙН ЗАСАГ, ХӨГЖЛИЙН ЯАМНЫ ТӨЛӨӨЛӨЛ ЭРДЭНЭТ ҮЙЛДВЭРТ АЖИЛЛАЛАА

✅Өнгөрсөн долоо хоногийн сүүлээр Монгол Улсын Тэргүүн Шадар сайд бөгөөд Эдийн засаг, хөгжлийн сайд Ж.Энхбаяр тэргүүтэй тус яамны мэргэжилтнүүд Эрдэнэт үйлдвэрт ажиллаж, үйлдвэрлэлийн үйл ажиллагаа болон хэрэгжүүлж буй төсөл, хөтөлбөрүүдтэй танилцлаа. Энэ үеэр Ил уурхай, “Ил уурхайн хөрсний тээвэрт мөчлөгт урсгалт тээврийн технологи нэвтрүүлэх” төслийн бүтээн байгуулалт, Баяжуулах үйлдвэрийн Өөрөө нунтаглах хэсгийн өргөтгөл, шинэчлэл, Авто тээврийн цехийн технологийн тээврийн автомашины засварын хэсгийн үйл ажиллагаатай танилцсан байна. Мөн “Эрдэнэт үйлдвэр” ТӨҮГ-ын Ерөнхий захирал Г.Ёндон үйлдвэрийн үйл ажиллагаа, цаашдын зорилтын талаар мэдээлэл өгч, хөрөнгө оруулалт, үйлдвэрлэлийн өсөлт, нэмүү өртөг шингэсэн үйлдвэрлэл, экспортын чадавхыг нэмэгдүүлэх чиглэлээр санал солилцжээ.

✅Шуурхай зөвлөгөөний төгсгөлд Ерөнхий инженер Т.Батмөнх үйлдвэрлэлийн үйл ажиллагаатай холбоотой цаг үеийн асуудлаар холбогдох удирдлагуудад үүрэг өглөө. Түүнчлэн, ажилчдын хөдөлмөр хамгааллын хувцас шинэчлэгдэж байгаатай холбоотойгоор шаардлагатай бараа материалыг хугацаанд нь нийлүүлж, ажил тасралтгүй үргэлжлэх нөхцөлийг бүрдүүлэхэд анхаарч ажиллахыг санууллаа.

🖋 Б.УЧРАЛ

https://erdenettoday.mn/art/7425

#ЭрдэнэтҮйлдвэр #УдирдлагуудынӨргөтгөсөнШуурхай

Эрдэнэт үйлдвэрийн удирдах ажилтнуудын ээлжит шуурхай зөвлөгөөнөөр үйлдвэрлэлийн үйл ажиллагааны явц, хөдөлмөрийн аюулгүй байдал, намар, өвлийн бэлтгэл ажил бол....