13/08/2024
Сүүлийн өдрүүдэд Зөвлөхийн ёс зүйн талаарх асуудал хөндөгдөж энэ салбарт идэвхтэй ажилладаг зөвлөх экспертийн хувьд санал бодлоо бичээрэй гэсэн хүсэлтийг хэд хэдэн хүмүүсээс авсны дагуу ийнхүү хуваалцсү. Бизнесийн зөвлөх үйлчилгээний салбарт ажилласаар 20 гаруй жил болжээ. Зөвлөхийн ажлыг яг л эмчийн ажилтай дүйцүүлж ойлгож болно. Хүмүүс эрүүл мэндийн хувьд асуудал гарвал эмнэлэг, эмчид ханддаг шиг бизнесүүд асуудал тулгарсан үедээ ихэнхдээ Зөвлөхүүд рүү ханддаг. Бид эмчид үзүүлэхдээ ямар зовуурьтай байгаа, юу өвдөж байгаагаа илэн далангүй хэлж, олон төрлийн шинжилгээ хийлгүүлсний дараа зөв оношоо тогтоолгон эмчилгээ хийлгэн илааршдагтай адил процесс зөвлөх үйлчилгээний төслийн үеэр явагддаг. Өөрөөр хэлбэл зөвлөх үйлчилгээ итгэлцэл хэмээх гарт баригдаж нүдэнд үзэгдэхгүй ч, хүний сэтгэлд л байдаг холбоос дээр тулгуурлан явагддаг онцлог харилцаа бөгөөд үйлчлүүлэгч талаас зөвлөхөд хандан мэргэжлийн туслалцаа авахын тулд бизнесийн үүх түүхээс эхлээд бизнесийг өнөө хүртэл хөгжихөд нөлөөлсөн бүхий л хүчин зүйл, систем тогтолцоо, дотоод дүрэм журмууд, Бизнес төлөвлөгөө, биет ба биет бус хөрөнгө, давуу болон сул талууд, өрсөлдөөний хүчин зүйлүүд, зах зээлийн онцлог болон цаашид хөгжих боломжууд, бизнесийн ноү хау-гаа уудлан тайлбарлаж, үзүүлж харуулна. Харин зөвлөхийн зүгээс Зөвлөх үйлчилгээний гэрээ, Ажлын даалгавар болон Ёс зүйн кодексийн дагуу консалтингийн үйлчилгээгээ үзүүлэх ба консалтингийн төслийн хүрээнд олж авсан мэдлэг, мэдээллийг зөвшөөрөлгүйгээр бусдад хэлэх, дамжуулах, хэвлэн нийтлэх, тэр тусмаа ашиг хонжооны сэдэлтэйгээр хувьдаа ашиглах бол бүр ч хориотой. Энэ бүх харилцааг дээр дурдсанчлан Зөвлөх үйлчилгээний гэрээ, Нууц хадгалах гэрээнд тусдаа бүлэг болгон оруулсан байдгаас гадна Зөвлөхийн ажил хийж байгаа л бол Consulting Ethics Code-ийг дагаж мөрдөх ёстойг үндэсний хэмжээнд ч, олон улсын түвшинд ч алхам тутамд Зөвлөхүүдээс шаарддаг. Онлайн орчинд яригдаж байгаа асуудлаар холбогдох хүмүүсийн постыг гүйлгэж харсан миний хувьд энэ нь зөв, энэ нь буруу, энд алдаа гарсан, тэнд зөрчсөн байна хэмээн дүгнэлт хийх ямар ч боломжгүй байгааг та бүхэн ойлгох буй заа. Зөвлөхийн ажил сэтгэл хөдлөл дээр бус баримт, мэдээ материал, анхдагч болон хоёрдогч найдвартай эх үүсвэрээс авсан мэдээлэл дээр тулгуурлан анализ дүн шинжилгээ хийх замаар хамрагдах хүрээнд явагддаг бөгөөд надад одоогоор анализ дүгнэлт хийхэд шаардагдахуйц найдвартай эх үүсвэрээс авсан хангалттай хэмжээний мэдээ, мэдээлэл байхгүй болохыг мэргэн уншигч та болгоох буй заа. Энэ дашрамд өөртөө болон бусад зөвлөхүүддээ хандан нэг зүйлийг сануулахад “Нэг үхрийн эвэр доргивол, мянган үхрийн эвэр доргидог”-ийг бүү мартаарай. Хэн нэг нь мэргэжлийн юмуу ёс зүйн алдаа гаргавал бусад зөвлөхүүддээ сөргөөр нөлөөлдөг болохыг санаж явахад илүүдэхгүй буй заа. Эцэст нь итгэлцэл хэмээх эмзэг холбоос дээр тогтож, мэдлэг, туршлага, уураг тархины чадвараа үнэ цэнэ болгон хувиргадаг консалтингийн ажлаа өндөр ёс зүйтэй, нэр төртэй хийж явахыг Зөвлөхүүддээ уриалъя.
