28/10/2024
Хаяад яв, чи илүүг хүртэх эрхтэй.
Сүүлийн үед хүний нөөцийн чиглэлийн бизнес, платформ, тэднийг санаачилж ажиллуулж байгаа ИнфЛҮҮЗЕРүүд нэг ойлголтыг маш ихээр урвуулан ашиглаж (abuse) байгаа харагдана. Тэр нь "Танд тохирохгүй ажлын байрыг хаяад яв, та бол мундаг, бусад нь суга". Мэдээж хэрэг бид ажлаа аль болох их сольж байвал тэдний бизнес амжилттай явна, ашиг орлого их олох болохоор тэр л дээ.
Наана уу, цаана уу бодолгүй, хангалттай төлөвшөөгүй, нөхцөл байдлыг бүрэн дүүрэн мэдэхгүй хүмүүст энэ нь сөргөөр нөлөөлнө үү гэхээс сайныг авчрахгүй. Ер нь асуудлаас зугтаад сайжирсан зүйл үгүй, шийдвэрлэхгүй л бол биднийг мөнхөд дагна.
Орхиод явах сонголт нь зарчмын хувьд хамгийн сүүлийн хувилбар юм. Дарааллаараа бол эхлээд нөхцөл байдалд, өөртөө, ажлын орчиндоо, эргэн тойрондоо дүн шинжилгээ хийх. (Аливаа асуудлын мөн чанарыг 5 удаа "Яагаад" гэдэг асуултаар олдог аргачлал ч бий)
Асуудлын мөн чанарыг олсон бол өөрчлөлтийн эзэн байж манлайлах. Чадахгүй бол чадах хүмүүст нь, (мэдээж бүгдээрээ муу биш, сайн муу нийлж сав дүүрдэг) эерэг хандлагатай, бидэнтэй адилхан бодолтой хүмүүстэй хамтарч өөрчилж болно. Буруу зүйл анхнаасаа буруу байдаггүй, урт хугацаанд өөрчлөгдөж явсаар өнөөдрийн нөхцөл байдалд хүрсэн байдаг. Тиймээс огт өөрчлөх боломжгүй БИШ юм.
Гэхдээ бусдыг, байгууллагын соёлыг, хүмүүсийн хандлагыг өөрчлөх ихэнхдээ маш урт хугацаа авдаг, заримдаа өөрчлөгдөхгүй ч байж болно. Аан харин бидний 100% хяналтад байгаа зүйл бол бидний өөрсдийн хандлага юм. Аливаа зүйлсэд ямар хариу үйлдэл (Response) үзүүлж байгаагаа өөрчлөхөд л ихэнх асуудлууд амархан шийдэгддэг.
Ер нь ганц ажил ч бус бүхий л зүйлд шууд зугтаах хариу үйлдлийг бүү нэн түрүүнд тавиарай. Зугтсан асуудал биднийг дагасаар л байдаг.
Зургийн тайлбар: "Аз жаргал таны бодлоос бүрэн хамаарна"
