19/03/2021
Л.Гантулга – BTGT компанийг үүсгэн байгуулагч, ерөнхий захирал
КтМС-ийг төгссөн он: 2008
Төгссөн мэргэжил: Програм хангамж
Аль улсад амьдардаг: Монгол, Улаанбаатар
Одоогийн хийдэг ажил, албан тушаал: BTGT компанийг үүсгэн байгуулагч, ерөнхий захирал
Ашигладаг сошиал хаягууд:
Гантулга Лхагвадорж (фэйсбүүк)
Вэб сайт: www.gps.mn
📣 КтМС-с сурч ойлгож авсан нэг зүйлээ бидэнтэй хуваалцаач?
КтМС өөрөө брэнд сургууль байсан л даа. Брэнд болгоход нөлөөлсөн гол хүчин зүйл нь багш, сургалтын чанараас гадна элсэгчдийн чанар. Үнэхээр сайн шилдэг хүүхдүүд элсдэг болохоор бид бие биеэ хурцлаад их зүйлийг богино хугацаанд үр дүнтэй сурч чаддаг байсан нь харагддаг юм. Тааруу байсан хүүхэд ч сайн болохоос аргагүй тийм хүрээлэлтэй. Мөн миний одоо ч хүндэлж явдаг Батзолбоо тэргүүтэй багш нарын идэвхээр хуурч болдоггүй оюутнаас жинхэнэ чадвар, мэдлэг, логикийг нь шалгадаг чанга хичээлүүд ордог байсан. Шүүсийг нь шахна гэдэг чинь л яг болдог байлаа.
📣 Одоо хийж буй ажлаа танилцуулаач, энэ ажлаас тань өөрт хамгийн их таалагддаг зүйл тань юу вэ?
Би оюутан байхдаа л өөрийн компаниа байгуулаад мэргэжлээрээ ажиллаж эхлээд одоо хэдийн 14 жил болжээ. Мэргэжилдээ дурлах, энэ чиглэлийг сонирхох хүсэл минь огтхон ч буураагүй. Манай компанийн хөгжүүлсэн GPS систем бидний нэрийн хуудас болдог. Мөн сүүлд 2 жилийн өмнө сургуулийнхаа Робоконы багийг ивээн тэтгэж, улсын аварга баг болгосон. Энэ мэтээр сургуулийнхаа оюутнууд, хүрээллээ дэмжин, хамтын ажиллагаатай байхыг хичээдэг.
📣 Таны ажлын карьерт тохиолдсон хамгийн том сорилт болсон зүйл юу байсан бэ?
Програмын хүн удирдлагын ажил хийх нь үнэхээр том сорилт байдаг. Тоо, тооцоолол, програмын чиглэлийн хүмүүс нэлээд дотогшоо хүмүүс байдаг гэдгийг ер нь хүмүүс мэдэх л байх. Гэтэл хийхийг хүссэн зүйлээ бусдаас хамааралгүйгээр хийхээр бие даагаад компани байгуултал програм бичихээс гадна давхар үйл ажиллагаагаа удирдах үүрэг хариуцлага ирдэг.
Уг нь би чинь КтМС-ийн буюу компьютер техник, менежмент хосолсон сургуулийн оюутан ч гэлээ надад удирдлага менежментийн мэдлэг байдаггүй байлаа. Нөгөө талаас менежментийнхэн ч програмын хичээл судлалгүй төгсдөг байсан. 21-р зуунд менежмент, технологи хоёр хосолж байж л сайтар хөгжинө. Уг нь үүнийгээ салгах биш улам ч нэгтгэж цогц байлгасан бол гэж хааяа бодогддог.
📣 Ажлын бүтээмжээ өсгөхөд ашигладаг ноу хау-аасаа хуваалцаач?
Шөнөөр л суух юм уу даа. Яагаад гэвэл утас дуугарахгүй, хүн дуудахгүй, уулзалт товлогдохгүй энэ цаг бол програмистуудын хувьд гараасаа юм гаргах хамгийн боломжтой чухал цаг.
📣 Хамгийн сүүлд ямар сургалтад хамрагдсан бэ?
Google, Stackoverflow л юм байна. Суурь чадвараа олж авах чухал үедээ сайн сурч чадвал ажлын талбар дээр гараад үйл явц дунд шаардагдах бусад зүйлсийг хамт олон, Google зэрэг олон эх сурвалжаас үнэгүй, хурднаар авах боломж бүрдсэн цаг үед амьдарч байна. Түүнийхээ хэргийг гаргах хэрэгтэй.
📣 Ойрын 5 жилийн зорилго?
Миний хувьд эхлээд дотоодын зах зээл дээрээ тодорхой хэмжээний амжилт олж, шаардлагатай хүмүүст өөрийгөө баталж байж дараагийн алхмаа хийнэ гэдэг бизнесийн арга барил, үзэл бодолтой. Энэ ч зарчмаараа ажиллаж ирсэн. Одоо бидний дараагийн төлөвлөгөө бол илүү өргөн цар хүрээнд буюу гаднын зах зээлд компанийнхаа үйл ажиллагаа, бүтээгдэхүүнийг гаргах.
📣 Залууст өгөх зөвлөгөө?
Зөвхөн онолын мэдлэг, хичээлээс гадна бизнесийн харилцаа, хэлэлцээр буюу илүү практикт чиглэсэн чадваруудыг олж авахад анхаараарай. Ялангуяа програмаар сурч буй оюутнуудад хэлэхэд дэлхийд амжилттай яваа компаниуд, дотоодын томоохон стартапуудын удирдлага ихэнхдээ технологи суурьтай хүмүүс байдаг. Өөрөөр хэлбэл програмист нь өөрөө компаниа удирдаж буй компаниуд илүү амжилттай байна. Тиймээс програмаас гадна бизнесийн чиглэлээр өөрийгөө хөгжүүлээрэй.
📣 Дараагийн дугаарт санал болгох нэг төгсөгч: /хэдэн онд ямар мэргэжлээр төгссөн, одоо хаана ажиллаж байгаа төгсөгч вэ?/
Манай ангийн Ц.Тамир (Tamir Tsog) гээд Монгол банканд ажиллаж буй програмист найз маань байна. Улсын төв банкны IT технологийг хариуцаж яваа мэргэжилдээ чадварлаг залуу. Ер нь манай сургуулийн төгсөгчид бүгд сайн яваа. Тийм учраас сургуулиараа бахархдаг.
