15/03/2026
Хамт явж байгаа Герман эмээ надад захиж хэлж байна
"Залуу хүн зүгээр сууж болохгүй ээ. Амьдралаа задгай мөнгө шиг үрж болохгүй. Би залуудаа өдөрт 16 цаг ажиллаж, гурван ажил зэрэг хийдэг байсан. Профессорын зэргээ хамгаалахдаа түвдэд хөдөө хээр тосгонд байж таарав. Тэнд ямар ч тог, интернет байхгүй. Тиймээс би 4 лаа асаагаад дессертац (дипломын ажил гэж ойлгож болно) -аа 7 хоног шөнө бүр сууж бичиж дуусгасан. Хоёрдугаар дайны дараа германд амьдрал тун хүнд байсан. Бүр цаасны өөдөс ч олдохгүй тийм хүнд. Тиймээс би одоо болтол дэлгүүрээс авсан юмныхаа цаасан хайрцгийг ураад бичиж тэмдэглэх гэх мэтэд ашигладаг. Та нар аривч хямгач байх ёстой. Тэгж байж хөрөнгө тогтоно. Надад сошиал ямар ч хаяг байхгүй. Одооны залуусыг хараад сэтгэл минь өвдөж байна. Өдөржин шөнөжин утас шагайж, өөрийгөө тэнэгрүүлж байна. Монголд ирэх үед ажил ихтэй байдгаас болоод уншиж амждаггүй. Харин гэртээ байх үедээ 2 хоногт нэг ном уншчихдаг. Тэрнийхээ хүчинд би англи, испани, итали хэл сурч чадсан. Би одоо 70 гарсан ч өдөржин ажиллаж л байна. Монголчууд тэтгэвэрт гараад л гэртээ суучихдаг. Тэр нь сэтгэл санааны хямрал, өвчний шалтгаан болдог. Би үхэн үхэтлээ ажилласаар байх болно" гээд цаашаа бичвэл нэлээд юм байна.
Би энэ хүнээс ичдэг. Учир нь энэ хүн бидний өөрсдөө тоохоо болиод буй соёлын өв уртын дуу, гар урлал, ёс заншил бүгдийг нь сэргээхийн тулд 1995 оноос маш их хөрөнгө мөнгө зарцуулж байгаа. Миний мэдэхгүй уртын дууг дагаад дуулчихдаг. Биет бус соёлоо тээж яваа уртын дууч, хөөмийч, туйл хайлагч хүмүүсийг үр хойчдоо уламжлалт өвөө зааж сургаарай гээд сар бүр тэтгэмж өгдөг. 20- иод жил сар бүр үнэгүй тэтгэмж авч байна гээд төсөөл дөө. Манай соёлыг ингэж их хамгаалж байхад бидний байж байгаа царай. Сар болгон бэлэн мөнгө авчихаад хүүхдүүддээ зааж сургасан юм байхгүй, давхар ажил хийж байгаад баригдах юм. Ичиж үхмээр. Хувцас хунар, эд зүйлсийг нь бас хулгайлсан байгаа юм. Олон удаа шүү. Хүний өмнөөс ичнэ гэдэг ямар ч хэцүү юм. Ковидын үеэр хил хаагдаад 2 жил ирэхгүй сураг алдрах үеэр нь ядарсан хэдэн өв тээгч нарт өгдөг тэтгэмжийг нь хотод суудаг 1 эгч "тэр герман хүн ковидоор үхсээн" гэж худал хэлээд голоос нь мөнгийг 2 жил хувьдаа завшчихсан. Дандаа бэлэн төсөл энэ тэр авч идээд хар амиа хичээсэн, залхуу бэлэнчлээд сурчихсан.
Бид ер нь мөхөл рүүгээ өөрсдөө л явж байгаа юм шиг байна.
Ингэж их өөрийг нь гомдоож байхад ахиад тусална аа, ирэх жил ирнэ ээ гээд доголон нулимстай инээсэн зогсох юм. Яагаад ингээд байдаг юм болоо гэж их бодлоо. Өчигдөр орой Алтайн магтаал хайлахыг сонсоод бүгдийг нь эхнээс нь дуустал дагаж дуулаад сэтгэл нь амарч уужирч байгаа харагдсан. Магадгүй дууны хүч энэ хүнийг ховсдоод өдий болтол ийн явуулж байж болох л юм.
