27/05/2026
“Би л хийхээс өөр аргагүй бизнесийг яах вэ?”
“Унтаж байхад мөнгө орж ирдэг бизнесийг бий болго. Та хөрөнгө оруулаад л сууна. Баг чинь бизнесийг чинь ажиллуулаад л явна.” гэх мэт хэт маркетингийн өнгө аястай мессежүүд их явдаг.
Та эдгээрийг сонсоод “Сайхан үлээж байна аа” гэж боддог уу?
Би лав тэгж боддог хэхэ.
Би үйлчилгээгээ үзүүлэхийн тулд маркетинг хийдэг. Гэхдээ сайхан зүйл амлаж, тархи угаах маягийн маркетинг надад огт таалагддаггүй.
Захирлаас хамаарал багатай бизнесийг бий болгох боломжтой. Гэхдээ амархан биш.
Ялангуяа нэг маш хэцүү асуудал бий.
Хэрэв хамгийн чухал know-how нь танд л байдаг, тэгээд тэрийгээ хүнд шилжүүлэх бараг боломжгүй бол яах вэ?
Энэ хамгийн хэцүү хэсэг нь.
Манай Гүйцэтгэх захирлыг мэргэшүүлэх хөтөлбөр-т хамрагдсан нэг захирал надад нэг удаа хатуухан үнэнийг хэлсэн юм.
“Багшаа, та захирлаас хамааралгүй бизнес бий болго гэж ярьдаг мөртлөө өөрөө сургалтаа хийгээд, өөрөө зөвлөх үйлчилгээгээ үзүүлээд явж байна шүү дээ” гэж.
Энэ үнэн байсан.
Үнэнийг хэлэхэд ийм асуулт ирэхийг би дотроо гадарладаг байсан.
Тийм ээ. Энэ зөвхөн манай компанийн асуудал биш. Манай салбарын асуудал.
Ихэнх зөвлөх компаниуд мэдлэг туршлагатай, авьяастай нэг хүн дээр дөрөөлж босдог. Тэгээд тэр хүн нь шантрахад компани нь хамт нурдаг.
Үнэндээ захирлуудад хүлээн зөвшөөрөгдөх хэмжээний сургалт, зөвлөх үйлчилгээ үзүүлнэ гэдэг маш олон төрлийн ур чадвар шаарддаг.
Тэр чадварыг хүнд өвлүүлж сургана гэдэг бол маш урт хугацааны ажил.
Иймэрхүү асуудалтай бизнес манай салбарт ч гэлтгүй олон бий.
Рестораны захирал маш гоё хоол хийдэг тогооч бол гал тогооноосоо хөндийрч чаддаггүй.
Эмнэлгийн захирал мундаг туршлагатай эмч бол хүнээ үзээд л суудаг.
Тэд захирал мөртлөө үйлчилгээний ажилтан давхар хийдэг.
Эндээс би нэг зүйлийг ойлгосон.
Зарим бизнес дээр үнэхээр захирлаасаа салгах хэцүү know-how байдаг.
Гэхдээ хүмүүс нэг алдаа их гаргадаг.
“Үүнийг бүхэлд нь шилжүүлэх боломжгүй” гэдгийг “Юуг нь ч шилжүүлэх боломжгүй” гээд ойлгочихдог.
Яг үнэндээ хийж буй ажлын дотор бусдад шилжүүлж болох олон хэсэг байдаг.
Би танд нэг бодит жишээ хуваалцъя.
Би эрэгтэйчүүдийн Цэпү эмнэлгээр үйлчлүүлж байхдаа энэ санааг маш тод харсан.
Тэр жижигхэн эмнэлэг. Нэг л мундаг эмчтэй. Мэдээж тэр бас захирал нь.
Би түрүү булчирхайн шинжилгээ өгөөд тэр эмчид үзүүлсэн.
Тэр эмч надад бараг 10 минут л зарцуулсан. 10 минутын үйлчилгээ – муу үйлчилгээ шиг сонсогдож байна уу. Үгүйээ үр дүн нь гарч би өвчнөө зөв эмчилж чадсан.
Тэр 10 минутад миний асуудал болон хэрхэн эдгээхийг маш ойлгомжтой тайлбарласан. Олон зүйл яриагүй, зөвхөн хамгийн чухал зүйлсийг л тэр тайлбарласан.
Тэгээд нэг урьдчилан хэвлэж бэлтгэсэн зөвлөгөө бүхий цаас өгөөд, эм бичиж өгөөд бусдыг нь сувилагч тайлбарлаж өгнө гээд намайг бушуухан гаргасан.
Дараа нь эмээ хэрхэн уух, дэлгэрэнгүй заавар, нэмэлт зөвлөгөө, тайлбаруудыг нь өөр сувилагч өгсөн.
Бас тэр зөвлөгөө бүхий цаас дээр миний мэдэх ёстой маш олон хэрэгтэй зүйл байсан.
Тэр эмч процесс дээр юуг нь өөрөө хийх, юуг нь сувилагч хийх, юуг нь цаасаар өгөхөө шийдчихсэн байсан.
Энд хамгийн чухал нь юу вэ?
Эмнэлгийн зорилго бол хүнд цаг зарцуулж мөнгө олох биш. Зорилго нь хүний асуудлыг шийдэх.
Өөрөөр хэлбэл тэд зорилгодоо тохирсон процессыг бий болгосон байсан.
Эндээс л би нэг чухал зүйлийг ойлгосон.
Захирал өөрийгөө бүрэн орлуулах боломжгүй байж болно. Гэхдээ өөрийн ажлын маш олон хэсгийг бусдад шилжүүлэх боломжтой байдаг.
Тэр хэсгүүдийг ялгаж харах хэрэгтэй. Тэгээд процесс болгох, журамлах, хүн сургах, үүрэг хуваарилах ажлыг хийж эхлэх хэрэгтэй.
Ихэнх захирал “би л хийхгүй бол болохгүй” гэж боддог ажлынхаа дотор шилжүүлж болох олон зүйлтэй байдаг.
Ийм асуудлуудыг бид Гүйцэтгэх захирлыг мэргэшүүлэх хөтөлбөр дээр НМТ тогтолцооны аргачлалаар системтэй авч үздэг.
Магадгүй олон жилийн туршлагаар ойлгох байсан зүйлээ та илүү хурдан ойлгож, хэрэгжүүлж чадна.
Хөтөлбөрийн дэлгэрэнгүй:
👉 www.nmt.mn/ceo
