14/05/2026
Сүүлийн үед нэг зүйл дээр дуугүй өнгөрч болохгүй санагдах боллоо.
Манай компанитай GPS хяналт, телематик үйлчилгээ авах гэрээ байгуулсан харилцагч авто тээврийн холбогдох байгууллага Автотээврийн Үндэсний Төв дээр очиход “заавал манай систем дээр бүртгүүл” гэсэн шаардлагатай тулгарч, эцэст нь бидэнтэй хийсэн гэрээгээ цуцалсан тохиолдол гарлаа.
Энэ бол зүгээр нэг компанийн алдагдсан борлуулалтын асуудал биш.
Энэ бол төрийн байгууллага зах зээл дээрх хувийн хэвшлийн бизнесийн сонголт, шударга өрсөлдөөнд шууд нөлөөлж байгаа маш ноцтой асуудал юм.
Нэг талдаа төр “хувийн хэвшлээ дэмжинэ”, “төр бизнес хийхгүй”, “өрсөлдөөнийг чөлөөтэй болгоно” гэж ярьдаг.
Нөгөө талдаа бодит байдал дээр хувийн компаниудын байгуулсан гэрээг төрийн байгууллагын нэр нөлөөгөөр хүчингүй болгож, хэрэглэгчийг тодорхой нэг систем рүү шахаж байгаа нь ёс зүйтэй үйлдэл мөн үү?
Хувийн хэвшил хөрөнгө оруулж, ажлын байр бий болгож, татвар төлж, олон жил хөдөлмөрлөж байхад төр өөрөө өрсөлдөгч болж орж ирээд зах зээлийг булаах оролдлого хийж болохгүй.
Хэрэглэгч хэний системийг сонгохоо өөрөө шийдэх эрхтэй байх ёстой.
Шударга өрсөлдөөн гэж байгаа бол чанар, үйлчилгээ, үнэ цэнээрээ өрсөлдөх ёстой болохоос “манайхыг л ав” гэсэн шахалт байж болохгүй.
Өнөөдөр дуугарахгүй өнгөрвөл маргааш энэ асуудал зөвхөн GPS салбар дээр биш бусад бүх салбарт давтагдана.
Төр зохицуулагч байх ёстойгоос биш, хувийн хэвшлийн бизнесийг шахдаг тоглогч байж болохгүй.
Цаашлаад тээврийн ХХК-уудаас ашиглаагүй үйлчилгээний төлбөрийг хурааж бизнес эрхлэгчдийг хохироодог үйлдлүүд ч олон бий.
Монгол Улсын Засгийн газар Uchral Nyam-Osor Автотээврийн Үндэсний Төв Зам, Тээврийн Яам
