31/03/2026
Маркетинг сэтгүүлийн 2026.02.23 өглөөний нийтлэл.
2026.02.23
Японы Фүжи банкны логоны түүх.
1979 онд Японы Fuji Bank нь өөрийн логогоо танилцуулсан байдаг. Нэртэй график дизайнер Yūsaku Kamekura дизайныг нь гаргасан бөгөөд сэдлийн хувьд Япончуудын хүндлэн биширдэг, хамгийн өндөр уул болох Фүжи уулны дүрслэлээс авч ашигласан билээ.
Фүжи уул нь билэгдлийнхээ хувьд тогтвортой байдал / stability болон үндэсний бахархал / national pride болдог тул Fuji Bank-ны эрхэм зорилгод нийцэж байлаа.
Kamekura нь уулын дүрслэлийг кубист минималист формд оруулсан бөгөөд логонд дөрвөлжин хэлбэрийг сонгон, өнгөний палеттийн хувьд 1/3 нь цэнхэр, 2/3 нь ногоон харьцаатайгаар шийдсэн нь шинэлэг байдал, залуулаг байдлыг илэрхийлэх зорилготой байсан.
Fuji bank-ны зүгээс тухайн үед бизнесийн стратегийн хувьд шинэчлэлийн стратеги хэрэгжүүлж, илүү орчин үеийн байдлаар Японы банкны системдээ хүчтэй өрсөлдөөн үзүүлэхүйц байр сууринд очих эрмэлзэлтэй байсан.
Фүжи уулын минималист дизайн нь ерөнхийдөө адил хажуут тэгш өнцөгт хэлбэртэй бөгөөд дөрвөлжин хүрээнд багтсан байсан. Банкны өв уламжлалыг урагш чиглэсэн бодлоготой нь хамтатган гаргаж чадсан гэж үздэг.
Шинэ логоны үр дүнд банкны хадгаламжийн хэмжээ, нийт харилцагчийн тоо нэмэгдсэн байдаг.
Түүхийн хувьд дэлхийн 2-р дайны дараагаар буюу 1948 оноос Yasuda Bank нь шинэ зохион байгуулалтад орж Fuji Bank болсон бөгөөд өмнөх логог ашиглаж байсан. Тухайн үеийн логоны хувьд хувьцаа эзэмшигч, харилцагч, ажилтан гурвын нэгдэл байдлаар мөнгийг дүрсэлсэн дугуй загвартай байсан байдаг.
Японы эдийн засаг үсрэнгүй хөгжихийн хэрээр банканд шинэ шаардлага тулгарав. Фүжи банкны бизнес цар хүрээгээрээ томорч, олон улсад гарч эхэлсэн тул үүнийгээ илтгэсэн имиж шинээр боловсруулах хэрэгтэй болсон. Банкны шинэ имиж нь илүү тодорхой, мэргэшсэн байдлыг илэрхийлсэн, медиа олон хэлбэрт тохиромжтой, хамгийн гол нь олон улсад корпоратив брэнд шинжтэйгээр ойлгогддог байх шаардлагатай байв.
Ингээд 1988 онд Fuji Bank нь глобал брэндинг фирм болох Landor Associates-т хандан логогоо шинэчлүүлсэн байдаг. Шинэчлэгдсэн лого нь илүү корпорате эстетиктэй, илүү шууд илэрхийлэмж, ойлгомжтой болж чадсан.
Нийгмийн хөгжлийг дагаад корпорате стратегиуд өөрчлөгддөг хуулийн дагуу брэнд имижийн дараагийн шинэчлэлийн хүрээнд шинэ логотой болсон билээ.
Landor Associates-ийн бүтээсэн шинэ лого 1988 оны 10-р сарын 1-нд танилцуулагдсан. Банкны үүх түүх, өв соёлыг хадгалахын зэрэгцээгээр олон улсад корпорате имижээр танигдахад нь туслах зорилготой байсан. Дөрвөлжин хэлбэр хэвээр хадгалагдаж, харин Фүжи уулын дүрслэл илүү уул гэж танигдахаар болж өөрчлөгдсөн. Үндсэн өнгөний харьцаа буюу цэнхэр, ногоон өнгө хадгалагдсан. Брэндийн нэрийн тайпографийг маш нарийн мэргэжлийн төвшинд сонгосон байдаг.
Fuji Bank нь тухайн үедээ 20-р зууны дэлхийн санхүүгийн секторт хэрхэн өрсөлдөх вэ гэдэг дээр суурилан ребрэндинг ажлаа хийсний хүрээнд энэхүү шинэчлэгдсэн лого гарч, 12 жилийн туршид ашиглагдаад дараагийн үедээ шилжсэн билээ.
Өдгөө Fuji Bank нь Японы банк санхүүгийн системд дангаараа оршдоггүй. 2000-2002 онд Dai-ichi Kangyo bank болон Industrial bank of Japan-тай нэгдэн Mizuho financial group болсон.
Энэ хэмжээгээгээрээ одоо Японы банк санхүүгийн секторт №3-т бичигддэг. Хамгийн том нь Mitsubishi UFJ Financial group, дараагаар нь Sumitomo Mitsui Financial group ордог байна.
Хэдийгээр банк нь бүтцийн өөрчлөлтөд орсон ч логоны эрх хэвээр хадгалагдаж байх өндөр магадлалтай.
Японд оюуны өмчийн хамгаалалтын хугацаа нь copyright бол зохиогч нас барснаас хойш 70 жил, барааны тэмдэгт / trademark бол 10 жил /сунгагддаг/, дизайны эрх / design right бол бүртгүүлснээс хойш 25 жил тус тус хамгаалагддаг. Хэдий компани логогоо хэрэглэхээ больсон ч албан ёсоор хүчингүй болгоогүй бол гуравдагч этгээд дур мэдэн ашиглаж болдоггүй дүрэмтэй.
Төстэй байдлаар олон улсад, санхүүгээс бусад салбарт ашиглах боломж хэдий байдаг ч Японы зах зээлд орж ирэх бол боломжгүй юм. Мөн мораль яригдаж таарна.
Project Advertising Magazine / goo.gl/uriNr1 /
Мэдээлэлд түрүүлж хүрье!
