26/05/2026
«EXECUTIVE SUMMIT 2026 — STEPPE MANAGER» УДИРДЛАГУУДЫН НЭГДСЭН УУЛЗАЛТ «STEPPE SOUL, SUSTAINABLE GOAL» УРИАН ДОР АМЖИЛТТАЙ ЗОХИОН БАЙГУУЛАГДЛАА
Монгол Улсын Ерөнхий сайд Н. Учралын дэмжлэгээр, Эдийн засаг, хөгжлийн яам болон Монголын Үндэсний Худалдаа Аж Үйлдвэрийн Танхим (МҮХАҮТ)-тай хамтран зохион байгуулсан тус арга хэмжээнд Монгол Улсын тэргүүлэх компаниудын 200 гаруй захирал, удирдах ажилтан нэгдэн оролцлоо.
«Юнайтед Менежмент Консалтинг» ХХК, «Сэтгэл Судлалын Үндэсний Төв» болон «Карьер Хөгжлийн Төв» байгууллагууд хамтран хэрэгжүүлсэн «МОНГОЛ МЕНЕЖЕРИЙН ДҮР ТӨРХ» судалгааны үр дүнг олон нийтэд анх удаа танилцуулсан энэхүү уулзалт нь Монгол Улсын менежментийн салбарт онцгой ач холбогдол бүхий үйл явдал боллоо.
«Real Experience, Data Reflection» — Панелийн хэлэлцүүлэг
Уулзалт нь зөвхөн судалгааны үр дүн танилцуулах хүрээнд хязгаарлагдаагүй бөгөөд дэлхийн түвшний удирдлагын чиг хандлага, шаардлагатай ур чадвар, менежерийн чадамжийн моделийг Монгол менежерийн бодит үзүүлэлттэй харьцуулан шинжилснээр, байгууллагуудад тулгарч буй менежментийн сорилтуудыг даван туулахад ямар хандлага, сэтгэлгээ, ур чадвар шаардлагатайг тодорхойлж, цаашид байгууллагын хөгжлийн бодлогыг зөв чиглүүлэхэд дэмжлэг үзүүлэх зорилгоор «Real Experience, Data Reflection» сэдэвт панелийн хэлэлцүүлэг өрнөв.
Тус хэлэлцүүлэгт Монгол Улсын тэргүүлэх байгууллагуудын C-түвшний удирдлагууд оролцож, бодит туршлагаа судалгааны датанд тулгуурлан хэлэлцсэн:
Эрдэнэт Үйлдвэр» ХХК-ийн Хүний нөөц, захиргааны хэлтсийн дарга О. Отгонбаяр «ТЭСО Групп»-ийн Хүний нөөц, удирдлагын газрын захирал Б. Болормаа «Оюу Толгой» ХХК-ийн Бүрдүүлэлтийн мэргэжилтэн Ш. Амартүвшин «АПУ» ХК-ийн Agile өөрчлөлт, шинэчлэл эрхэлсэн захирал Ш. Дөлгөөн нар оролцсон.
Хэлэлцүүлгийн оролцогчид дэлхийн эдийн засгийн тодорхойгүй байдал, хиймэл оюун ухааны хувьсгал, талент ур чадварын хомсдол зэрэг хавсарсан сорилтуудыг Монгол менежерүүд бодит датанд тулгуурлан, хамтын манлайллаар даван туулах боломжтойг онцолж, орчин үеийн нөхцөл байдалд удирдагчид зөвхөн «мэдрэмж»-ээрээ бус, шинжлэх ухааны үндэслэлтэй мэдээлэлд тулгуурлан шийдвэр гаргах нь цаг үеийн зайлшгүй шаардлага болоод байгааг хамтран тэмдэглэв.
«Talent Зөвлөх AI» — Монголын анхны хиймэл оюуны шийдэл
Уулзалтын онцлох мөчүүдийн нэг нь «Талент Хаб Монгол»-ын менежер Б. Амар-Эрдэнэ-ийн танилцуулсан «Хиймэл оюун ухаанд суурилан талентыг илрүүлэх нь» сэдэвт илтгэл байлаа. Монголын анхны «Talent Зөвлөх AI» хэмээх хиймэл оюуны шийдлийг олон нийтэд анх удаа танилцуулсан нь судалгааны үр дүнг практик хэрэглэгдэхүүн болгон хувиргах чухал алхам болсон юм. Тус шийдэл нь талент менежментэд бодит дата, шинжлэх ухааны үндэслэл ашиглах боломжийг бий болгож байгаа онцлогтой.
Хаалт ба дүгнэлт
Уулзалтын төгсгөлийн хэсэгт «Судалгааны хамгийн өвдөлттэй үнэн аль нь байсан бэ?», «Монгол менежер глобал түвшинд өрсөлдөхөд юу дутаж байгаа вэ?» гэсэн асуултуудаар оролцогчдын дунд санал солилцох хэлэлцүүлэг өрнүүлж, Brainstorming хэлбэрээр оролцогч бүрийн ойлголт, туршлагыг хуваалцлаа.
Уулзалт нь нэтворкингийн уулзалтаар өндөрлөсөн бөгөөд Монгол Улсын тэргүүлэх C-түвшний удирдлагуудын мэргэжлийн хамтын ажиллагаа, сүлжээгээ өргөтгөх дорвитой боломжийг бүрдүүлэв.
