30/07/2025
RASHIN IYA RUBUTU MU'UJIZA CE A GARE SHI:
Rashin iya rubutu da rashin iya karanta rubutu mu'ujiza ce ga Manzon Allah mai tsira da amincin Allah. Watau Allah ne kawai Yake masa wahayi shi kuma sai ya haddace Wahyin cikin zuciyarsa da ƙwaƙwalwarsa sannan ya karanta wa sahabbansa abin da ya haddacen.
Lalle da Annabi ya iya rubutu da karatu da kafurai da munafukai za su ƙara samun karfin guiwar tuhumar sa da cewa wasu littattafai ne ya ke karantowa sannan ya yi ikirarin cewa wahiyi ne Allah Ya yi masa.
Allah Ya ce cikin Suratul Ankabut aya ta 48: ((A gabaninsa ba ka kasance kana karanta wani littafi ba, ba ka kuma (kasance) kana rubuta shi da damarka ba, da kuwa (hakan ya faru to da) da Mutanen banzan sun yi shakka)). وما كنت تتلو من قبله من كتاب ولا تخطه بيمينك اذا لا ارتاب المبطلون.
Kafuran zamanin Annabi mai tsira da amincin sun yadda da cewa bai iya rubutu ba; wannan ma shi ne ya sa s**a yi masa ƙage s**a ce: Alƙur'ani wasu tatsuniyoyi ne da shi Annabi ya nemi wasu su rubuta masa sannan kuma a riƙa koya masa su da baki yana haddacewa safiya da maraice! Allah Ya hikaito maganarsu a cikin Suratul Furƙan aya ta 5 Ya ce: ((S**a ce tatsuniyoyin mutanen farko ne ya nemi a rubuta masa su, waɗanda ake koya masa da baki safiya da maraice)). وقالوا أساطير الأولين اكتتبها فهي تملى عليه بكرة واصيلا.
