Just consulting

Name: Just consulting
Address: Nijmegen, NL
Telephone: +31645476373

Startpagina
Nederland
Nijmegen
Just consulting

Fræðsla og ráðgjöf um jafnrétti og fjölbreytileika á vinnustöðum.

24/04/2026

Spök og meðfærileg bið ég ykkur mildilega um að ota kvenfrelsisáherslum að frambjóðendum. Þær gleymdust nefnilega alveg í stefnuskrám framboðanna. Ágætur listi í hugleiðingu (sjá hlekk í athugasemd) sem gæti sannarlega gert borgina betri.

20/03/2026

Hugleiðing vikunnar er um áhrifavalda mannhvelsins og aðdáendur þeirra. Meðal annars ofbeldismanninn sem hringdi í mig um miðja nótt til að hóta mér og úthúða. Hlekkur í athugasemd.

Góða helgi!

27/02/2026

Hugleiðing vikunnar er um von (hlekkur í athugasemd).

Stundum finnst mér bara allt glatað. Að bakslagið sé að sigra og það þýði bara ekkert að vera að standa í þessari vitleysu. Ég var að detta í slíkt ástand þegar ég sá vitnað í viðtal við Julie Bindel á einhverjum afturhaldsmiðli.

Þá fylltist ég krafti og stolti og þakklæti fyrir íslensku kvennahreyfinguna sem stendur keik gegn transfóbískum áróðri og öðrum tilraunum til að útiloka, sundra og skapa ótta.

Og svo hló ég soldið að áhyggjum þáttastjórnandans yfir bakslagi í kvennabaráttu og að hún skyldi í alvöru halda að hún væri að tala við baráttumann gegn kynbundnu ofbeldi.

Það er von. Af því við stöndum saman. Höldum því áfram!

13/02/2026

Hundaflautið dugar ekki Miðflokknum lengur. Þeir eru orðnir þreyttir á að „spyrja spurninga“, „opna umræðu“ eða „lýsa áhyggjum“ af einhverju til að magna upp rasisma, transfóbíu og kvenfyrirlitningu. Þeir segja slaufunarmenningunni stríð á hendur með því bjóða fram gamlan karl með gerendafortíð.

Fátt bendir til þess að uppstillingarnefnd Miðflokksins hafi hugsað mikið til kvennanna í Ráðhúsinu í vikunni. Eða kvenna yfir höfuð. Hvað þá einnar tiltekinnar konu sem hefur varið mörgum árum í að vinna úr afleiðingum kynferðislegrar áreitni sem hún varð fyrir. Líðan brotaþola kynbundins ofbeldis var ekki í fyrirrúmi þegar oddviti flokksins í Reykjavík var valinn, maður sem er einna þekktastur fyrir að áreita konur.

Hugleiðing vikunnar fjallar um triggera, tilkall og algera hundsun Miðflokksins á upplifunum, líðan og lífi brotaþola.

Hlekkur í athugasemd.

05/12/2025

Hugleðing vikunnar spratt upp úr skrifum Eiríks Rögnvaldssonar um einkunnagjöf - en fjallar um popúlíska aðferðafræði. Lokaorðin eru hér, restin á síðu Just.

"Í raun snýst popúlismi um að spila á tilfinningar almennings. Að ýfa upp tortryggni, andúð og vanlíðan yfir flækjustigi heimsins og sefa svo þessar sömu tilfinningar með meintum töfralausnum. Að þykjast vera með almenningi í liði til þess eins að afla sér fylgis. Popúlismi er aldrei í þágu almennings. Hann er í þágu popúlistanna sjálfra, oftast á kostnað jaðarsetts fólks.

Við verðum að sjá í gegnum blekkingar popúlistanna og við verðum að benda á þær. Eina leiðin til að bæta samfélagið er að greina og skilja og horfast í augu við flókið valdakerfi, afmá þær hindranir sem þar eru og stuðla að virkni, þátttöku og öryggi alls fólks."

28/11/2025

Hugleiðing vikunnar er um fæðingarorlof. Hlekkur í athugasemd.

Það er ósanngjarnt að túlka framkvæmd á skiptingu fæðingarorlofs sem vilja foreldra. Langflest foreldri vilja nýta rétt sinn til fæðingarorlofs og vera sem mest með börnunum sínum. Aukið frelsi til að skipta fæðingarorlofinu er engin töfralausn, enda eru töfralausnir ekki til.

Ef við viljum koma til móts við þarfir og vilja foreldra og barna þarf að draga úr skerðingum vegna ýmist of mikillar eða of lítillar vinnu, vegna náms, ósanngjarnra tímaviðmiða og annarra aðstæðubundinna þátta. Á sama tíma þarf að tryggja að foreldrar geti sinnt börnunum sínum af alúð og skapa samfélag þar sem öll fá að vera þau sjálf, frjáls undan viðjum gamaldags verkaskiptingar og vinnubragða.

21/11/2025

Hugtak vikunnar (hlekkur í athugasemd) er vopnavædd vanhæfni. Fyrirbærið viðheldur ójafnri skiptingu heimilisstarfa í gagnkynja samböndum.

Niðurstaða hugleiðingarinnar er eftirfarandi:

1. Hættum að segja konum að vera duglegri. Þær þurfa ekki að vera duglegri að sleppa og þær þurfa ekki að vera duglegri að umbera.

2. Gerum ekki minni, heldur meiri kröfur til karla. Valið á ekki að standa á milli þess að gera hlutina sjálf eða sætta sig við afleiðingar þess að makinn geri hlutina illa.

Og lokaorðin:

Kæru karlar í gagnkynja samböndum (sem eru af einhverjum ástæðum sárafáir á þessum póstlista). Lítið nú innávið og skoðið hvort þið getið mögulega sýnt meira frumkvæði, vandað ykkur betur, lært að flokka og þvo og gera og græja hluti sem konur ykkar hafa séð um fram til þessa. Ég er nokkuð viss um að þar leynast tækifæri til bætingar.

14/11/2025

Hugleiðing vikunnar fjallar um reiði. Um hvernig hún getur verið jákvætt, uppbyggilegt og áhrifaríkt afl til að stuðla að samkennd, inngildingu og öruggu samfélagi - en líka um hina eyðileggjandi reiði sem verið er að ala á gagnvart jaðarhópum og hefur sundrandi, mismunandi og slæm áhrif fyrir samfélagið.

Hlekkur í athugasemd. Góða helgi!

07/11/2025

Í hugleiðingu dagsins (hlekkur í athugasemd) sagði ég frá því hvernig átak sem virtist í grunninn sanngjarnt og eðlilegt leiddi óafturkræfra afleiðinga.

Tugþúsundir fjölskyldna voru þjófkenndar, gert að greiða óviðráðanlegar upphæðir fyrirvaralaust, misstu æruna, andlega og líkamlega heilsu. Fjöldi gjaldþrota, skilnaða og sjálfsvíga eru rakin beint til þessara aðgerða. Yfir 2000 börn voru tekin af foreldrum sínum og enn eru einhver hundruð í fóstri. Langflestar þessara fjölskyldna voru heiðvirt fólk sem hafði veitt upplýsingar samkvæmt bestu samvisku í flóknu, óþjálu og meingölluðu kerfi, án aðstoðar eða leiðbeininga frá hinu opinbera.

Ég sagði verkefnisstjórum þessa sögu í gær til að vekja þau til umhugsunar um að það er alveg sama hvort við erum að búa til verkferil, fylgja verkferli, endurskoða eða þróa. Það eru alltaf líkur á að í þeim felist ómeðvitaðar skekkjur vegna okkar ómeðvituðu hlutdrægni. Þess vegna er svo mikilvægt að við séum gagnrýnin á okkur sjálf, verkferla, venjur, gildi og viðmið. Að við höfum kjark til að benda á mögulega ósanngirni, tíma til að ræða hana og ráðrúm til að taka ólík sjónarmið þar inn.

31/10/2025

Í hugleiðingu dagsins (hlekkur í athugasemd) fjalla ég enn eina ferðina um aðferðafræði öfgahægrisins. Um það hvernig það talar upp hið viðtekna, hefðbundna og úrelta á sama tíma og það talar niður hið jaðarsetta, óheðfbundna og nýja.

Bakslagið byggir á blöndu af rasisma og þjóðernishyggju, karlrembu og kjarnafjölskylduhyggju, múslimafóbíu og kristnum áherslum, fötlunar-/fitufordómum og útlitsdýrkun og fjölmörgum örðum andstæðum andúðar og upphafningar.

Mögulega trúir einhver því að jaðarsett fólk ógni öryggi, vellíðan og mannréttindum forréttindafólks. Að aðför öfgahægrisins að jaðarhópum sé samfélaginu til góðs. Að öllum muni líða betur í samfélagi þar sem konur verði lokaðar inni á heimilum, fatlað fólk á stofnunum, útlendingar í útlöndum og hinsegin fólk í skápum.

Sjálf óttast ég þessa framtíðarsýn, enda er samfélag aðgreiningar og mismununar ekki gott fyrir neitt okkar. Það hefur aldrei verið mikilvægara en nú að greina, tala um og beita sér fyrir inngildingu, samkennd og mannréttindum okkar allra.

Adres

Nijmegen

Telefoon

+31645476373

Website

http://www.justconsulting.nl/

Meldingen

Wees de eerste die het weet en laat ons u een e-mail sturen wanneer Just consulting nieuws en promoties plaatst. Uw e-mailadres wordt niet voor andere doeleinden gebruikt en u kunt zich op elk gewenst moment afmelden.