Volda og Ørsta Reinhaldsverk IKS

31/05/2026

♻️ Ei lita påminning om glas- og metallemballasje ♻️

Under ettersortering av glas- og metallemballasje finn vi mykje som har hamna i feil dunk. Dei fleste er flinke til å sortere rett, men av og til dukkar det opp ting som ikkje høyrer heime i den gule dunken.

Typiske funn:
🍳 Steikepanner
🛠️ Verktøy
🔪 Knivar
🔋 Batteri

Den gule dunken skal berre nyttast til emballasje av glas og metall – til dømes sylteglas, hermetikkboksar, metallokk og anna emballasje frå mat og drikke.

Gjenstandar som steikepanner, verktøy og liknande skal leverast som metallavfall på miljøstasjonen. Batteri kan vere brannfarlege dersom dei blir kasta feil, så det er ekstra viktig at dei blir leverte på miljøstasjonen eller i butikkar som sel batteri.

Takk til alle som bidreg til god sortering! 💚

19/05/2026

♻️ Trevirkecontainerane er flytta på miljøstasjonen!

No har vi sett opp to containerar for trevirke og impregnert trevirke utanfor E-bygget (nedanfor hageavfallsbingen).

Dette gjer det enklare å levere treavfall og bidreg til mindre kø inne i hallen.

👉 Hugs å sortere:
• Reint trevirke i eigen container
• Impregnert trevirke i eigen container

Vi håpar dette vil bidra til ei smidigare levering på miljøstasjonen 😊

13/05/2026

☁️ Kristi himmelfartsdag nærmar seg ☁️

Vi minner om at miljøstasjonen held stengt torsdag i samband med heilagdagen.
Det vil truleg bli ekstra stor pågang fredag, og ein må rekne med noko ventetid i løpet av dagen. Vi oppmodar difor om å planleggje besøket litt ekstra.

For eit smidig besøk, sørg for at du:
✅ Sorterar avfallet godt før du kjem
✅ Brukar blanke posar (gjennomsiktige)
✅ Følgjer rettleiinga frå våre tilsette på stasjonen

Minner også om å sjekke tømmekalenderen dykkar då der kan vere endringar ved raude dagar.

Takk for forståinga og tolmodet – vi ønskjer dykk velkomne innom fredag! ♻️

11/05/2026

🔋 Batterikampanje – gjer ein viktig innsats for miljøet! ♻️

I slutten av mars oppstod det brann på anlegget vårt på Melsgjerdet som følgje av eit feilsortert batteri. Heldigvis gjekk det bra, men hendinga viser kor viktig det er å handtere batteri på rett måte.

Sjølv tomme batteri inneheld restenergi og stoff som kan vere skadelege for både miljø og helse dersom dei hamnar i restavfallet.

👉 Slik kan du bidra:
• Samle brukte batteri i ein pose eller boks heime
• Lever dei gratis på miljøstasjonen
• Små batteri kan òg leverast i butikkar som sel batteri

Takk for at du reduserer brannfaren og sorterer batteria rett 💚

05/05/2026

23/04/2026

♻️ Frå sortering til pengepremie! 💰

Visste du at ein enkel mjølkekartong kan bli til ein gevinst på 10.000 eller 100.000 kroner? 🙌
I den siste trekninga av Returkartonglotteriet fekk vi ein glad vinnar frå området vårt 🎉
Norunn Elisabeth Furnes frå Volda vann 10.000 kroner! Ho har sortert kartongar i nesten 30 år – og no gav det endeleg utteljing 💚

✨ Slik blir du med i Returkartonglotteriet:

✔️ Skyll kartongen (du kan delta med alle typer drikkekartong, store og små)
✔️ Brett kartongen (du kan levere kartongane enkeltvis eller i kubbar)
✔️ Skriv namn og telefonnummer på
✔️ Kast i papirdunken

💡 Når du sorterer drikkekartongar, er du ikkje berre med i trekninga, du gjer også ein viktig innsats for miljøet. Kartongane kan få fleire nye liv, og resirkulering sparer mykje energi 🌍

👉 Kanskje er det du som vinn neste gong? Hugs å skrive namnet ditt på kartongen før du kastar den i papirdunken 😀♻

Fire gongar i året trekk vi i VØR ut kartongar med namn og telefonnummer frå papir og papp som blir samla inn i kommunane Ørsta og Volda. Desse vert med i trekninga i Returkartonglotteriet, og ved siste trekning fekk vi endeleg ein vinnar frå området

21/04/2026

🌱🚛 Hengarane er tilbake for sesongen!

Vinteren har endeleg sleppt taket – og vi er i gang med hengarutleige igjen 😊
Vi har to hengarar klare for utleige, så her ligg alt til rette for ein skikkeleg vårryddesjau!

Enten du skal rydde i hagen, garasjen eller boden, håpar vi dette kan gjere jobben litt enklare 💪
🔹 Enkel bestilling
🔹 Praktisk og rimeleg løysing
🔹 For deg som treng å bli kvitt litt ekstra

Bestill når det passar deg. Du kan enkelt reservere ein hengar på nettsida til VØR 😊

👉 Les meir og bestill her: https://www.vor.no/laan-av-hengar.6330108-472871.html

Lukke til med vårryddinga! 🌼

14/04/2026

🤩 No startar vi opp med bygderydding! ♻️

Dette er eit tilbod der vi, i samarbeid med Retura Søre Sunnmøre AS , samlar inn metall og EE-avfall ute på bygdene i kommunane våre. Vi startar med innsamling i Ørsta no, og kjem til bygdene i Volda etter sommarferien.

Sjå plan for når vi er i bygdene i Ørsta her 👇

Veke 16 (13.04 – 20.04)
• Follestaddalen
• Standal
• Trandal

Veke 17 (20.04 – 27.04)
• Barstadvik
• Nordre Vartdal

Veke 18 (27.04 – 04.05)
• Bjørdalen
• Vatne

Veke 19 (04.05 – 11.05)
• Øye
• Urke

Veke 21 (18.05 – 26.05)
• Brautaset
• Bondalen

👉Ta ei rydderunde heime og finn fram metall og EE-avfall, og lever det til næraste hentepunkt! 😀♻

13/04/2026

♻️ Innsamling av farleg avfall
Før påske hadde vi innsamlinga av farleg avfall i Ørsta. Denne veka kjem vi rundt på bygdene i Volda.

Har du maling, batteri, lyspærer, olje eller småelektrisk avfall? Ta det med når vi kjem til di bygd!

✅ Gratis levering for privatpersonar
✅ Våre hyggelege tilsette hjelper deg på staden

⚠️ Hugs: Flytande avfall må vere godt emballert

📅 Sjekk når vi kjem til di bygd på heimesida vår

🔗 Lenkje finn du i kommentarfeltet!

31/03/2026

♻️ Stor pågang på miljøstasjonen før påske! ♻️

Det er for tida veldig stor trafikk på miljøstasjonen vår i samband med vårrydding og førebuingar til påske. Vi set stor pris på at så mange ønskjer å levere avfall på ein miljøvenleg måte 🙌

For at besøket skal gå så smidig som mogleg for alle, ber vi om litt ekstra hjelp frå dykk:
✅ Sorter avfallet godt før du kjem
✅ Bruk blanke posar (gjennomsiktige)
✅ Følg rettleiinga frå våre tilsette på stasjonen
God sortering sparar tid, reduserer kø og sikrar at avfallet blir handtert riktig 💚

Takk for at du bidreg til eit ryddigare og meir berekraftig lokalsamfunn!