29/05/2026
Te heke a Maruiwi
Toremi ki te reinga
I whakakopaia mai i Taraiti
I te maunga i te hū
Ka hoki te wai o Pākiteao
Ko te heke o Maruiwi
Toremi ki te reinga
Ki a Rūaimoko ē!
E koro, Hirini - ko te heke nui tēnei a Maruiwi e riro nei, tō koutou huhua kua haere nei, kua tinana te tau a ngā mātua i kī rā ‘ka riro koutou te momo o te tāngata ē…’.
Anei koe e maumaharatia nei e Ngāti Kahungunu, ko ngā tau roa i noho ai koutou ko tō whānau ki te kāinga iti o Waimārama, i noho ai koe hai māhita, hai timuaki ki te kura o reira, i noho ai hoki hai heamana ki te Tribal Committee o Waimārama o aua wā.
Anei koe e whakamānawatia nei e te whānau Makitānara, inā hoki ko te kuia nāna koutou i whakapakeke mai nō taua whānau, i ahu mai i Te Tauihu o Te Waka a Māui. E maharatia nei koutou ko tō tuahine, a Hana Rose Meihana, tatu atu ki a Anaru Rangiheuea, he mea whāngai tahi koutou e te kuia rā, e Hana Rangiheuea, he Hiparaiti (hāwhe Makitānara) - tamāhine nā Te Ahu Hiparaiti rāua ko Rea Makitānara.
Anei koe e tautehia nei e Kauwaka, mōu i whakatutuki i te karanga kia tae mai koe ki Heretaunga ki te whakarewanga o Toitū Te Reo e rua tau ki muri. Ahakoa te kaumātua, i whakakaha ai koe ki te whakatau i te karanga a Kauwaka, rangatira ana te kaupapa i a koe nā me tāu i whakatakoto ai ki te marea.
E kore e whakahuahuahia ake ō hoa kua haere i mua tata ake nei i a koe koi mahue ētahi ki muri, engari ka tika te kōrero ko te heke nui a Maruiwi tēnei e haere nei.
Waiho ake ki te marae koe āta rākaitia ai ki te kupu kōrero a te hunga ka mahue mai nei ki muri.
Ko ngā kōrero kua tīkina ake i runga ake nei he iti noa iho nō roto mai i te kōpua kānapanapa. Ki te āta whakarārangihia i konei ō mahi katoa ka pahore noa iho te tua i tēnā pīkaunga inaka te taumaha.
Ko tā tētahi o koutou kua mahue mai nei, ko tā Tīmoti: “E Moko, ka aroha rā.”
Ki te ātea koe kākahungia ai ki te kupu whakarangatira.
Heoi anō ēnei poroporoaki a Kauwaka, a Waimārama, a Ngāti Kahungunu ki te tōtara whakahae kua hinga nei.
Tā Hīrini Moko Mead - he waha kī kua mū.
