14/08/2026
PAGLAKIP SA BATA SANG KAPITAN SA MGA NAKABATON SANG P20K NGA AYUDA, GINAKWESTYON SANG PUMULUYO SANG BAGO
Nalakip ang bata sang barangay kapitan sang Brgy. Tabunan sa siudad sang Bago sa lima nga mga estudyante nga nakabaton sang tig-P20,000 pinaagi sa Bagong Pilipinas Presidential Scholarship Program nga kabahin sang Bawat Barangay Makikinabang Program sang gobyerno.
Base sa post sang Uswag Barangay Tabunan sang Huwebes, Agosto 13, pormal nga gin-turnover ang ayuda ni Punong Barangay Maria May Suarez sa mga estudyante nga nalakipan sang isa nga may apelyido man nga Suarez.
Sa comment section, nagpaathag si Kapitan Suarez nga ginhatagan lamang sila sang duha ka adlaw sang Pebrero para makahatag sang mga ngalan sang benepisyaryo. Nakapasa na sila sang mga ngalan sa Malacañang antes pa nakabaton sang guidelines sa pagpili sang Hulyo.
“Ang akon bata amo ang nadala sa lista kay tama ka dasig sang ila ti-on nga gin pangayo kag Ako nanugonan sang isa ka slot nga pwede magabakante tungod sa rason nga wala kami makakita sang posible nga ipagabutang sa rason nga kadali sang tion nga ila gin hatag,” pagklaro sang kapitan.
Nagapangayo man sang pasaylo si Kapitan Suarez sa tanan nga mga ulihi na napabalo, “Kami naga pangayo pasaylo/pasensya sa tanan nga ulihi nga nabalitaan kag naga pamangkot sang sakto nga proseso kay kami na ipit lamang sa ila ti-on nga gin hatag.”
Sa idalum sang nasambit nga programa, may P100,000 nga pondo para sa kada barangay kun diin makabaton sang tig-P20,000 ang lima ka mga estudyante, kun diin posible mahatagan sang prayoridad ang mga graduating student nga posible mag-untat sa pag-eskwela bangud sa problema-pinansyal ukon kapigaduhon.
Sa karon, ginatinguhaan sang K5 News FM nga ma-interview ang nasambit nga kapitan agud makumpirmar kun siya ang nagpasulod sa iya nga bata sa lista para sa amo nga ayuda.
—M. Aranjuez via Gerilou Naluis | August 14, 2026
