10/04/2022
TIPS SA PAGSISIMULA NG MALIIT NA NEGOSYO 🏪
Gusto magnegosyo para dagdag income? O gawing hanapbuhay? First time mo? May naisip ka na bang negosyo? May puhunan ka ba?
Kung OO ang sagot mo sa lahat ng tanong na yan, basahin mo to!
Ang pagnenegosyo kahit gaano kaliit, kailangang SERYOSOHIN. Pera kasi ang usaping ito, wala naman sigurong gustong malugi o masayang ang pagpapakapagod dahil hindi kumikita no?
Eto ang 10 TIPS na kailangan mo sa pagsisimula ng negosyo.
1. ISIPIN KUNG ANONG URI NG NEGOSYO ANG SISIMULAN AT PAG ARALAN ITO 📊
👉Retail business, online business, food business, o kung ano man ang nasa isip mo kailangan mo itong pag aralang mabuti. Importante na kung ano ang ititinda mo eh gusto mo rin at dapat mong isapuso dahil hindi ka magtatagal dyan kung napipilitan ka lang. PASSION is the key.
Mag invest ka rin sa knowledge and skills mo. Oo, MAG ARAL ka. Kung gusto mo magtinda ng bread o pastries, pwede ka mag enroll ng short courses. Kung ayaw mo, pwede rin namang self taught ka, magsearch lang sa google o youtube o magbasa ng libro. Importanteng alam mo kung paano patatakbuhin ang business mo.
2. PUHUNAN AT PONDO 💰
👉Napaka importante neto, wala kang masisimulan kung wala kang pera 😂 Kung sa hinaharap ka pa magnenegosyo, aba simulan mo ng mag ipon. Kailangan din may pondo ka, pano pag naubos ang puhunan mo kasi matumal sa unang buwan o unang taon? Diretso sarado ka na? Hindi ko inaadvise kung sa simula pa lang yung puhunan o pondo e manggagaling sa UTANG. Oo, may ilang mga tao na umasenso sa negosyo na nung nagsisimula pa lang sila ay galing sa UTANG. Pero HINDI PO sa lahat ng pagkakataon at sa lahat ng negosyante nangyayari ang success stories na ganun.
START SMALL muna, huwag padalos dalos gusto marami agad ang stock o anuman. Kakasimula pa lang e, dyan mo pa lang malalaman kung kikita ka ba o hindi. Pag dumami na ang customers saka unti untiin ang paginvest ng malaking pera.
3. LOKASYON AT TARGET MARKET 👨👩👦👦
👉NO.1 talaga sana ito eh, kung yung business mo kailangan ng physical store, eto pinaka importante sa lahat ng importante para sa akin. Kasi kahit gaano kasarap ang produkto mo, kahit gaano yan kamura, o kahit gaano kasikat yan kung yung napili mong LOKASYON hindi puntahan ng tao, tipong dadayuhin pa, masakit man sabihin pero babagsak ang pinakamamahal mong negosyo. Huwag madaliin ang pagpili ng magandang lokasyon. I check din ang mga kakumpitensya sa area na yon at ikumpara ang sa iyo.
Siguraduhing alam mo rin ang target market mo, o yung possible customers mo. Matanda, bata, lalaki, babae, mayaman, mahirap, school, office at kung anu ano pa. Makakatulong yan sa pagpili mo ng lokasyon.
4. PRODUKTO/SERBISYO 🍔
👉Ano ba binebenta mo, produkto o serbisyo? Alin man dyan sa dalawa, kailangan mo yang pag igihan. Anong meron ang sayo na wala sa iba? Yun dapat ang isipin mo, kase pag maganda ang produkto o serbisyo mo, customer na mismo ang lalapit sayo. Di mo na kailangan magpakahirap i-market yan.
5. SUPPLIER AT PRESYO 🛒
👉Dapat mag research ka nung pagkukuhanan mo ng supply, maaaring may mas mura o mas maganda o mas masarap, eh di dun ka na. Mas maganda kung may suki tayong supplier dahil pwedeng mas maka discount ka sa kanya.
Yung presyo ng produkto mo kailangan pinag isipan, naka depende sa presyo ng ka kumpitensya mo o sa mga kapareho mo ng produkto. Hindi pwedeng masyadong mura o masyadong mahal.
6. ACCOUNTING, RECORDING AT INVENTORY 📚
👉Kung tamad ka sa paggawa nito, huwag ka na magnegosyo. SERYOSO. Dyan mo kasi malalaman kung kumikita ka ba, kung saan napupunta ang kita mo, at kung may irregularidad na bang nagaganap.
Dapat alam mo kung magkano ang tinutubo mo sa isang produkto para tama ang pagpe-presyo mo. Dapat may record ka ng sales mo, expenses, purchases. Marunong ka rin dapat mag inventory para malaman kung sapat ba ang stocks mo o may nawawala na. Mukha lang mahirap, pero sa totoo madali lang kasi lista-lista lang naman gagawin mo e.
7. TIWALA SA TAO 🤷
👉Piliin mo ang mga taong pagtitiwalaan mo, lalot negosyo ito, pera ang usapan. Marami ng nag away dyan kapamilya man o hindi.
Empleyado- kung kinakailangan ng tatao sa pwesto mo, kakilala man o hindi, hingan mo pa rin ng requirements.
Ka-sosyo- Kung gusto mong may kahati ka, ok lang kung asawa. Bukod dun, hindi ko na inaadvise ang iba pa. Pero kung sakali na humanap ka pa rin ng kasosyong kamag anak, kaibigan, katrabaho, o kakilala, wag kalimutan gumawa ng KASULATAN. Huwag umasa sa ORAL AGREEMENT, marami ng nagkasira dyan.
Kung sakali naman solo mo ang business at ikaw din ang kikilos lahat, mas ok, walang trust issues. (O baka meron? 🤣)
8. PLANO AT MINDSET 📝
👉Hindi mawawala ang pag paplano, tulad nito, bago ka magsimula dapat may nasa isip ka na, at dapat din may PLAN A TO Z ka. Paano pag may di inaasahang pangyayari, ano ang gagawin mo? At kung naging successful, ano ang balak mo? Yan ang pag isipan mo, para di ka magugulat o magiging padalos dalos sa iyong desisyon.
Pag nagbusiness ka, iwasan mo mag isip ng negative, dapat puro positive. Dapat mataas ang self confidence mo, di madaling panghinaan ng loob kase sugal din yan e di mo pa alam ang mangyayari. Huwag din matakot madapa, bumangon ka lang pag ganun. Alam mo na siguro ang ibig kong sabihin. Experience is the best teacher ika nga.
9. PAYO AT PAGMANAGE NG PERA 💸
👉Huwag kalimutan humingi ng payo sa iba, lalo na dun sa may experience na. Nagsisimula ka pa lang diba? Malaki ang maitutulong nya sa business mo.
Marunong ka rin dapat mag-manage ng pera kundi malulugi ka talaga, di pwedeng iniisip mo agad yung mga gusto mong bilhin. Kailangan mapaikot mo yung puhunan mo, kung ano yung tubo yun lang pwede mong gastusin. Pero mas maganda kung yung tubo isama mo sa puhunan para mas lumago ang negosyo mo.
10. PANGALAN NG NEGOSYO AT PAGPAPAREHISTRO SA GOBYERNO 📜
👉Isipin ng maigi kung ano ang magandang pangalan ng inyong negosyo. Yung unique, nababagay at madaling tandaan ng tao. (Please lang, huwag nyo na pagdugtungin yung pangalan nyo mag asawa o yung walang katapusang house house😂)
Huwag kalimutang irehistro ang negosyo kung kinakailangan. Legal dapat tayo, kumpletuhin ang papeles para walang problema.
Kailangan ng SIPAG, TIYAGA AT DISKARTE sa pagnenegosyo. Hindi po ito madali, pero kung mamahalin natin ang ginagawa natin, di nyo na masyado mararamdaman ang pagod at hirap niyo. Iwasan ang pagpatol sa mga "business kuno" o SCAM sa madaling salita, na nangangako ng malaking balik ng pera. WALANG EASY MONEY sa panahon ngayon, lahat pinagtatrabahuan. BE PROUD marangal ang iyong pinagkakakitaan.
Yun lamang po. GOODLUCK!
