02/01/2026
Halos hindi na bago sa amin dito sa aming printing shop ang makarinig ng mga hinaing ng mga taong nabiktima ng online scam. Madalas, tahimik lang naming ginagawa ang aming trabaho at hindi na rin kami nagtatanong upang maiwasang makialam o maging masyadong mausisa maliban na lang kung sila mismo ang kusang nagkukwento. Sana ay magsilbing babala to sa lahat.
Pero sa araw na ito, lubos kaming naawa. Hindi dahil ito ang unang beses, kundi dahil parang walang katapusan ang mga nabibiktima. Kahit paulit-ulit nang may babala, may naloloko pa rin lalo na ang mga matatanda.
May isang 62-anyos na babae ang lumapit sa amin upang magpa-print ng mga dokumento. Mga katibayan daw iyon na siya ay nabiktima ng online scam. Habang inaayos namin ang kanyang mga papeles, doon namin unti-unting nalaman ang kanyang kwento.
Naghahanap siya ng loan dahil kailangan niya ng pera pambayad sa ospital. Nakita niya ang isang online loan advertisement sa Facebook. Mukhang maayos ang page at kapani-paniwala ang kausap, kaya napaniwala siyang legit ang alok.
Sa usapan nila sa chat, sinabi sa kanya na kailangan munang magbayad ng down payment o processing fee bago mailabas ang loan. Dahil sa kagipitan at pag-asang makakatulong ito sa kanyang sitwasyon, nagpadala siya ng pera.
Ngunit matapos niyang magbayad, bigla na lamang siyang binlock. Wala nang sagot. Wala nang loan. Ang dapat sanang tulong pambayad sa ospital ay naging isang masakit na panloloko.
Kitang-kita sa kanyang mukha ang lungkot, takot, at panghihinayang habang hawak ang mga papeles hindi lang pera ang nawala sa kanya, kundi pati tiwala at kapayapaan ng loob.
Isipin natin: paano kung nanay mo, lola mo, kapatid mo, o malapit mong kaibigan ang nangyari nito? Maraming matatanda ang hindi sanay sa ganitong klaseng panlilinlang online at madaling mapaniwala, lalo na kapag may matinding pangangailangan.
Paalala: Walang lehitimong loan na humihingi ng down payment o processing fee bago ibigay ang pera. Kapag may hininging bayad, red flag na agad ‘yan.
Kumustahin natin ang mga matatanda at mahal natin sa buhay. Paalalahanan, gabayan, at tulungan silang mag-verify bago magpadala ng pera online.
Ang scam ay hindi lang pagnanakaw ng pera ito ay pagnanakaw ng dignidad, pag-asa, at kapayapaan ng isip. Protektahan natin ang isa’t isa.
