13/05/2021
TESDA BOHOL MOTANYAG NA OG LIBRENG DRIVING LESSON SA PUBLIKO.
Gi-asikaso na sa Technical Education Skills and Development Authority (TESDA) Bohol ang pagpahiluna sa mga curriculum sa mga driving school sa bohol ubos sa maong ahensya aron malakip ang mga requirements nga gipangayo sa Land Transportation Office kon LTO alang sa mga molukat og Student Permit (SP)ug Non-Professional Driver’s license.
Ang maong lakang maoy tubag sa dakong problema karon sa mga molukat og SP ug drivers license nga nagbayad og mahal sa mga pribadong driving school nga mokabat ngadto sa P6k hangtud P8k.
Matud ni Engr. Wenefredo Salas provincial director sa TESDA Bohol nga bag-o lang sila nakadawat og memorandum gikan sa central office labot sa nahimong kasabutan tali sa LTO ug TESDA.
Una nang milagda og memorandum of agreement ang LTO ug TESDA aron nga motanyag og Theoretical Driving Course (TDC) ingon man Practical Driving Course (PDC) nga sama sa gitanyag sa LTO sa Driver’s Education Center (DEC) ngadto sa mga tawo nga dili maka-afford og private driving school.
Sa pagkakaron suma kang Salas nga kinahanglan pa nga mo-upgrade ang curriculum sa mga driving school sa TESDA aron malakip ang gipangayo nga requirements sa LTO alang sa paglukat og SP maingon man driver’s license.
Ang training sa TESDA mo-abot sa 15 ka adlaw alang sa theoretical ug practical driving course, samtang 15 oras lang hinoon sa mga private driving school.
Sa higayon nga masugdan ang programa, mamahimo nang makakuha og certificate of achievement ang usa ka studyante human makakompleto sa TDC nga maoy ipakita sa LTO aron makalukat og SP, samtang kinahanglang mobalik sa pag training alang na usab sa PDC nga maoy requirements aron makakuha og non-professional drivers license.
Sa pagkakaron gikatakda nga himoon na ang enhancement workshop sa mga training center.
Dunay 6 ka mga driving training center ang TESDA sa Bohol nga naa sa mga lungsod sa Inabanga, Tubigon, Pilar, Bilar ug duha ang pribado nga mao ang SBR Technical Education Training Center Inc., ug Crispa training center nga nahimutang sa dakbayan sa Tagbilaran.
Gibutyag usab ni Salas nga daghan nang nagpalista sa mga training center sa TESDA alang sa pag avail og libreng driving course.
Suma sa opisyal nga limited lang ang scholarship slot sa TESDA Bohol nga naa lang sa kapin kon kulang 275, apan gi-abisuhan ang gustong mo avail nga magpalista lang sa nahisgutang mga training center aron ikasumiter sa regional office nga maoy mo-aprobar sa paghatag og scholarship alang sa driving course.
