07/06/2026
الحمدللہ!
گھڑتل ویلفیئر سوسائٹی کا دفتر تزئین و آرائش کے مراحل سے گزر رہا ہے۔ ان شاء اللہ بہت جلد دفتر اپنی باقاعدہ سرگرمیوں کا آغاز کر دے گا۔
دفتر کے لیے مرد اور خواتین امیدواروں سے مختلف آسامیوں پر درخواستیں مطلوب ہیں۔ اگر آپ ملازمت میں دلچسپی رکھتے ہیں تو ویلفیئر سوسائٹی کے واٹس ایپ نمبر پر رابطہ کریں اور اپنی مختصر معلومات ارسال کریں۔
ہم آپ کو صاف ستھرے، باعزت اور پُرسکون کام کے ماحول میں کام کرنے کا موقع فراہم کریں گے۔
مزید معلومات اور درخواست کے لیے:
ویلفیئر سوسائٹی واٹس ایپ نمبر پر رابطہ کریں۔
گھڑتل ویلفیئر سوسائٹی
"ہم سب کی سوسائٹی"
03111104211
گھڑتل کلاں کے روشن مستقبل کے لیے مرکزی تنظیم کی ضرورت
آج کے دور میں یہ گھڑتل کلاں کی سب سے بڑی ضرورت ہے کہ گاؤں میں ایک مرکزی تنظیم یا ادارہ قائم ہو جو سب کے فائدے اور روشن مستقبل کے لیے کام کرے۔ ایسی تنظیم نہ صرف روزمرہ مسائل حل کرے گی بلکہ آنے والی نسلوں کے لیے مضبوط بنیاد رکھے گی۔
ہمارے گاؤں میں اس وقت تقریباً 1450 گھرانے ہیں۔ اگر ہر گھر معمولی سا ماہانہ چندہ دے اور ہمارے اوورسیز بھائی بھی اس میں حصہ ڈالیں تو ایک بڑا اور مضبوط فنڈ جمع کیا جا سکتا ہے۔ اس فنڈ سے گاؤں کے وہ کام ممکن ہوں گے جو آج صرف خواب لگتے ہیں۔ یہ سیاست، مذہب اور خاندان سے بالاتر اور سب کے لیے یکساں ہو۔ ہر فرد کو برابر نمائندگی اور سہولت ملے تاکہ کسی کو بھی نظرانداز نہ کیا جائے۔
گاؤں کی سیکیورٹی اور پہرا
گلیوں اور نالیوں کی صفائی، گھروں سے کچرا اُٹھانا
چھوٹی مرمتیں (پائپ، پُلی، لیکیج وغیرہ)
یتیم اور غریب بچوں کی تعلیم
بیوہ خواتین اور نہایت غریب گھرانوں کے لیے فنڈز اور ماہانہ راشن
فری ہیلتھ کیئر اور ایمرجنسی فنڈ
خون کا بینک (Blood Bank)
چھوٹے کاروبار کے لیے قرض اور روزگار کے مواقع
نوجوانوں کے لیے اسپورٹس اور کیریئر کاؤنسلنگ
گاؤں کے قانونی معاملات میں رہنمائی
کرایہ داروں اور گھروں کا درست ریکارڈ
یہ منصوبہ سب سے زیادہ نوجوانوں کے لیے ہے۔ آج کے حالات میں اگر نوجوانوں کو تعلیم، کھیل، روزگار اور رہنمائی کے مواقع نہ ملے تو وہ ضائع ہو جاتے ہیں۔ ایک منظم ٹیم انہیں آگے بڑھنے، ہنر سیکھنے اور اپنے خواب پورے کرنے کا موقع دے گی۔ یہی نوجوان کل گاؤں کو ترقی اور خوشحالی کی راہ پر ڈالیں گے۔
ہر کام کے لیے الگ چھوٹی کمیٹیاں بنائی جائیں، تاکہ ہر فرد نمائندگی کرے۔ کمیٹیاں ووٹنگ کے ذریعے منتخب ہوں، اس سے شفافیت اور اعتماد بڑھے گا۔ یوں ہر شخص کو لگے گا کہ یہ ادارہ اس کا اپنا ہے۔
اگر ہم آج یہ قدم نہیں اٹھاتے تو آنے والی نسلیں ہمیں کوسیں گی۔ لیکن اگر ابھی اتحاد سے یہ تنظیم بن گئی تو گھڑتل کلاں نہ صرف دوسرے گاؤں کے لیے مثال بنے گا بلکہ ہمارے بچے اور نوجوان ایک محفوظ، خوشحال اور ترقی یافتہ ماحول میں پروان چڑھیں گے۔
