21/02/2026
آزاد کشمیر کے ٹیکس نظام میں ایک جدید اور انقلابی قدم اٹھایا گیا جب “AJK Tax Asaan Mobile App” اور “BI Revenue Collection & POS Dashboard” کا باقاعدہ افتتاح کیا گیا۔
اس باوقار تقریب میں وزیر خزانہ و وزیر ان لینڈ ریونیو جناب چوہدری قاسم مجید، سیکرٹری ان لینڈ ریونیو، چیئرمین ایف بی سی آر، کمشنر انکم ٹیکس ساؤتھ زون جناب انصر علی نقوی، کمشنر ان لینڈ ریونیو نارتھ زون جناب باسط صدیق، صدر میرپور بار کونسل، صدر پریس کلب، پرنٹ و الیکٹرانک میڈیا، میرپور چیمبر آف کامرس کے سابق صدور، ایگزیکٹو ممبران اور بزنس کمیونٹی کی بڑی تعداد شریک ہوئی۔
میرپور چیمبر آف کامرس اینڈ انڈسٹری کے صدر عمر شہزاد جرال نے اپنے خطاب میں بزنس کمیونٹی کی نمائندگی کرتے ہوئے واضح مؤقف پیش کیا کہ:
“ہم ایک ایسے آزاد کشمیر کا خواب دیکھتے ہیں جہاں نظام شفاف ہو، کاروبار محفوظ ہو اور ٹیکس دہندگان کو عزت اور سہولت ملے۔ ڈیجیٹلائزیشن ہی وہ راستہ ہے جو بداعتمادی کو ختم کر کے شفافیت اور ترقی کو فروغ دے سکتا ہے۔”
انہوں نے کہا کہ چیمبر ہمیشہ اصلاحات، سہولت کاری اور بزنس فرینڈلی پالیسیز کے حق میں کھڑا رہا ہے اور آئندہ بھی حکومت کے ساتھ مل کر ایسے اقدامات کی حمایت کرتا رہے گا جو معیشت کو مضبوط بنائیں۔
“AJK Tax Asaan App” نہ صرف ٹیکس دہندگان کیلئے آسانی کا ذریعہ بنے گی بلکہ ریونیو سسٹم میں شفافیت، ڈیٹا بیس مانیٹرنگ اور مؤثر گورننس کو یقینی بنائے گی۔
یہ صرف ایک ایپ کا افتتاح نہیں بلکہ آزاد کشمیر میں ڈیجیٹل گورننس کے نئے دور کا آغاز ہے۔
میرپور چیمبر آف کامرس حکومت کے اس اقدام کو خوش آئند قرار دیتا ہے اور امید رکھتا ہے کہ بزنس کمیونٹی کو اعتماد میں لے کر معاشی اصلاحات کا یہ سفر مزید تیزی سے آگے بڑھے گا۔
