19/05/2026
وضاحتی و مذمتی بیان
ہم بلوچستان گڈز ٹرک ٹرانسپورٹ ایسوسی ایشن کی طرف سے جاری کردہ ہڑتال کی کال میں مسلم باغ کا نام بلاجواز شامل کرنے کی سختی سے مذمت کرتے ہیں اور اسے مکمل طور پر مسترد کرتے ہیں۔
یہ بات انتہائی قابلِ غور ہے کہ اگر ہڑتال واقعی بلوچستان کے مجموعی ٹرانسپورٹ مسائل کے لیے ہے تو پھر پورا بلوچستان اس میں شامل ہونا چاہیے تھا۔ لیکن یہاں عجیب صورتحال یہ ہے کہ باقی پورا بلوچستان کھلا رکھا گیا ہے اور صرف چند علاقوں، یعنی مسلم باغ، نوکنڈی، دالبندین اور لورالائی کو شامل کیا گیا ہے۔ اس سے صاف ظاہر ہوتا ہے کہ یہ کوئی صوبائی سطح کی منظم ہڑتال نہیں بلکہ مخصوص علاقوں کو نشانہ بنانے کی کوشش ہے۔
مسلم باغ کا اس کال سے کوئی تعلق نہیں۔ مسلم باغ کے کرومائٹ پلانٹس، ٹرک مالکان، مزدور، ایکسپورٹرز، تاجر اور مقامی کاروباری طبقہ ایسی غیر واضح، غیر مشاورتی اور مخصوص مفادات پر مبنی ہڑتال کا حصہ نہیں بنیں گے۔
ہم واضح کرتے ہیں کہ مسلم باغ کو بلا وجہ ہڑتال میں شامل کرنا مقامی کاروبار، مزدوروں کی روزی، لوڈنگ و اَن لوڈنگ، کرومائٹ ایکسپورٹ اور پلانٹس کو نقصان پہنچانے کے مترادف ہے۔ اگر ٹرانسپورٹرز کے کوئی جائز مسائل ہیں تو وہ حکومت بلوچستان، محکمہ ٹرانسپورٹ، ضلعی انتظامیہ اور متعلقہ قانونی فورمز پر اپنا مؤقف پیش کریں، مگر مسلم باغ کے نام کو استعمال کر کے کاروباری سرگرمیوں کو بند کرانے کی کوشش کسی صورت قبول نہیں کی جائے گی۔
یہی طریقہ پہلے بھی ناکام ہو چکا ہے اور اب بھی ناکام ہوگا۔ مسلم باغ کے عوام، پلانٹ مالکان، ٹرک مالکان، مزدور اور کاروباری طبقہ کسی دباؤ، بلیک میلنگ یا ذاتی مفادات کی بنیاد پر اپنا روزگار بند نہیں کریں گے۔
ہم تمام پلانٹ مالکان، ٹرک مالکان، ڈرائیورز، مزدوروں اور تاجروں سے اپیل کرتے ہیں کہ وہ اس بلاجواز ہڑتال کا حصہ نہ بنیں اور مسلم باغ میں کاروباری سرگرمیاں معمول کے مطابق جاری رکھیں۔
مسلم باغ کا امن، روزگار اور کرومائٹ ایکسپورٹ کسی کے ذاتی یا مخصوص مفاد پر قربان نہیں کیا جا سکتا۔
Chromite Plants Association, Muslim Bagh
کرومائٹ پلانٹس ایسوسی ایشن، مسلم باغ
