25/02/2026
میانوالی میں نگہبان کارڈوں کی تقسیم پر سوالات — شہریوں کا انکوائری کا مطالبہ
میانوالی میں اب تک تقریباً 90 ہزار نگہبان کارڈ بھیجے جا چکے ہیں، تاہم شہری حلقوں کی جانب سے کارڈوں کی تقسیم کے عمل پر تحفظات کا اظہار کیا جا رہا ہے۔ ذرائع کے مطابق ڈسٹرکٹ منیجر ظہور عالم اور پی ایس ای آر کے انتظامی معاملات میں مبینہ غفلت اور لاپرواہی کے باعث متعدد کارڈ ادھر اُدھر ہونے کی اطلاعات سامنے آئی ہیں۔
اطلاعات یہ بھی ہیں کہ بعض دفاتر میں اس صورتحال کی ذمہ داری نچلے عملے پر ڈال دی گئی، جس پر مقامی حلقوں نے تشویش کا اظہار کیا ہے۔ شہریوں کا کہنا ہے کہ اصل ذمہ داران کا تعین کیے بغیر چھوٹے ملازمین کو موردِ الزام ٹھہرانا مناسب نہیں۔
شہریوں کی اکثریت نے وزیراعلیٰ پنجاب محترمہ مریم نواز اور متعلقہ اعلیٰ حکام سے مطالبہ کیا ہے کہ پی ایس ای آر کے متعلقہ عملے اور انتظامی افسران کی شفاف اور غیر جانبدار انکوائری کرائی جائے، اور کارڈوں کی تقسیم میں تاخیر یا غفلت کے ذمہ دار اعلیٰ افسران سے بازپرس کی جائے۔
مزید برآں، یہ بھی کہا جا رہا ہے کہ ابھی تک پی ایس ای آر دفتر میں نگہبان کارڈوں کی بڑی تعداد موجود ہے جبکہ مستحق افراد طویل انتظار کے باعث پریشانی کا شکار ہیں۔ شہریوں نے مطالبہ کیا ہے کہ کارڈوں کی تقسیم کا عمل فوری طور پر تیز کیا جائے تاکہ مستحق افراد کو بروقت سہولت میسر آ سکے۔
Maryam Nawaz Sharif
