22/10/2026
پاکستان پیپلز پارٹی برمنگھم برانچ کے زیرِ اہتمام سانحۂ کارساز کے شہداء کو خراجِ عقیدت پیش کرنے کے لیے تعزیتی ریفرنس کا انعقاد
پاکستان پیپلز پارٹی (پی پی پی) برمنگھم کی جانب سے قائم مقام صدر جناب چوہدری شبیر کی سربراہی میں سانحۂ کارساز کے شہداء کی یاد میں ایک تعزیتی ریفرنس کا انعقاد کیا گیا، جس میں شہداء کو خراجِ عقیدت پیش کیا گیا اور ان کی جمہوریت کے لیے دی جانے والی قربانیوں کو سراہا گیا۔
اس موقع پر پی پی پی برمنگھم کے جنرل سیکرٹری چوہدری ارشد عزیز، سینئر نائب صدر طالب چوہان، نائب صدر قاضی عمر جمیل، پی وائی او یو کے انفارمیشن سیکرٹری تبارک محمود، پی وائی او یو کے سوشل میڈیا سیکرٹری شاہ فرید، چیئرمین کشمیر کمیٹی پی پی پی یو کے جناب نائب مغل صاحب، چیئرمین زکوٰۃ کمیٹی جناب خان ظفر خان سمیت دیگر عہدیداران اور کارکنان نے شرکت کی۔
اس موقع پر قائم مقام صدر پی پی پی یو کے جناب چوہدری شبیر نے اپنے خطاب میں کہا کہ برمنگھم میں پاکستان پیپلز پارٹی کی ایک ہی برانچ ہے، جسے مرکزی قیادت کی تائید حاصل ہے۔ انہوں نے کہا کہ پی پی پی یو کے کے صدر اور جنرل سیکرٹری اس وقت برطانیہ میں موجود نہیں ہیں، جس کے بعد برمنگھم برانچ، جو یو کے کی سب سے بڑی برانچ ہے، اپنی ذمہ داریاں ادا کر رہی ہے۔
انہوں نے مزید کہا کہ پی پی پی برمنگھم اپنی ذمہ داریوں کو احسن طریقے سے نبھاتے ہوئے پوری برطانیہ کی طرف سے سانحۂ کارساز کے شہداء کو خراجِ عقیدت پیش کرتی ہے۔ شہداء کی قربانیاں ہماری سیاسی تاریخ کا روشن باب ہیں، جنہیں ہمیشہ یاد رکھا جائے گا۔
جناب چوہدری شبیر نے پی پی پی سے وابستہ تمام کارکنان اور دیگر جمہوریت پسند افراد کو خوش آمدید کہتے ہوئے کہا کہ پی پی پی برمنگھم برانچ پاکستان پیپلز پارٹی کے پرچم تلے متحد ہے اور پارٹی کے نظریے، منشور اور مشن کے فروغ کے لیے اپنی جدوجہد جاری رکھے گی۔
تقریب کے اختتام پر سانحۂ کارساز کے شہداء کی قربانیوں کو خراجِ تحسین پیش کیا گیا اور اس عزم کا اظہار کیا گیا کہ پاکستان پیپلز پارٹی کے کارکنان جمہوریت، عوامی حقوق اور شہداء کے مشن کی تکمیل کے لیے اپنی جدوجہد جاری رکھیں گے۔
