28/08/2024
جب آپ خوش ہوتے ہیں تو لوگوں کو یہ فکر لاحق ہو جاتی ہے کہ آپ اتنا خوش کیوں ہیں اور جب اداسی کی کیفیت میں ہوتے ہیں تو آپ کے اطراف موجود انہی لوگوں کو اندر ہی اندر خوشی ہوتی ہے کہ چلو اس کی زندگی میں کوئی تو مسئلہ ہے جس نے اسے اداس کر دیا ہے۔
آپ زیادہ بولتے ہیں یا چہکتے ہیں تو لوگ اندر ہی اندر بے چین ہو جاتے ہیں اس کھوج میں لگ جاتے ہیں کہ اتنا چہکنے کے پیچھے راز کیا ہے اور جب کسی وجہ سے آپ خاموش ہو جاتے ہیں تو یہی لوگ آپ کے متعلق بولنا شروع کر دیتے ہیں کہ اتنا سناٹا کیوں ہے یقینا کچھ تو گڑبڑ ہے۔ اچھا کھائیں پئیں تو آپ کی امارت پر نظر اور گر کسی کیفیت کے زیر اثر خود سے لاپرواہ و غافل ہو جائیں تو حقارت کی نظر۔
جب آپ اپنی زندگی میں جدوجہد کرنے کی اسٹیج میں ہوتے ہیں تو یہی دنیا آپ سے دور چلی جاتی ہے کہ کہیں ہم سے سہارا حاصل کرنے کے لیے ہمارا ہی کاندھا نہ مانگ لے اور جب آپ زندگی میں کوئی بہتر مقام حاصل کر لیتے ہیں تو یہی دنیا آپ کی توجہ حاصل کرنے کے لیے آپ کے آگے پیچھے گھومتی ہے۔
یہ دنیا کیا ہے؟ کون ہے؟ کبھی غور کیا آپ نے؟ یقینا آپ کے اطراف موجود لوگ آپ کی دنیا بناتے ہیں۔ مگر کیا آپ نے کبھی یہ سوچا کہ اپنے اطراف موجود اس دنیا کو بنانے میں آپ بھی اتنے ہی ذمہ دار ہیں جتنی یہ دنیا ذمہ دار ہے۔ سادہ الفاظ میں اپنے اطراف موجود لوگوں کا چناؤ کرنا کچھ کچھ آپ کے اختیار میں بھی ہے۔ اور جہاں چناؤ ممکن نہیں وہاں یقینا آپ کی زندگی میں کچھ اصول مرتب ہونے چاہئیں۔
کیا آپ کو ایسا لگتا ہے کہ اپنی زندگی کے ہر move کے متعلق آپ کو ان لوگوں کو update کرنے کی ضرورت ہے؟
اپنے متعلق لوگوں کو آپ نے کتنا بتانا ہے اور کتنا چھپانا ہے اس کا فیصلہ یقینا آپ نے ہی کرنا ہے۔ دنیا کو سمجھ کر کتنے فاصلے پر رکھنا ہے اور دنیا سے کتنے فاصلے پر رکھنا ہے اس کا فیصلہ بھی آپ کو ہی کرنا ہے۔ یہ ٹھیک ہے کہ isolated ہونا ان سب باتوں کا حل نہیں مگر آپ کی زندگی میں socialisation کے بھی کچھ واضح اصول مرتب ہونے چاہئیں جو آپ نے خود ہی وضع کرنے ہیں تاکہ زندگی کے ہر دور میں آپ پرسکون رہیں۔ یہ جو سکون ہے یہ انمول ہے۔ ساری زندگی ہم اس سکون کو حاصل کرنے کے لیے ہی تو محنت کرتے ہیں۔ ہماری زندگی میں کتنے ہی لوگ شور شرابہ کرتے ہوئے آتے ہیں اور پھر اتنی ہی خاموشی سے نکل بھی جاتے ہیں۔ زندگی نہیں رکتی اور نہ رکنا چاہیے۔ وقت بڑا استاد ہے۔ وقت کے ساتھ ساتھ دنیا بدلتی رہے مگر اس دنیا کو سمجھنے کے بعد آپ اور آپ کے اصول نہیں۔
بس پھر ٹینشن کیسی؟ خوش رہیں اور پرسکون رہیں!
