Dr.Mohamed Baydon

07/07/2024

البلد اتقلبت علشان عرفوا أن حصل ضغط علي المرحوم احمد رفعت واتسببت في وجع قلبه لدرجه الموت من ناس متحكمه فيه
طب ياتري في كام عامل وموظف وشخص عليهم ضغوط من ناس متحكمه فيهم بسبب اكل العيش

وكام واحد مات بسبب الزعل علي نفسه وبسبب ضغط من أشخاص ملهمش اي لزمه في الحياه

كم واحد بيشتغل في شركة مليانة ظلم وفساد ومضطر يكمل غصب عنه عشان المسئولية اللي في رقبته

كم واحد مديره بيمارس عليه جميع الاحقاد والامراض النفسية ومضطر يستحمله عشان اولاده وزوجته اللي مستنيين منه مصاريف مدارس وبيت وأكل وشرب ودروس وغيره

كم واحد ليل نهار بيجتهد ويذاكر ويتعلم ويطور نفسه وفجأة بيشوف حد أقل منه بكتير بيركب فوقه بالواسطة والفساد لمجرد انه مش ضمن الحاشية المقربة

ارحموا الناس وياريت محدش يتحكم في حد ويعرف أن كل حاجه هتتردله
الله يرحمك يا احمد يا رفعت 💔

01/07/2024

تحديثات جديده في ال events الخاصة ب lead generation على google analytics 4

26/06/2024

البوست السنوي بمناسبة الامتحانات و نتيجة الثانوية العامة

للناس اللي جابت ١٠٠٪؜ او حتى ٥٠٪؜ في الثانويه العامه
انا صيدلي وجايلك من المستقبل
الشهادة دي تبلها وتشرب ميتها
خد اي شهادة متوجعش قلبك لان العالم بره سور الجامعه مبيعترفش بالكلام الفاضي ده

طور نفسك وادرس المجالات اللي هتسيطر على العالم في المستقبل
وقبل ما اقولك اسماء المجالات دي افتكر بس الكلمتين دول
(عشان تبقى واحد من اشهر وافضل الخبراء في العالم في اي مجال انت محتاج ١٠ الاف ساعه من التعلم والتطبيق)

ومحتاج بس ٢٥ دقيقه يوميا لمدة ٣ شهور عشان تبقي ملم بكل المعلومات اللي تخص اي مجال ممكن تتخيله في الدنيا

١- البرمجة
ابدأ بالاساسيات لغة HTML - CSS- javascript - C++- bootstrap
وبعدها لازم تتعلم python

قناة الزيرو اعظم مكان تتعلم فيه مجانا تماما

https://youtube.com/c/ElzeroInfo

١١ ساعه مقدمة كامله web development
https://youtu.be/Q33KBiDriJY

٢- الذكاء الاصطناعي
Artificial intelligence
كورس كامل في الذكاء الاصطناعي

https://youtu.be/PXwUEJVSAeA

٣- Machine learning
بلاي ليست كاملة في تعلم الآلة

https://youtube.com/playlist?list=PL9ooVrP1hQOHUfd-g8GUpKI3hHOwM_9Dn

٤- التسويق الالكتروني وخصوصا e-commerce لان العالم في المستقبل مش هيبقى فيه محلات في الشارع

مقدمة كامله من الالف للياء في التسويق الالكتروني
https://youtu.be/nU-IIXBWlS4

٥- المونتاج والفوتوشوب
Adobe photoshop

https://youtu.be/IyR_uYsRdPs

Adobe premiere pro

https://youtu.be/KfPIp-G1bpY

٦- ادارة المشروعات
كورس متكامل في ادارة المشروعات

https://youtu.be/uWPIsaYpY7U

كل المجالات دي ممكن تتعلمها من الالف للياء مجانا على يوتيوب من غير ما تدفع دولار واحد

المصادر في التعليقات

12/06/2024

البوست ده انتشر جدا الفترة الاخيرة وعليه جدل كبير
عشان كده حبيت أقول وجهة نظرى ( التي لا قيمة لها على الاطلاق ) بصوت الكابتن مدحت شلبي

ومتقبل جدا اختلاف الجميع معايا بالمناسبة

الكلام غير صحيح ( من وجهة نظري ) لأن في ناس كتير حوالينا بتاخد بالاسباب كاملة وبرضه مفيش توفيق يبقى النتيجة برضه صفر

هل كتب الله على نفسه أن المجتهد هياخد جزاؤه في الدنيا كاملا مقابل سعيه ؟
لأ طبعا
ربنا يعلم تمام العلم ما قد يصيب الانسان من فتن ان أُتيحت له فرص محددة

ربنا يعلم تمام العلم مين يقدر يتحمل سلطة أو مال أو نجاح بدون ما تفسد أخلاقه ومين هيكون اضافة المال والسلطة والنجاح بشكل عام له زيادة في دينه وخُلُقه
اذن توفيق ربنا هو ٩٩.٩٪؜ و ٠.١ ٪؜ هو سعي وأخذ بالاسباب

ربنا قال وأن ليس للانسان الا ما سعى وأن سعيه سوف يُرى
هل ده معناه انه هياخد المقابل في الدنيا نجاح في نفس الشيء اللي بيسعى فيه ؟
لأ طبعا

قد يسعى الانسان ويجتهد ويبذل كل نفسه في اتجاه قد يصيبه بمفسدة عظيمة وهنا قد يوفقه الله في اتجاه اخر جزاء سعيه لا يصيبه مفسدة
وقد لا يوفقه اصلا لأي طريق في الدنيا ويدخر له جزاؤه في الاخره ويمنع عنه في الدنيا مفسدة عظيمة في دينه وخلقه

وقد يوفق الله انسان اخر بدون سعي تماما لعلمه بالغيب ان الشخص ده في المكان ده بالسلطه او المال اللي هيمتلكهم هيغير العالم أو ينفع الناس أو يترك أثر عظيم في نفوس البشر بدون ما يطلب بدون ما يسعى بدون ما يجتهد
وكل اللي حصل هو أن ربنا شاور عليه وبس

وقد يوفقه اصلا بدون سعي وييسر له النجاح والفلاح وفي نفس الوقت النجاح والسلطه والمال يكونوا لعنه على صاحبها كعقاب وغضب من الله على ذنوب عظيمة ارتكبها الانسان أو ليبتلي ناس تانيه ويختبرهم بسبب الشخص ده

الشاهد من الموضوع هو أن توفيق ربنا هو كل شيء وحكمته سواء بالمنع او العطاء ستظل مجهولة في علم الغيب الى أن يرث الله الأرض ومن عليها

لا شطارة ولا مهارة ولا دعوات الأم ولا الاجتهاد ولا السعي
الاخذ بالاسباب والسعي ضرورة حتمية لان مقابلها في جزاء طيب من الله
سواء بالتوفيق في نفس اتجاه السعي او توفيق من الله في اتجاه اخر او ادخار لجزاء اعظم في الاخره أو منع مفسدة قد تصيب الانسان وتدمر حياته وآخرته معاً

مثال حي :
هل باسم يوسف أعظم كوميديان او مقدم برامج ؟
لا طبعا في مواهب كتير احسن منه
هل المواهب دي سعت و تعلمت ودرست ومارست اقل من باسم يوسف ؟
اكاد اجزم انه لا طبعا اكيد في ناس عملت كده اكتر منه ورغم كده الاشهر والانجح ( بمقاييس البشر ) هو باسم يوسف

وهتلاقي امثلة كتير جدا جدا حوالينا ناس نوابغ واجتهدوا ليل نهار وبقالهم سنين في السعي والاجتهاد ومفيش اي تقدم يذكر عملوه في حياتهم

هل قانون انهم يوصلوا لشيء دنيوي مقابل السعي ده قبل مماتهم ؟
لا طبعا
ممكن يعيشوا ويموتوا ومحدش سمع عنهم

يبقى برضه وصلنا لنفس النتيجة ان توفيق ربنا هو كل شيء وحتى سعيك واجتهادك ومهاراتك اللي اكتسبتها هي اصلا توفيق من ربنا لطريقك انك تقدر تعملها

11/06/2024

بعد خبرة سنين طويلة في الشغل مع الشركات وعمل انترڤيوهات لموظفين سواء فلترتهم حسب السيرة الذاتية او توظيف اقارب او اصدقاء او حتى حسب الكفاءة والخبرة أحب اقولك شوية خطوات سهلة وأساسية جدا عشان تعرف تختار شخص يناسب الشغل اللي انت عاوز تنجحه
وده طبعا ملوش علاقة بالاسئلة التقنية اللي تناسب شغلك دي انت حر فيها طبعا اعصره في الاسئلة زي ما انت عاوز

و ده طبعا على افتراض انك بتدي راتب محترم و بتقدر الناس اللي معاك ومش بتستعبدهم وهتقدمله الدعم والتدريب الكافي عشان يفهم ويستوعب ويهضم كل كبيرة وصغيرة عن المنتجات او الخدمات اللي انت بتقدمها

اولا :
الشخص تاخد عنه انطباع مبدأيا من هيئته وشكله الخارجي
وشكله الخارجي هنا ملوش علاقة انت بتحكم بالمظاهر ولا لأ، انت بتختار شخص هيمثل البراند بتاعك قدام العملاء وهيتكلم بإسم الشركة
يعني ميبقاش لابس هدوم مكرمشة ومشمر كم القميص وفاتح صدره في الانترڤيو اللي هو اصلا مقدم فيه على وظيفة دوامه الرسمي فيها فورمال

متبقاش جزمته معفنة وعمرها ما اتمسحت ولا اتلمعت
ميبقاش لابس بنطلون اسود وكحلي او غامق ولابس شراب ابيض
ثانيا
في الانترڤيو اسأل الشخص بيعمل ايه لما بيصحى من النوم وبيعمل ايه اول ما يصحى
ده هيعرفك هو بيصلى، بيستحمى ، بيفطر ، بيغسل سنانه بيعمل ايه بالظبط
ومنها هتعرف مدى نظافته الشخصية

ثالثا :
فكك من الاسئلة بتاعت شايف نفسك فين بعد ٥ سنين والكلام الفارغ ده:
اسأله عن موقف معين بمشكلة محددة في الشغل زي مثلا :
هتعمل ايه لما تنزل تلاقي السوق مليان منافسين؟
هتعمل ايه لو طلبت منك تاسك زيادة فوق شغلك ؟
( وده مش معناه انك تركبه تاسكات طول الوقت بعيده عن مهامه الاساسية لكن في بعض الاوقات هتضطر تطلب تاسك اضافي مش معمول حسابه مؤقتا)

رابعا:
لازم تكون عارف إيه الحاجات اللي بتميز شركتك وايه القيم اللي بتمثلها عشان تقدر تنقل له حماسك وايمانك بالشركة والميزة التنافسية اللي عندك واللي بالتبعية هينتقل له
اسأل المتقدم عن تجاربه السابقة وإزاي قدر يواجه تحديات مشابهة في أماكن شغله القديمة. خلي الأسئلة تركز على أمثلة محددة زي: "ممكن تحكي لي عن موقف كنت فيه تحت ضغط كبير وازاي تعاملت معاه؟" أو "احكي لي عن مشروع كنت فيه جزء من فريق وازاي ساهمت في نجاحه؟".

خامسا:
راقب طريقة تواصل الشخص. الشخص اللي يتكلم بوضوح وبثقة ويقدر يوصل أفكاره بسهولة هيكون إضافة قوية للفريق. خلي بالك من لغة الجسد وطريقة التفاعل معاك خلال المقابلة.

سادسا:
اتاكد من قدرته على التعلم والتطوير الذاتي. اسأله عن آخر كتاب قرأه أو كورس أونلاين اخده أو مهارة جديدة اتعلمها مؤخرا. الشخص اللي بيستثمر في نفسه دايما هيكون عنده قدرة أكبر على النمو والتطور مع الشركة وقدرة اكبر بكتير على حل المشكلات ومواجهة الصعوبات

سابعا:
اتأكد من تناسق القيم والأهداف اللي عاوز تحققها للبراند بتاعك،الشخص اللي بيشارك نفس رؤيتك للشركة وهيبقى متحمس لنجاحها هيكون استثمار ناجح على المدى الطويل. اسأله ليه عاوز ينضم لفريقك او لشركتك وايه اللي بيحمسه في دور الشركة والسوق اللي بتشتغل فيه، واياك ثم اياك تختار حد معندوش ايمان بالمنتجات او الخدمات اللي انت بتقدمها لان مع اول اعتراض للعملاء على السعر او المكونات هتلاقيه واقف في صف العميل وجايز كمان يهاجم الشركة ويدمر سمعتك في السوق

اخيرا، وأهم نقطة، اختار الشخص اللي هتقدر تشتغل معاه يوميا بارتياح، حاول على قد ما تقدر تتأكد انه انسان سوي معندوش امراض نفسية ولا عايش دور الضحية وعنده أمل انه هيكبر الشركة وهيكبر نفسه وهيضيف قيمة حقيقية لنفسه قبل الشركة وده لأن الانسجام في الفريق بيساهم بشكل كبير في تحقيق الأهداف وبناء بيئة عمل صحية وإيجابية.

التوظيف مش مجرد ملء لمنصب شاغر، التوظيف هو استثمار في مستقبل شركتك. فخد وقتك في الاختيار، لأن الشخص المناسب في المكان المناسب هو اللي هيصنع الفرق مش اصحابك ولا قرايبك ولا الناس اللي شكلها حلو بس.

وبعد ده كله لو اختارت الشخص المناسب اتاكد ان اول ٣ شهور بتلاحظ كل كبيرة وصغيرة بيعملها واخلف وعده فيها والفت نظره انك واخد بالك وهتنتظر منه يلتزم بوعوده ويحسن من نفسه حسب الاتفاق اللي بينكم
لو بعد ال ٣ شهور الاولى كان عند حسن الظن خليه يكمل وادعمه و قدمله كل شيء يحتاجه عشان يفضل متحمس ولو اخلف وعده او ظهرت شخصيته الحقيقية عكس ما كان بيتجمل في الانترڤيو يبقى لازم تمشيه فورا ومتخليش حد يصعب عليك مفيش حاجة اسمها انت قطعت رزقه، لان بنفس المنطق هو بنفسه هيقطع رزقك وهيخرب بيتك

10/06/2024

Thanks for being a top engager and making it on to my weekly engagement list! 🎉

Ahmed Ramadan, Om Mohamed, Alaa Abdeen Abas, Ahmed Selmi, Ibtisam Amer, Saif Ahmed, Abdelazez Nashaat, إسماعيل خضير, Islam Tolba, Ëmâ Youssëf

07/06/2024

نصيحة تساوي مليون كتاب ممكن تقرأه عشان تطلع منه بالنصيحة دي

06/06/2024

اللحظة اللي بتفوت ما بتطورش نفسك في واحد تاني وجايز يكون اقل منك هيسبقك و هياخد مكانك

03/06/2024

لو بتشتغل ecommerce وحساباتك بايظة او مش عارف تخطط لاي حملة اعلانيه، دي ابسط calculator لأي متجر الكتروني سواء شغال شوبيفاي او غيره

الجزء الاخضر عدل فيه براحتك سواء عدد القطع اللي بتخطط تبيعها وميزانيك الاعلانيه ومصاريفك والرواتب ونسبة بوابات الدفع وغيره

وتحت هتلاقي كل الارقام اللي محتاجها بتتحسب بشكل تلقائي
- Total Reveue
- Gross profit
- Net Profit
- ROI
- ROAS
- Break even point
- CPA

لو عاوز نفس الفايل ان شاء الله يساعدك في شغلك اعمل لايك للبوست و اكتب كومنت بس ecommerce
واتاكد انك عملت متابعة
وهبعتهولك في رسالة

ولو عارف حد محتاج الفايل في شغله اعمل share عشان غيرك يستفيد

03/06/2024

20/05/2024

بعد اكتر من سنه ونص احتفاظ بالمحاضرة دي للمشتركين في القائمة البريدية فقط عندي انهارده قررت اخرجها لكل الناس

في المحاضرة دي ولمدة ٥٣ دقيقه تقريبا حاولت بقدر الامكان اطلع كل البيانات الممكنة لأحد اكبر المتاجر الالكترونية في الشرق الاوسط وهي صيدليات النهدي باستخدام الاداه الاعظم في التتبع وتحليل المواقع الالكترونية SEMRUSH

المحاضرة مجرد تدريب عملي عشان تقدر تستوعب ازاي تحلل المنافسة في اي سوق عاوز تدخله وازاي تطلع نقاط القوة والضعف والفجوة التسويقية اللي تقدر من خلالها تحط منتجاتك قدام العميل المستهدف .

اسمتعوا بالمحاضرة ومنتظر اراء حضراتكم
بالتوفيق للجميع

في هذا الفيديو، قمت بعمل تحليل تفصيلي لمتجر صيدليات النهدي الإلكتروني بالسعودية باستخدام أداة SEMrush الشهيرة. هذا الفيديو هو تدريب عملي على كيفية دراسة المن...