https://www.facebook.com/103993482448026/

عمار محمد Ammar Mohamed, Khartoum (2026)

20/03/2024

انا لله وانا اليه راجعون
انتقل الى رحمه مولاه والدي العزيز قبل قليل بأمدرمان
اسالكم الدعاء له في هذه الأيام المباركة

07/12/2022

عرفنا الأسباب البتقلل لينا المبيعات، وزبطناها وبقينا شغالين بي حَرفنه فيها
الليلة عايزين نتم الحرفنه دي للآخر ونعرف كيف نصل لي عميلنا المُحدد.

طيب نحن في حياتنا الطبيعية لو عايزين نصل لي زول، لازم نعرف عنو كُل شي في البداية عشان نعرف مداخلو كيف
ونديه إهتمام وحنك
ويا زول لو مُهتم كان عرفت بس

يلا هنا في المبيعات ماشين في نفس الطريق
ضروري نعرف عميلنا دا بيحب شنو؟
بيكره شنو؟
الطريقة البيشتري بيها المُنتجات عاملة كيف؟
بيشيل جُملة ولا قطّاعي
حبيبنا دا النوع الجلابي البدفع من غير مُناقشة ولا من عينة يا ود العَم أنا زبونك أكسِر لي السعر دا؟

شُفتَ الفوق دا كلو إسمو سلوك المُستهلك
ويا عزيزي لو تعلم دا عِلم قائم بي ذاتو في التسويق
و تقريبًا كدا بدا مع أربعينيات القرن العشرين.

وسلوك المُستهلك دا يا باشا عبارة عن مزيج مِن عِلم النَفس، الإجتماع، الإنسان "الأنثروبولوجيا" وعلم التسويق
فَـ مِن خلاله بقدر أعرف كيف مُمكن أأثر على عواطف سلوك العُملاء الشرائِي وكذلك أسلوب حياتهم.

سلوك المُستهلك دا ببدأ معانا من قبل عملية الشراء لأي مُنتج، لحدي ما الزول يشتري وبعدها يقيِّم لي المُنتج، سواء تقييِّم إيجابي ولا سلبي.

يعني لو إنتَ في الملعب، سلوك المُستهلك هو الكورة
لو كربتُّو بتجييب قووون خطير
لو ما إشتغلت بيهو بتلقىٰ روحك برا اللعبة
حصل سمعتوا ملعب ولِعب بدون كورة!

فـ أُخد زمنك ومخمخ كويس وإنت بتدرُس سلوك المُستهلك لِمشروعك، وما تتنشن وتسكلَّب لما تلقىٰ في مُشكلة
بالعكس، لما تعرف المُشكلة وين بالضبط، حتقدر تصل لي حلول أسرع
فـ شوووت يا عزيزي، وما تيأس لو حصلت حركة ما تمام، في ضربة جزاء بتلقاك

#بزنس

03/12/2022

شغال ومُدوِّر البزنس حقك شهووور، لكن بديت تلاحِظ حجم مبيعاتك ماشي ينخفِض، وقدُر ما قلبّتها يمين في شمال ما عرفت السبب شنو!

تقدر تتذكر معاي إنوا قبل كدا نحن كان قُلنا شنو المُمكن يعبُر بيك أو يسقَّط حجرك لو ما مشى صح؟
طيب طيب يا سيدي، أذكِّرررك

كان قُلنا إنوا لو ما زبَّطتَ وكرَّبتَ الجزوا الخاص بالمبيعات عُمروا البزنس بتاعك ما ح يمشي
وعندنا 5 أسباب بتقلَّل لينا مبيعات المشروع، وهي :

¶ ظهور مُنافس جديد في السوق بِقدِّم نفس مُنتجك بشكل مُباشر، ومُستهدِف نفس عُملائك فلما يحصل كدا طبيعي حِصتك السوقية تقِل، خااااسه خااااسه لو ما عندك مِيزة تنافُسيّة واضحة.

¶ طريقة عرضك للمُنتج بقت تقليدية جِدًا، كُل مرة ياها زاتا الطريقة وذات العرض.
فَـ أبقىٰ حِرِّيف وأعرف التريندات والجديد وكُون دايمًا في مُقدمَّة السوق، خليك قطر يا باشا 🇧🇭😉.

¶ خدمة العُملاء السيئة واحدة من الأسباب المُنفِّرة وبتأثر على نمو مبيعاتك، زيها زي الرد البطيء وعدم الإنتباه لتفاصيل وإستفسارات عُملائك.

¶ مُنتجاتك تكون ما بتواكِب إحتياجات وتطور العُملاء العصرية
فـ المفروض أول شي تعرف ميولهم، سلوكهم الشرائي، وهل عايزين المُنتج يتطور لأنوا فيهوا نقص في حِته مُعينة ولا كدا مُلبِّي ليهم إحتياجاتهم .
يعني يا عزيزي أهبش محل حوجتهم وعالجوا.

¶ تكون ما قادر تتعامل مع عُملائك الحاليين أو عُملائك الغاضبين، ما قادر تمتصّ غضبوا

هسي واحد شاطر ح يقوم يقول لي : " آه" عميل واحد ما بفرِق معاي..

حبيبنا أسمع مني دي
عارف أنوا مُقابل كل عميل واحد غاضب أنت فقدت 10عُملاء مُحتملين
والكلام دا خطورتوا بتزيد في السوشيال ميديا
منشور واحد من عميل ليهوا تجرُبة سيئة، بيوديك وراء الشمس يا صحبي
وبعدها أوعاك تجي تسكلب وتقول واااي مبيعاتي نقصت والشغلة بقت ما ماشة معاي.

خلي عيونك وسط راسك، وإشتغل بي حرفنة يا زولي

#بزنس

25/11/2022

مُتابعة لسلسلتنا المريّنا فيها على مُصطلح المبيعات كـ تعريف، ومنو أول زول إستخدموا، خطواتوا وتفاصيلوا، وكيف تكون موظَّف مبيعات حقيقي
اليوم حنشوف الإقناع

كيف تقنَّع عُملائك وتكون شِفِّت معاهم!
وكيف تسوق عميلك دا وتوصَّلوا للمكان الإنتَ عايزوا

وكلو بالقانون طبعًا

طيب
يعني شنو إقناع!
الإقناع ما معناها تسلُّط
ولا معناها إنتَ تتكلم والعميل بس عليه يسمع
أي إنتَ معلِّم ونحن منَّك نتعلَّم
بس يا عزيزي قوّة إقناعك بتتمثل في إنك تخليهم يتجاوبوا معاك
يوروك إحتياجاتهُم
يدقوا معاك ونسة يعني

أي عارفك ح تقول لي كلام كتير وبتاع
معليش، بس دا هو البخليك تختار لكُل زول الكلام والجُمل الحتقولا ليهوا
بالبلدي كدا، تهبش محل وجعوا
وتكون مُفتاح لي بابوا

ودا كمان بخلَّق ثِقة عجيبة ما بينكم، وبحسسوا بالقُرب وإنك فاهموا ومن طبقتوا الإجتماعية
أو أقلاها ح يحَّس إنك مُقدِّروا وسامعوا.

وإتذكر إنو العُملاء ديل بشتروا مُنتجات عن طريق الشعور المُعين البيوصل ليهُم
وأزبط وأهم شعور، هو الإلفة والثِقة.
فَٓ خليك مُفتَّح، وأمسك الزبون من مكان رغبتوا وحاجتوا
وخليك زي مثلنا البقول : " لو ما مُتنا، شقينا المقابر"
يعني شِفت ومُقطَّعا
في أمان اللّٰه يا كارب

#بزنس

17/11/2022

الفترة الفات إتكلمنا عن منو أول مَن إستخدم مُصطلح المبيعات، وأساس المبيعات شنو وعرفّناها بمعنىٰ عام وعرفنا التركِات الفيها.
لو راحت عليك، أرجع للبوستات الفاتت بتلقاها وتعال واصل معانا.

- الليلة ح نوجَّه الضوء للموظف الماسك المبيعات زاتو، فَـ يلا سوا نشوف فهمو

مبدئيًا كدا إنتَ كـ موظَّف في قسم المبيعات مطلوب منك تكون مُحافظ على المكونات البتشكِّل ليك شخصيتك العامة
- زي شنو المكونات دي؟!

المكونات دي يا عزيزي وعزيزتي إنكم تهتموا بِـ :
- أناقة المظهر.
- الإهتمام بلُغة الجسد.
- طريقة المُخاطبة.
- نبرة الصوت.
- التواصل البصري.
- الحفاوة في إستقبال العُملاء.

- من الصفات المُهمة تكون عندك كـ موظَّف مبيعات :

¶ الذكاء وسُرعة البديهة.
¶ حُسن الإستماع للعميل.
¶ المصداقية مع العميل.
¶ الإبتسامة و الوش الصبوح "دايمًا بتشعر العميل بالارتياح".
¶ الصبر و سِعة الصدر لكثرة أسئلة العميل.
¶ الإستمتاع في مجال العمل.
¶ التنافُس الشريف مع زملاء المهنة.

وطبعًا بعد ما تزبَّط الحاجات البسيطة دي، لازم تكون مُلِم بكل صغيرة وكبيرة عن المُنتج أو الخدمة البتقدمها للعُملاء.
وإتذكر دايمًا
" حاجات بسيطة بتصنع فروقات كبيرة يا وحش".

#بزنس

13/11/2022

فكرة البيع فكرة مُنذ الأزل، جات من بدري خالص و أول من إستخدم مُصطلح /قُمع المبيعات/
هو الفيلسوف /جون ديوي/
وفسَّر لينا رِحلة البيع من خلال تحليلهُ الدقيق لسلوك المُستهلك.

والتفسير الـ قالوا جون ديوي، انوا قُمع المبيعات يُعتبر مِن أصعب المفاهيم تطبيقًا في مجال المبيعات
ليه هو صعب طيب؟!

لأنوا مُستحيل تقنِّع و تحوِّل شخص غير مُهتم لعميل فعلي من أول لحظة.

وعشان نزبِّط التِرِكات دي مع بعض، ح نبدأ معاكُم الرحلة مِن أول محطة وهي :
*الوعي والإهتمام*
كيف؟
بانك تجتهِد مع عُملائك في تقديم المعلومات ذات القِيمة وطرح المشاكل البتواجهُم بصورة شيِّقة
وخُت لي مليون خط تحت شيِّقة دي لو سمحت
وبرضوا ضمن الرِحلة حنعرف شنو الحلول المُمكن تساعدهم فيها.

بعدها ح ننتقِل لِـ مرحلة
*التقييم*

هنا حنقوم بتفصيل مزايا وخصائص المُنتجات عن المُنافسين، وندرِج أرآء العُملاء حول المُنتج فحتزيد من ثِقة العميل وتاخدوا توديهوا للمرحلة الأخيرة.

بعدها نجي لِـ مرحلة
*الشراء، وما بعد الشراء*

و دي المرحلة المُحببة لأصحاب البزنس، وبيكونوا عايزنها من أول مرة وقبل المراحل دي كُلها
لكن في جُملة بتقول : "الحلو دايمًا في الآخِر"
فَـ المرحلة دي هي الحلو زاااتوا، و حتوضِّح فيها للعُملاء :
- شنو شعورهم لمن نشتري مُنتجنا؟

- كيف مُمكن تطلب المُنتج سواء من السوشيال ميديا أو نقاط البيع المحددة، والضمانات شنو؟

- كيف حتبني علاقة طويلة المدىٰ مع عُملائك؟

دي رحلتنا للمرة دي، ورينا رأيك فيها وإستفدت شنو ومُحتاج تعرف شنو
وإتأكد تمامًا نحن ليك ومعاك لِـ آخر الطريق.

#بزنس
#مبيعات

09/11/2022

عملت بزنس وخلاص الفرحة ما سايعاك و جيت خلفت رِجل على رِجل وشبكت الناس أنا صاحب فكرة المشروع الفلاني والدولارات حتنهال علي وإيييييك، المُهم سُقت نفسك والمعاك بالخلا

دايرين نقول ليك إستكين وروَّق المنقة حبة كدي.

أول شي يا باشا مشروعك دا عشان يمشي ويجيب ليك العائدات المُتوقعة مِنُّو "التارقت" لازم تكون عندك خُطة بيع واااضحة جدًا.

ونحن عملنا ليك حاجة كدا ظريفة وحتساعدك في الموضوع دا، حنقدم ليك خطوات حقيقية عشان تتم عملية بيع مُنتجاتك بالطريقة الصحيحة، والخطوات دي بتتلخص في :

¶ أولًا : بالنسبة للعميل
خليهو يتجول في المحل ويشوف كُل المُنتجات ويسألك
وإنتَ رُد ليهو من غير زهج ونرفزة، وحركات التكشير وأسئِلتك دي كتيييرة كدا أها بعد دا حتشتري ولا لا
دي ما تبعنا
نحن هنا يا حبيب نستقبل بي إبتسامة ونودَّع بي إبتسامة.

¶ ثانيًا : العميل لو سألك من مُنتجك خليك مُقنِع وشِفت في طريقة ردك.
وضح ليهو فوائد المُنتج ومزاياه عن غيرو، ولو في ضمانات وخدمات ما بعد البيع أذكرها ليهو
وأبصُم ليك بالعَشرة حيقتنع حيقتنع.

¶ ثالـثًا : ودي أهم نُقطة
وإنتَ بتبيع لعميلك أبعد تمامًا عن الكِذب والمبالغة في تقديم مُنتجاتك لأنو لو جرّبا وما لِقىٰ كلامك حيشيل حالك قدام الناس، فانتبِه وأكسب ثِقة عميلك بالصِدِق.
وقالوا شنو، الفضيحة والسُترة مُتباريات يااا زولي.

¶ رابعًا : لو إنتَ بادي ياداب في مجال المبيعات؛ إتعلَّم من تجارب السابقين ليك في المجال لأنهم حيَعبروا بيك شديييد ويغيِّروا ليك فِكرك تمامًا.

ولحدي هنا نقول ليكم في أمان اللّٰه ونلقاكُم بفكِر جديد في المحطة الجاية.

16/10/2022

بنسوَّق عشان نبيع؟!
ولا بنبيع عشان نسوَّق؟!

تعال معاي نخُت النقاط على الحروف و نشوف معنىٰ التسويق والبيع
خاصة إنوا في آخر فترة بقىٰ عندنا خلط كبير بين مفهوم التسويق والمبيعات
آي هُم الإتنين مُرتبطات ببعض ومُكملات لِبعض، بس كُل واحد عندوا معنىٰ مُختلف
عندنا مثلًا التسويق هو عبارة عن نشاط هدفوا يسهَّل لينا التعامل بين الشركة والعميل
يعني وسيط بيناتهم
وكمان بيعمل لينا مجموعة من الحاجات؛ زي :
¶ تحليل السوق
¶ دراسة الفئة المُستهدفة وحل مشاكلهم
¶ دراسة المُنافسين
يعني بيجيب لينا تقارير من A تو Z إستخبارات شديدة.

نجي للمبيعات
المبيعات هي بتمثِّل لينا التعامُل المُباشر مع العميل، والهدف منها بيع المُنتج أو الخدمة والحصول على مكسب مادي.

فَـ المبيعات بتمثل لينا التعامل المُباشر
والتسويق التعامل غير المُباشر

طيب بعد الكلام دا كلوا، نجي للخُلاصة :
"البيع هو الهدف النهائي من التسويق، وليس العكس".

12/10/2022

حصل مرة شُفت لونين أحمر وأصفر وإتذكرت حاجة أو زول؟
طيب حصل وإنتَ ماشي كدا ومشغول وجاري وسمعت "معك في كُل مكان" وإتذكرت شركة مُعينة كدا إبتسمت وواصلتا

طيب خلي دا، وتعال أديك القوية
حصل سألت نفسك أنا عايز اشتري حاجة أشربا، مشروب غازي
ح أقول شنو يا ربي!
عايز تطبيق يوصَّل لي الرُكاب في السودان
ح أقول شنو يا مولاي!

بس بس، شُفتَ أول إجابة جات في بالك وقُلتها وأنت مُبتسم أو جعان أو عطشان ... الخ
دا إسمو / البراند /
أي مُنتج جديد بيدوه إسم زيو زي البيبي الجديد، اللما نسميه وننادي بنحِس بالسعادة بقولة حمودي وتوتا
بسسس يلا، بنفس الطريقه دي تقدر تاخُد مساحة من عقول الناس وتحفَّر إسمك عندهم عن طريق إختيارك لإسم براندك، والسُمعة دي طبعًا ما بتجي بالساهِل
طيب تعال يا شفيف نغششك بعض من التِرِكات البتساعدك في تزبيط براند رهيب ظريف كدا
ورقة وقلم ويلا معاي، مكونات البراند :
¶ إسم الشرِكة
¶الألوان والخطوط المُستخدمة
¶ الشِعار
¶ السلوجان (الشِعار النصي)
¶ الأشكال والصور في التصميم
¶ الرائحة ( لو مُنتجاتك عطور)
يعني تهندمو هندما جَد جَد يا باشا.

ويلا معاي كدا، أسرح كدا وأسأل روحك سؤال
هل مُنتجاتك أصبحت من أول خمسة خيارات للناس ولا لسه؟؟؟! 🤔

#عمّار_محمد

09/10/2022

دورة حياة المنتج

مراحل تطور المنتجات شبيهة جداً بمراحل تطور الإنسان😌، يعني من زمن كنت شافع👶🏻 وحبة كبرت بقيت شاب مراهق، لحدي ما كبرتااا وعجزتاااا👴🏻.

مشروعك يبدأ من فكرة تقديم المنتج و توعية الجمهور المستهدف وبكون الإنفاق على المرحلة دي مرتفع جدآ 💸💸فشنو تقل جيبك بس😉.

وبعدها بتجي مرحلة نمو المنتج ويبدأ الطلب على المنتج بصورة تدريجية وتزداد المبيعات والأرباح📈😌

أما مرحلة الإزدهار بإعتبارها مرحلة الحصاد للشركة🔥وبكون المنتج
إستغل مساحة سوقية كبيرة بين المنافسين✌🏼.

مرحلة التشبع بتعني أن السوق وصل إلى درجة عالية من تشابه المنتجات😇😇يعني(السوق اتغرررق) والحاجة دي بتخلي صاحب المشروع يخفض من سعر منتجه عشان يحافظ على عملائه.

وأخيرا مرحلة التراجع والإنحدار
الليلة لو سألناك وين شركة نوكيا وكوداك⁉️
يلا دي أسوأ مرحلة ممكن يمر
بيها منتجك ويبدأ الطلب على المنتج يقل لحدي ما يختفي تماماً من السوق📉.

#الخلاصة
مهمتك كصاحب مشروع تزيد من فترة حياة مشروعك بالتطوير والمواكبة المستمرة للتكنولوجيا🔥.

30/09/2022

بعد جهزت مشروعك وخلاص وصلت نقطة إطلاقه أنت محتاج لحملة تسويقيه كبيرة جداً 📈

⭕شاركنا برأيك في التعليقات
بتسوق لمشروعك كيف ⁉️

24/09/2022

المزيج التسويقي

لو عايز تعمل ليك عصير مشكل كاارب كدا بتعمل شنو🤔، بتجيب المكونات كلها قداااامك وتضربا مع بعض في الخلاط وحتديك أظبط عصير🍹.

نفس القصة دي في التسويق إسمها (المزيج التسويقي)،
وهو عبارة عن أدوات بتشمل كل العناصر التسويقية الأساسية بتتكون من أربعة أركان هي
(المنتجproduct،السعر price ، المكانplace، الترويجpromotion)

⭕أولا: المنتج
بتمثل في نوع المنتجات البتتقدم قيمة اضافية للجمهور 😌.

⭕ثانيا: السعر
تسعيرك المناسب بحدد ليك حجم الإقبال على منتجك، وبالتالي حيوضح ليك حجم القدرة الشرائية وكلما كان المنتج نادرا زاد سعره📈

⭕ثالثا: المكان
ومقصود بيها نقاط توزيع منتجك لازم تكون قريبة دائما من عملائك يعني ما تطول ليهم المشوار👌🏻.

⭕رابعا: الترويج
طريقة تسويقك وترويجك لمنتجاتك وشنو القنوات التسويقية المناسبة لجمهورك، وأفضل الأوقات للاعلان عن منتجك ونوع المحتوى البجذبهم.

ً
كل ما قدرت تخلق توازن بين العناصر الأربعة حتقدر تصل لهدفك النهائي بسرعة🎯

عمار محمد Ammar Mohamed

20/03/2024

07/12/2022

03/12/2022

25/11/2022

17/11/2022

13/11/2022

09/11/2022

16/10/2022

12/10/2022

09/10/2022

30/09/2022

24/09/2022

Address

Website

Alerts

Shortcuts

Share

Category