18/10/2022
نصائح لأعمال النقاشة والدهانات🔽💪👌
لو عايز تشطب شقتك دهانات ونقاشة البوست ده ليك👌
# دهانات الحوائط:
=============
لازم نبقي عارفين ان الدهانات 3 انواع ؟
1- دهانات بلاستيكيه غير قابله للغسيل
2- دهانات بلاستيكيه قابله للغسيل وهوا دا اللي بنستخدمه
3- دهان زيت... ودا خلاص قدم وما حدش بيستعملو كتير
ودلوقتي هنقولك ع افضل الاماكن والشركات الي تشتري منها الدهانات كمبيوتر ؟
1- الجزيرة
2 - جوتن
3- سكيب
كيفيه تنفيذ الدهانات ؟
لازم تاخد بالك كويس جدا جدا ان المحاره اتنفذت كويس واتعالجت ونشفت !!! 👉
نيجي بقا علي اول خطوه !
✅التنفيذ : " الشغل الصح "
النقاش هيبدأ في تنظيف الجدران وبعد كدة هيسحب السيلر على الحوائط والاسقف " السيلر دة بيقفل مسامات المحاره عشان متشربش المياه بتاعت المعجون
بيبدأ يسحب اول سكينة معجون جاهز ولازم تبقي معجونة أكريليك قوية (وايت_بوتي)
وبعد كدة تاني سكينة معجونة أكريليك قوية وبيحط علي المعجون لون عشان يفرق بين الطبقة الاولي والتانيه ,,,,
وسكينة المعجون التالتة بلون مختلف ويصنفر ,,,
#ملاحظة المحاره لو مش كويسة بتاخد معجون زيادة ( سكينة رابعة او خامسة حسب المحارة متظبط)
وبعد كده صنفرة الشغل كله وكنس الحوائط جيداً من الاتربة وبعد كده وش سيلر تاني بعد المعجون حماية للحوائط .
وهيبدأ يسحب وش بلاستيك,,..
بيبطن بيه الحوائط ويفضل ان البطانه تكون قريبه من اللون اللى فعلا هيتعمل على الحوائط... وبعد كده تلقيط اى عيوب في الشغل كله ويفضل على اللمبة او على اضاءة الاسبوتات عشان تبين اى عيوب وتتلقط كويس وتتصنفر جيدا وكنس الحوائط من الاتربة وتجهيزها للفينش .
هتبدأ حضرتك كعميل تروح أي مكان بيبيع ألوان الدهانات.
وهتبدأ تختار ألوان كل حجره والمسؤول في المعرض هيبدأ يعرض عليك أنواع دهانات مختلفه غير البلاستيك العادي
✅ازاي بقا تستلم الي احنا عملناه فوق ؟✊
الاستلام بيكون سهل جدا بمجرد النظر بس.. ولو حته لاعبه ومش مظبوطه او حاجة خشنة وعايزه تتصنفر بتقول للصنايعي صنفرها ولقطها معجون ..
لازم تبقي عارف ان بستلات البلاستيك كلها بتكون لونها ابيض وعشان تختار انت لونك الي هتحب تدهنه بتختاره من كارتله الالوان هتلاقيها موجوده ف المكان الي هتشتري منه
الالوان دي اما الصنايعي بيدربها علي ايده ويعملها بنفسه وده اللي مش بننصح بيه حد علشان بيكون من المستحيل أن الصنيعي يطلع نفس الدرجه
او انت بتختارها من الكارتله وهوا بيدخله ع مكنه كمبيوتر وبيضربهالك وبتطلع افضل من اللى علي الايد
لازم تاخد بالك وانت بتختار درجه اللمعان تبقي عارف ان فيه
(مط - ربع لامع - نص لمعه - لامعه )
يفضل انك تختار ربع لامعه 👍👍
-------------------------------------------------------------
ملحوظة :
=======
✅ درجه اللون ع الطبيعه لو كمبيوتر بتغمق درجة عن لون الكارتله فنعمل حساب الحته دي وتجيب العينه افتح درجتين
✅هات كذا عينه من درجات اللون المطلوب عشان تختار بينهم قبل ماتشتري الكميه المطلوبه للتشطيب وتوفر علي نفسك تمن اخطاء الاختيار الغلط
✅ اطلب من النقاش او فني الدهانات انه يدهنلك حائط باللون الابيض ويعملك العينات عليه بطريقه منظمه زي الصور كده وتكون بمستوي النظر وبمقاسات كبيره ولتكن ارتفاع متر وعرض من ٣٠_٤٠ سم وبكرر تكون العينات علي خلفيه بيضاء عشان يظهر درجات اللالوان وخصوصا الدرجات الفاتحة
✅بعد ما تستقر علي درجه اللون يفضل انك تشتري نصف كميه التشطيب وتطلب من النقاش يدهن الوش الاول اذا طلع هو اللون المطلوب هات باقي الكميه ولو مكنش هو اللون يبقي مخسرتش حاجه وتقدر تغيره بسهوله للافتح او للاغمق لان درجه اللون وهي عينه صغيره حاجه ولما الغرفه تدهن كلها بتبقي حاجه تاني
✅ ياريت اختيار الالوان يكون بناءا علي تصميم او يفضل بعد اختار الفرش لان الدهان ممكن يتغير انما الفرش اكيد لا
✅دي شقتك وانت اللي هتسكن فيها فمتبخلش عليها بخامات نضيفه وصنايعي نضيف لان الحاجه بقت غاليه والنقاشه بالذات مفيش حاجه فيها بتداري فكل عيوبها هتبقي ظاهره وهتدايقك وتكلفه تصليح الشغل البايظ مش هتكون قليله
ناس كتيير بتفضل إنها تبدأ تأسيس نقاشه الأول وبعد كدة تعمل السيراميك ودة لأنهم بيخافوا ان السيراميك يتبهدل ؟
بس للأسف دة مش الافضل !
الصح اننا بنعمل السيراميك الأول وبعد كدة نسيبه 10 ايام لإسبوعين ونغطي الأرضيات مشمع وكرتون عشان نحميه وبعد كدة النقاشه ! ليييه بقي ؟
لأن السيراميك بيكون تحته رطوبة مكان المياه الموجوده في المونه ومكان التخمير , بنسيب الرطوبه ديه تطلع على الحوائط وبعد كدة نبدأ في النقاشه , لو الرطوبه ديه طلعت على الحوائط وهيا عليها معجون , هنضطر نقشره ونعمله من أول وجديد 😓
#مِداد للإنشاءات و المقاولات
structure and content
منقول
