09/06/2026
Yo wuur Pulaagu 🎉👌
«Bayyinaango jaaynde : Capanjoyaɓiire FƁPM yuɓɓiniraama coftal mawngal
Bayyinaango jaaynde : Capanjoyaɓiire FƁPM yuɓɓiniraama coftal mawngal
Fedde Ɓamtaare Pulaar he Muritani mawninirii no yooɗi capanjoyaɓiire mum, ñalnde aset 6 e alet 7 korse (juin) 2026, to Galle Sukaaɓe ɓooyɗo, ɗoo he Nuwaasoot, e dow teddungal Jaagorɗo Pinal e Ñeeñe e Kumpital e Jokkondiral e Sarɗirdu wondude e Jaagorɗo kalfinaaɗo Kuuɓal Laamu, e tawtoreede diisneteeɓe jaagorɗi heewɓe, kam e hoohooɓe leydi ndii e caggal leydi ndii heewɓe.
Yimɓe heewɓe kasi nootiima e nguu kewu kimmungu : jagge toowɗe, fiilaaɓe, yimɓe pinal, hoohooɓe renndo, jannguɓe, jaaynooɓe e bismaaɓe ummoriiɓe Senegaal. Ɗum ine holla baɗtugol yimɓe ɓee hakkille e golle FƁPM gila sosaa e hitaande 1976.
Ñalnde aset ndee, golle ɗee puɗɗorii ko seppo cosaan heewgo yimɓe. Ine heen sagataaɓe, sukaaɓe janngooɓe, rewɓe e worɓe ummoriiɓe e cate 30 fedde ndee. Ñaantule maɓɓe cosaan e jimɗi maɓɓe, e ngamri maɓɓe, e gaacirɗe maɓɓe, e geɗe fitiramgollaagu ɓe mbeelnii ɗee, e ñameele ɓe ngaddi ɗee, ko seede galɗugol e keewal eddaaji pinal pulaagu.
Caggal ɗuum, konnguɗi hooreejo FƁPM e Jaagorɗo Pinal ciftinii darnde fedde ndee darii ngam ɓamtaare ɗemɗe ngenndiije, ngam haɓaade humambinnaagu, ngam kisal ndonaandi pinal e keɓtingol keewal ɗemɗe e pine leydi ndii. Hooreejo Fedde ndee teeŋtinii kadi jojjugol naatnugol ɗemɗe ngenndiije ɗee nder limrewal, kam e karalle ƴoƴre tafaande.
Wejojooji defte binndaaɗe he pulaar, kam e kuutoɗe fitiramgollaagu, e ñameele ɓooyɗe mbaɗaama kadi, ko jiidaa e geɗe kollooje golle FƁPM nder fannu nehdi e jaŋde, e jaŋde mawɓe, e to bannge limrewal.
He ñalawma ɗimmo oo, ñalnde alet 7 korse, yeewtere yuɓɓinaama ngam hollude ɗo fedde ndee rewraa e ɗii duuɓi 50, e hol kuccam mayre janngo.
Jimɗi e ngamri e geɗe ganni peeñninii coftal, e keewal, e galɗugol pinal fulɓe ; fof noon waɗi ko he weeyo welnere e ɓinngu yummaagu. Ñalɗi ɗii uddiraa ko hiirde mawnde pinal e ñeeñal, tawi jirwini ɗum ko diɗɗe naalankaagal keewɗe.
FƁPM teeŋtinii, e nder ngol mawningol, pellital mum jokkude daranaade ɓamtaare ɗemɗe ngenndiije, darannade nehdi e jaŋde, daranaade pinal e tiiɗtingol ngootaagu ngenndi ndii, e semmbinde keewal pine leydi ndii.
E nder ɗuum, Yiilirde ngenndiire fedde ndee ine yetta laamu Muritani, ine yetta denndaangal gollodiiɓe mum, ine yetta lappol ummoriingol Sengegaal ngol, ine yetta jaayɗe tawaaɗe ɗee, ine yetta tawtoraaɓe ɓee fof, addanɓe maanditaare ndee yuumtude, e wonde kewu mo yejjittaake haa cay.»
Nuwaasoot, ñalnde 8 korse 2026
Goomu kumpital FƁPM
Bocar Amadou Ba
