12/01/2026
Waxaa sharaf ah in aan kasoo qayb galo munaasabadda qalin-jabinta dufcaddii koowaad ee 50 diblomaasiyiin ah oo ka tirsan Wasaaradda Arrimaha Dibadda, kuwaas oo si guul leh u dhammeeyay barnaamijka Culuumta Dibloomaasiyadda iyo Xidhiidhka Caalamiga ah. Munaasabaddani waa astaan muujinaysa horumar, himilo, iyo maalgashi lagu sameeyay aqoonta iyo kartida diblomaasiyiinta mustaqbalka.
Hiraal International Consulting, Ahaan waxaan si weyn u bogaadinaynaa dadaalka ay muujiyeen ardayda qalin-jabisay, kuwaas oo muujiyay adkaysi, hufnaan, iyo rabitaan aqooneed oo sare. Barashada Dibloomaasiyaddu waa laf-dhabarta xiriirka caalamiga ah iyo difaaca danaha qaran; waxayna dhistaa awoodda wadahadal, xalinta khilaafaadka, fahamka dhaqamada kala duwan, iyo matalaadda qaranka ee fagaarayaasha caalamiga ah.
Si gaar ah, waxaan amaan iyo mahadnaq u dirayaa Wasiirka Wasaaradda Arrimaha Dibadda, Agaasimaha Guud ee Wasaaradda, Agaasimaha Machadka Dibloomaasiyadda ee Wasaaradda, iyo Jaamacadda Hargeysa, kuwaas oo door muuqda ka qaatay hirgelinta iyo guusha barnaamijkan qiimaha leh.
Anagoo ka Hiraal ahaan, waxaan diyaar u nahay inaan si dhow ula shaqayno Wasaaradda Arrimaha Dibadda iyo Machadka Dibloomaasiyadda si loo helo loona dhiso iskaashi iyo international partnerships caalami ah oo kor u qaada tayada waxbarashada, tababarka, iyo cilmi-baarista, isla markaana fura fursado cusub oo is-dhaafsi aqooneed.
Ugu dambayn, hambalyo dhammaan diblomaasiyiinta cusub. Waxaan rajaynayaa in aqoonta iyo xirfadaha ay heleen ay door weyn ka qaadan doonaan horumarinta dibloomaasiyadda, sumcadda qaranka, iyo doorka Somaliland ee fagaarayaasha caalamiga ah. Guul iyo horumar ayaan idiin rajaynayaa dhammaantiin.
