14/04/2026
Sheeko: Bisad iyo Jiir – Cashar Siyaasadeed
Beri ayaa la yidhi bisad iyo jiir ayaa wada xajay. Jiirkii ayaa bisaddii sharuubaheeda maray, mana ay cunin, taas oo ku abuurtay kalsooni uu ku aaminsanaado in bisaddu isbeddeshay oo toobad keentay.
Markii xajkii laga yimid ayuu jiirkii u tegay habar-jiir, wuxuuna ku yidhi: “Waxaan ka imid xajkii, waxaanan ku soo arkay bisaddii oo toobad keentay oo aan jiirkii cunayn.” Habar-jiirtii iyo kuwii kale ayaa ku yidhi: “Ma hubtaa? Malaha bisaddu toobad keeni maysee.” Jiirkii ayaa ku jawaabay: “Waar anagaa sharuubaheeda marnay, cidnana ma cunayso.” Markaas ayay ku yidhaahdeen: “Si laguu aamino, kaxayso koox jiir ah oo kula soo xaqiijisa waxa aad sheegayso.”
Jiirkii oo ay la socdaan koox jiir ah oo xaqiiqo-raadin ah ayaa isla baxay, waxayna u tageen bisaddii. Bisaddii oo xajkii ka timid oo la moodayay inay isbeddeshay, markay aragtay jiirtii ayay si kedis ah ugu dhexdhacday, qaar bay qabatay qaarna way kala yaaceen. Jiirkii xaajiga ahaa iyo kuwo yar ayaa dirqi kaga badbaaday.
Markii uu jiirkii ku noqday shirkii laga soo diray ayaa lagu yidhi: “Bal waran?” Wuxuu ku yidhi: “Nimanyahow, bisaddii xajkii lagama aqbalin.”
Fariinta:
Siyaasiga xajka ballanta ku gala ee haddana ka baxa waa sida bisaddaas—hadal wanaagsan wuu sheegaa, balse ficilkiisu waa ka duwan yahay.
