Cabdiraxmaan Saabir

26/12/2025

In kabadan filashada!

Doorashooyinkii goleyaasha deegaanka ee shalay ka qabsoomay Muqdisho, inkastoo ay jireen dhaliilo iyo eedeymo ka imanayay Siyaasiinta Mucaaradka ah, haddana waxay astaan u yihiin rajo naadir ah oo qiimo weyn u leh socdaalka dimuqraadiyadeed ee Soomaaliya. Waxay na xusuusinayaan in horumarka siyaasadeed uusan waligiis noqon mid dhameystiran, balse ka-qeybgalka, hay’adaha, iyo hannaan nabadeed oo madani ah ay ka muhiimsan yihiin natiijo aan cillad lahayn.

Casharka laga baran karo waa in dimuqraadiyaddu ku dhisanto samir, wada-hadal, iyo kalsooni si tartiib ah loo abuuro — ee aysan ku iman diidmo joogto ah oo tallaabo kasta la is hortaago marka la is khilaafaba. Dhaliisha wax dhista waa in ay xoojisaa isla-xisaabtanka, ee ma aha in ay disho rajada, maxaa yeelay “Qofkii aan talin, talo ma galo.” Xitaa marka khilaaf jiro, qabashada doorashooyinku waxey muujinayaan faham sii kobcaya oo ah in hoggaanku ku yimaado rabitaanka muwaadiniinta, halkii uu ka iman lahaa xoog ama cid gaar ah.

Hambalyo dhamaan intii kasoo shaqeysay iyo guuleystayaasha kasoo bixi doonaba!

07/11/2025

JALKA JIMCAHA

"U BISHAAREE KUWA SABRA" SUURADDA 2AAD / (AL-BAQARAH): 155AAD

Ugu bishaaree qofka sabarka leh in riyadiisu dhowdahay, xitaa haddii wagtigu dheeraado yaanu lumin rajadiisa, waxaa kugu filan in Allaah SWT uu ku amaanayo haddii aad sabarto, kuuguna bishaareynayo darajo sare haddii aad adkeysato.

Haddaba sabar, waayo adduunku waa daar imtixaan iyo dhibaato, aakhiraduna waa tii wanaagsanayd ee waareysay. Jannada waxaa lagu wareejiyay waxyaabaha ay naftu neceb tahay, haddii jannada si fudud lagu heli lahaa, ma aynaan dhadhamin lahayn macaanka raaxada marka aan galno, waayo waan horumarsanay, oo macaanka raaxada waxaan ku dhadhaminay adduunka, sidaa darteed, Allaah SWT adduunka inaguma siin raaxo buuxda si aan aakhiro ugu faraxno.

Bal aan tusaale ku siiyo, haddii uu qof jaamacad dhameeyo kaliya isaga oo iibsaday shahaadada, ma kula tahay qofkaas inuu macaanka farxadda la qeybsan karo qofka jaamacadda uga qalin jabiyay dadaalkiisa? Macquul ma aha, waayo qofka dadaalay ayaa farxad badan, maadaama uu isaga waqti iyo dadaal ku bixiyay sidii uu ilbiriqsiyadaas ku heli lahaa.

Waa sidaas oo kale qofka cibaadada ku dadaala ee sameeya waxyaabaha ay amraan Allaah SWT iyo Suubanahannagii ahaa Rasuulkiisa naxariis iyo nabadgelyo korkiisa ha ahaatee, waxa uu heli doonaa raalli ahaanshaha Allaah SWT, mana ka quusanayo, waxaa lagama maarmaan ah in qofka mu'minka ah uu maro imtixaan iyo tijaabo si uu u helo jannada, una farxo farxad illowsiisa murugo oo dhan, heer uu xusuusan waayo dhibaatooyinkii uu soo maray.

Imaam Axmed ayaa la weydiiyay, goorma ayaa la helaa raaxo dhameystiran? Waxa uu ku jawaabay “Marka aad tallaabadaada ugu horreysa dhigto jannada.” Xigasho: Buuga Waxaan ahay Adoonkaagii

Jimce Wanaagsan Soomaalaay,
~Cabdiraxmaan Saabir~

05/11/2025

HAMBALYO QALINJIBIN FARXADLEH…

Waxaan farxadda qalinjabinta 🎓 la wadaagayaa saaxiibkey Mudane Cabdiqaadir Maxamed Cismaan Caanooy “Barnaamij” oo maanta udabaaldegaya darajada Master-ka ee Jaamacadda Naif ee Cilmiga Amniga (NAUSS).

Sxbkey Mudane Cabdiqaadir Barnaamij, waxa uu ku takhasusay Amniga Qaranka(National Security), isagoo noqday safka 1aad ee ardayda Jaamacadda soomartay EBID, kuna gudbay darajo aan caadi ahayn (A+) 4.95 oo u dhiganta 99% MAASHAA ALLAAH.

Saaxiibkey Mudane Cabdiqaadir Barnaamij, waa hogaamiye suuban oo loo hanweynyahay, farxad weyn iyo reynreyn beyna iitahay horumarka aqooneed ee uu ku tillaabsaday, taasoo usahli karta hawlaha dowlad dhiska iyo hogaaminta dalka ee hortaalla.

26/09/2025

“Bini Aadanka waad jeclaaneysaa wey ku dhaawacaayaan,
Waad aamineysaa wey ku khiyaamaayaan,
Waad ka tageysaa wey ku dhaliilaayaan,
Waad usoo laabaneysaa wey ku cidleynaayaan!” Maal Part 35!!

Bini Aadanka iska Ilaaliya iskuna Ilaaliya, waa halkii Allaha unaxariisto e sheekhannagii weynaa Ilaahey baa weynoo waaxid ahe Sh. Cumar-Faaruuq Xaaji Cabdisuldaan uu Soomaalida ku sheegay markuu la dardaarmayay Madaxweyne Ismaaciil Cumar Geelle ee shirkii Carta e “Soomaalida isku ilaali, iskana ilaali, kalana ilaali”.

Jimce wanaagsan!!

04/07/2025

Tabliiqinta Soocelinta Dadnimadii Soomaaliga

Waa nasiib darro inaan maanta joogno casri la baacsanayo dadnimadii Soomaaliga oo ay waliba ay caadi sii noqoneyso is adoonsi aanu Allahii ina uuntayba ina badin, taasoo yaqiintii Allena sidaas ugasoo horjeedda. Guri la kireysto iyo mushaar bishii la sugo oo aan waxkale meel kale kaasoo galeyn waxey ahayd wax ku cusub nolosha Soomaalida, sinnaanta tolnimada iyo xoolo goynta waxey ahaayeen laba fikradood oo qofka Soomaaliga ah sharaftiisa u dhawri jiray kana ilaalin jiray inuu faciisa gacanta u hoorsado, qoys kastaa wuxuu dhismi jiray isaga oo aqalkii uu ku hooyan lahaa haysta oo ay mulkigiisa tahay, xoolihii uu ku noolaan lahaana ay xeradiisa kujiraan oo ay iyagana mulkigiisa yihiin, maalintii ay gabar iyo wiil guur doonaan waxaa loo sameyn jiray xoolo goyn oo micnaheedu yahay in xoolihii ay waalidkood usoo raaci jireen inta qeyb laga siiyo, aqal daahya weyna meel aan reeraha ka durugsaneyn looga yagleeli jiray!

Halkaas ayay iyaga oo haysta waxey u baahnaayeen oo dhan nolosha ka billaabi jireen, qof aduunka ku nool oo abaal ku leh oo aan labadoodii waalid ahayn ma jirin, qof ay ku khasbanaayeen iney gorodda u laalaadiyaan ama wax weydiistaan ma jirin, munaafaqad iyo been ma aysan aqoon illeen umaba aaney baahneyne, meesha uu dagan yahay qofka Soomaaliga ah hadii ay cajabin weydo, intaan waagu baryin ayuu inta uu ratiga caynka hoosta ka geliyo ka digo rogan jiray “Halla raro rag baa yiri Rabbina waa ku waafaqay” waa hees hawleedkii geediga e iyagoo isujiibinaya!!

Wixii aad cuni lahayd oo cidkale aad ka sugeyso, aqalkii aad ku nooleyd oo inaad kiro ka bixiso lagaa sugayo, iyo inaad ka baqdo irsaaqadda inuu qof kale kaa jaro kadibna aad ku khasbanaato inaad run iyo beenba ku maaweeliso qofkaas si uunan kuugu caroon waa dhaqan magaalo loogu yimid asalkiisana aan caqli iyo fikrad Soomaaliyeed ku imaan!!!

Bal aragti ka dhiibo sida aan uga gudbi lahayn arrinkaas illaa yaqiintannadii diiniga ahayd aan luminana inbadan oo inaga mid ah na gaadhsiiyay, dadnimadannadiina aan ulasoo laaban lahayn?!

05/06/2025

29/03/2025

Iid Wanaagsan

28/03/2025

Taxanaha Todobaadka: Qormadii 4aad

Jimcaha 4aad ee Ramadaan 2025/1446

Wacan walaalayaal, Maadaama aynu saddexdii todobaad ee h**e kasoo hadalnay baadigoobka maamulwanaagga, cadaaladda iyo iftiiminta xumaanta qabyaaladda ama eexda qabiilka, bal aan Ramadaankan ku sagootino gabayga wali nool ee "Tabaalaha Waqtiga" oo uu tiriyey bartamihii lixdameeyadii (1965-66) abwaanka caanka ah Xaaji Aadan Axmed Xasan loona garan ogyahay “Xaaji Aadan Af-Qallooc”.

Gabaygan wuxuu xaajigu tiriyay ka dib markii wadankii dowlad Soomaaliyeed ka dhalatay, oo saluug badani soo baxay, ragii noqday madaxdii dalkuna sidii la moodaayay ay noqon waayeen, hankii shacabkuna hoos u dhac ku yimi, halgan dheer oo gobanimada loo soo maray ka dib, marka arintaas ayuu ka gabyay xaajigu, gabaygiina.

Gabaygan wuxuu si qoto dheer uga hadlayaa dhibaatooyinka iyo caqabadaha ka jiray waqtigiisa, isagoo si gaar ah u tilmaamaya:

1. Musuqmaasuqa: Iska boobka hantida guud ee dadweynaha iyo sida ay madaxdu ugu takri fali jireen xoolaha umadda.

2. Kala dambayn la'aanta: Maamul xumo iyo shuruucda dalka oo aan la raacin, taasoo keentay fowdo iyo nidaam la'aan.

3. Aqoonta iyo aqoon-darrada: Aqoonta iyo dadka aqoonta leh oo aan la qadarin, halka jaahilnimada la koolkooliyo.

4. Cadaaladda oo la duudsiyey: Xafiisyada dowladda oo rag aan mutaysan loo dhiibo, iyo tuug la yaqaan oo furayaasha hantida umadda loo dhiibo.

Gabaygan wuxuu noqday mid aan duugoobin, isagoo ka turjumaya xaaladihii adkaa ee lixdan sano ka hor jiray haatanna taagan. Wuxuu sidoo kale tusaale u yahay sida suugaanta Soomaaliyeed loogu cabbiro dareenka bulshada iyo xaqiiqooyinka nololeed.

Faallada koobaad ka akhriso gabayga oo dhameystiran.

Tusaale kamid ah kuwa gabaygan kujira oo adiga, saaxiibkaa ama ehelkaaga qabsadayna nagula wadaag xagga faallooyinka.

Waa Jimcihii ugu dambeeyay ee Ramadaan 2025/1446 ee Allaha inaga aqbalo acmaashii wanaagsaneyd ee aan soo sameynay.

Jimce Wanaagsan.

21/03/2025

TAXANAHA TODOBAADKA: Qormadii 3aad

Jimcaha 3aad ee Ramadaan 2025/1446

Helidda Midnimo Qaran iyo Maamul Wanaag

Waxaan todobaadkii h**e kasoo hadalnay inaanan midnimo qaran iyo maamul wanaag toonna laga dhaxleyn Nidaamka Qabyaaladda ee aynu hadeer ku dhaqano.

Haddaba Soomaaliya waxey u baahan tahay tallaabooyin waxtar leh oo lagu gaari karo midnimo qaran iyo xukun cadaalad ah. Halkan waxaan ku soo bandhigeynaa tallaabooyin lagu dhaqan-gelin karo mabda’a Islaamka, waayo-aragnimada dalalka horumaray, iyo duruufaha gaarka inoo ah Soomaali ahaan:

1. Maamul Ku Saleysan Cadaalad iyo Karti

B. Hogaamin Daahfuran oo Cadaalad ah

- Xulashada hoggaanka waa in lagu saleeyaa karti iyo daacadnimo heer kasta, hadey ahaan lahayd — madaxweynaha, xukuumadda, baarlamaanka, maxkamadaha, iyo ciidamada intaba.

- La dagaallanka musuqmaasuqa si looga hortago eexda qabiilka ee shaqooyinka iyo siyaasadda.


Caddeyn Diini ah:

- “Eebe wuxuu idinku amrayaa inaad amaanada u dhiibtaan dadka u qalma, oo markaad xukumaysaan dhexdiinna inaad si caddaalad ah u xukuntaan.” (An-Nisaa 4:58)

- Rasuulka ﷺ wuxuu yiri: *“Markii xil loo dhiibo qof aan u qalmin, sug halaagga.”* (Sahih Al-Bukhari 59)


Tusaale Adduun:

- Singapore waxey ciribtirtay musuqmaasuqa iyada oo daahfurnaan iyo isla xisaabtan lagu dhisay hay’adaha dowladda.


2. Dhisidda Aqoonsi Qaran oo Xooggan

B. Ku badalidda Midnimo Soomaaliyeed halkii Qabyaaladda

- Aqoonsi qaran waa in la horumariyo, lagana sare mariyo qabiilka iyadoo loo adeegsanayo waxbarashada, warbaahinta, iyo dib u habeynta siyaasadda.

- Waa in la xoojiyo astaamaha qarannimo, taariikhda, iyo sheekooyinka mideeya ummadda.


Caddeyn Diini ah:

- Rasuulka ﷺ wuxuu dhisay Dastuurkii Madiina oo mideeyay qabaa’ilka iyo diimaha kala duwan.


Tusaale Adduun:

- Rwanda waxey ka guurtay kala qeybsanaanta Hutu-Tutsi kadib xasuuqii 1994, iyagoo dhisay aqoonsi qaran mid ah.


3. Hirgelinta Xukuumad Ku Dhisan Karti iyo Aqoon

B. Joojinta Hannaanka Qabiilka ee 4.5

- Waa in si tartiib ah looga guuro nidaamka 4.5 (oo awoodda u kala qeybiya qabiillo si aan sinnaan aheyn).

- Waxaa lagu beddeli karaa nidaam siyaasadeed oo ku dhisan karti, daacadnimo, iyo aqoon.


Caddeyn Diini ah:

- Rasuulka ﷺ wuxuu madaxnimada u dhiibi jiray qofka lagu kalsoonaan karo ee hawsha u qalma, ee kuma saleyn jirin qabiilka uu ka dhashay.

- Cumar bin Khaddaab (RC) wuxuu xilka ka qaaday guddoomiye kasta oo cadaalad darro sameeya.


Tusaale Adduun:

- Maleysiya waxey horumarisay dhaqaalaha iyo waxbarashada iyadoo meesha ka saartay kala qeybinta qowmiyadaha.


4. Xoojinta Caddaaladda iyo Sharciga

B. Dhisidda Garsoor Madax-bannaan

- Waa in la dhisaa nidaam maxkamadeed oo islaami ah, casri ah, oo ka madax-bannaan qabyaalad.

- Waa in sharcigu si siman u qabto qof kasta, lagana ilaaliyo eexda madaxda iyo qabyaaladda.


Caddeyn Diini ah:

- Rasuulka ﷺ wuxuu yiri: “Xitaa haddii Fatima, gabadheyda, ay wax xaddo, gacanteeda ayaan jari lahaa.” (Saxiix al-Bukhari 6788)

- Cumar bin Khaddaab (RC) wuxuu xilka ka qaaday saraakiil uu u arkay ineysan cadaalad fali karin.


Tusaale Adduun:

- Turkiga wuxuu dib u habeyn ku sameeyay nidaamkiisa cadaaladda si uu uga madax-bannaanaado saameynta siyaasadeed.


5. Dhisidda Ciidan Qaran oo Aan Qabiil Laheyn

B. Dibudhiska Booliska iyo Millatariga

- Ciidamada waa in ay u shaqeeyaan Qaranka, ee aysan noqon kuwo u adeega qabiil.

- Waa in la tababaro ciidan daacad u ah Soomaaliya, lagana xoreeyo hogaamiye kooxeedyada.

- Waa in hubka laga dhigo maleeshiyaadka, lana mideeyo ciidamada qaranka.


Caddeyn Diini ah:

- Rasuulka ﷺ wuxuu dhisay ciidan mideysan oo Madiina ka difaaca cadowga, iyadoon loo fiirin qabiil.


Tusaale Adduun:

- Itoobiya waxey ka guurtay ciidan qabiileysan una guurtay mid qaran oo mideysan.


6. Dibuhabeynta Waxbarashada si ay u Dhisto Midnimo

B. Dibuqorista Manhajka Qaranka

- Waa in la baro taariikhda Soomaalida, anshaxa Islaamka, iyo wacyiga muwaadinnimo si midnimo loo abuuro.

- Waa in laga saaro qabiil iyo kalaqeybsanaan manhajyada dugsiyada iyo siyaasadda.


Caddeyn Diini ah:

- Rasuulka ﷺ wuxuu aasaasay dugsiga Dar Al-Arqam, taasoo bulshada u dhistay cilmi iyo akhlaaq.


Tusaale Adduun:

- Finland waxey adeegsatay waxbarashada si ay u mideyso bulshada, iyadoon qofna la takoorin.


7. Horumarinta Dhaqaalaha iyo Sinnaanta Fursadaha

B. Joojinta Qabyaaladeynta Dhaqaale

- Waa in dhammaan Soomaalida helaan fursado shaqo iyo horumarin dhaqaale.

- Waa in la maalgeliyo kaabayaasha dhaqaalaha, waxbarashada, iyo ganacsiga dhammaan gobollada, ee aan loo eegin qabiil.


Caddeyn Diini ah:

- Cumar bin Khaddaab (RC) wuxuu si cadaalad ah ugu qeybiyay hantida qaranka ummadda Muslimiinta.


Tusaale Adduun:

- Koonfur Kuuriya waxey horumar dhaqaale ku gaartay iyadoo la simay fursadaha bulshadeeda.


8. Dibuheshiisiin Qaran

B. Dhisidda Guddi Xaqiiqo Raadis iyo Dibuheshiisiin

- Waa in la abaabulo shirar nabadeed oo ay ka qeyb galaan odayaasha, culimada, iyo dhallinyarada.

- Waa in dadka la baro muhiimadda iscafinta iyo midnimada.


Caddeyn Diini ah:

- Rasuulka ﷺ wuxuu cafiyay cadowgiisii Makkah, taasoo horseeday mideynta Muslimiinta.


Tusaale Adduun:

- Koonfur Afrika waxey adeegsaday Guddi Dibuheshiisiin si looga bogsado nidaamkii Apartheid-ka.


Gutii iyo gabogabadii, hadba maxaa inala gudboon? Aan aragtideyda ku billaabee:

1. Dibuhabaynta Siyaasadda: In la joojiyo nidaamka 4.5, lana hirgeliyo hogaamin karti ku dhisan.

2. Midnimo Qaran: In Soomaali laga gudbiyo nidaamka qabiilka.

3. Caddaalad iyo Amni: In la helo garsoor madaxbannaan iyo ciidan qaran.

4. Waxbarasho iyo Dhaqaale: In la barto midnimada, lana abuuro fursado siman.


“Soomaaliya Soomaali baa leh.”

Maxaad umaleyneysaa adiga?!🤔

Soon ka iyo salaadaha Allaha inaga aqbalo.

Jimce Wanaagsan
🎥 AMC

07/03/2025

Maqaal: Jimcaha Koowaad ee Ramadaanka

Bisha barakaysan ee Ramadaan waa waqti dib u milicsi iyo is-xisaabin. Maanta, markaan eegno xaaladda caalamka, gaar ahaan xadgudubyada awoodda iyo dulmiga ay madaxda qaar—sida Donald Trump—ka geysanayaan dunida, xikmad Qur’aani ah oo si qoto dheer u taabanaysa arrintan ayaa odhaneysa:

“Ha u iilanina kuwa dulmi falaya, si dabka (cadaabta) uusan idiin taabanin, mana lihidin wax gargaara, Alle ka sokow, idinna lama idiin gargaarayo.”
(Suuradda Huud 11:113)

Aayaddani waxay inooga digeysaa in aynaan isku halleyn ama u janjeerin kuwa dulmiga wada, maxaa yeelay, taasi waxey nagu rideysaa dabin aynaan ka bixi karin. Qaar badan oo ka mid ah wadamada Muslimiinta iyo kuwa soo koraya waxey ku dhaceen dabinkaas, iyagoo u gacan galay awoodaha waaweyn ee reer Galbeedka oo ay u hoggaansameen dhaqaale ahaan, ciidan ahaan, iyo siyaasad ahaan.

Xaqiiqada Xadgudubka Awoodda Maanta

Trump wuxuu astaan u yahay nidaamka dulmiga ah ee caalamiga ah, kaasoo wadamada yaryar ka dhiga kuwo la maquuniyo dhaqaale ahaan iyo militari ahaan. Maanta, nidaamka caalamiga ah wuxuu ku dhisan yahay:

B. Nidaam dhaqaale oo adoonsi ah – Waddamada soo koraya waxaa lagu xiraa deymaha caalamiga ah ee shuruudaha xun leh, taasoo ka dhigeysa kuwa ku tiirsan hay’adaha reer Galbeedka sida IMF iyo World Bank.

T. Iskaashi militari oo xadidaya madaxbannaanida – Wadamo badan waxey ciidan ahaan ugu tiirsan yihiin quwadaha waaweyn, taasoo ka dhigtay iney noqdaan kuwa la maamulo oo aan difaacan karin maslaxaddooda.

J. Ganacsi aan sinnaan ku dhisneyn – Qeybaha kheyraadka dabiiciga ah waxaa maamula shirkado shisheeye, taasoo ka dhigtay in wadamada hodanka ku ah kheyraadka ay sii ahaadaan kuwo sabool ah.

Jidka Xorriyadda Dhabta ah

Si looga baxo xaaladdan, wadamada dulman waa iney qaadaan tallaabooyin geesinimo leh oo ay ku dhisan karaan madax-bannaanidooda dhaqaale, ciidan, iyo siyaasad.

1. Isku Filnaansho Dhaqaale (Iskaa Wax U Qabso) – Waa in la maalgeliyo warshadaha gudaha, la yareeyo ku tiirsanaanta deymaha shisheeye, lana abuuro iskaashi dhaqaale goboleeddo. Sida Soomaalidu tiraahdo:
“Nin aan ku furi doonin, yuusan kuu rarin.” Waa inaad isku tashato si aanad u noqon mid la maamulo.

2. Xoog Ciidan oo Madax-bannaan – Waa in la horumariyo awoodda milatari ee gudaha si aanay waddamadu ugu tiirsanaan quwadaha shisheeye. Sida xikmadda Soomaaliyeed tidhaahdo:
“Libin la’aan lama noolaado, lug la’aanna lama socdo.” Dowlad awood ciidan la’aan ah waa mid la maquunin karo saacad kasta.

3. Gobannimo Siyaasadeed iyo Midnimo – Waa in la joojiyaa dabadhilifnimada lagu raadinayo raalli-gelinta quwadaha waaweyn. Midnimadu waa furaha guusha, sida ay Soomaalidu tidhaahdo:
“Wadajir bey laba gacmood wax ku goyn karaan.” Midnimo waxey dhalisaa xoog, kala-taguna wuxuu keenaa tabardarro.

4. Horumar Teknooloji iyo Waxbarasho – Xogtu waa hubka casriga ah ee ugu weyn. Waa in la maalgeliyo aqoonta, cilmi-baarista, iyo tiknoolojiyadda si loo gaaro isku filnaansho. Xikmad Soomaaliyeed ayaa leh:
“Aqoon la’aani waa iftiin la’aan.” Haddii aanad wax aqoon, ma gaadhi kartid horumar iyo gobannimo.

5. Awood, Iimaan iyo Maamul Wanaagsan – Ramadaanku waxa uu ina barayaa is-xakamayn, dulqaad, iyo adkaysi. Horumarka dhabta ah wuxuu ka bilaabmaa anshax suuban iyo hoggaan daacad ah. Sida Soomaalidu tiraahdo:
“Hoggaan xun iyo habar waalan, waa la iska hayaa.” Hoggaan xun wuxuu burburiyaa qaran dhan.

Gunaanad

Jimcaha koowaad ee Ramadaanka wuxuu ina xasuusinayaa in madax-bannaanida dhabta ahi ay ka timaado isku filnaansho, midnimo, iyo hoggaan suuban. Dal kasta oo ku tiirsan quwadaha shisheeye wuxuu noqonayaa mid lagu amar-ku-taagleeyo. Xalka kaliya waa in la dhisaa awoodo gudaha ah—dhaqaale ahaan, ciidan ahaan, iyo cilmi ahaan—si aanay ummadaha dulman u noqon kuwo weligood u gacan-haadinaya cadowgooda.

“Midnimadu waa awood.” – Haddii ay Muslimiinta iyo waddamada dulman midoobaan, dunida waa la beddeli karaa.

Haddii aad halkan soogaartay, dalkeennu rajo ayuu leeyahay!🤗

Sawirka iyo qoraalku shaqo iskuma laha!!

Jimce Wanaagsan!!!

28/02/2025

Awood qaran ma aha kala qaybsanaan, ee waa midnimo; ma aha halgankii h**e, ee waa himillada mustaqbalka.

Horumarka Soomaaliya wuxuu ku xiran yahay hoggaan hagaagsan kuna shaqeeya: sinnaan / cadaalad, xoojinta dhaqaalaha, iyo go’aan adag oo nabad waarta lagu dhisayo.

Murti ayaa odhaneysa:

Dhaaxaa laysu tagaa, laysuna tegaa, ee midnimo laguma taag darna.

24/01/2025

“Noloshu qofka waa ay ka xeeldheer tahay, si kasta oo uu garashadeeda ugu fogaadaa, waxa ay la mid tahay isaga oo aan tin ka jarin!”

Jimce wanaagsan!!